DBKU, SSPCA mujur ngatur Kimpin Meriri, Ngiru Mayau BorneoPost Online | Borneo , Malaysia, Sarawak Daily News » Berita Iban - New 2 Borneo |
- DBKU, SSPCA mujur ngatur Kimpin Meriri, Ngiru Mayau
- Bejejimat maya bebeli sereta landik ngatur belanja
- Danggang: Anang semina ngelempai tanggungpengawa ngajar anak ba pengajar
- Anang laun nyua surat chiri: PTRS
- Penemuai IIC ngagai Rumah Bolly ngayanka penakal
- Kes tipu bebeli online mengkang, taja suah dibantai media
| DBKU, SSPCA mujur ngatur Kimpin Meriri, Ngiru Mayau Posted: 12 Apr 2014 09:18 AM PDT by Rengenyan Labang. Posted on April 13, 2014, Sunday Pengawa diatur genap ketiga kali dikena ngurangka penyampau jelu ke bekesindau sereta nyeliah ari igi penyakit KUCHING: Kimpin Meriri enggau Ngiru Mayau ti diatur Dewan Bandaraya Kuching Utara (DBKU) nerima sukung ti manah ari peranak di kandang endur ti pegai opis kunsil nya (DBKU). Sapit Direktor, Opis Servis Pengemata DBKU, Andrew Joris Noyen madahka kimpin nya udah tiga kali diatur enggau kerejasama Gerempung Nagang Mensia Mayuh Merinsa Jelu Sarawak (SSPCA). Iya madahka tuju kimpin nya dikena nagang jelu tupi baka mayau enggau ukui ari ti majak betelesak lalu ngurangka penyampau jelu tu enda dijaga. Nengah kimpin nya DBKU ukai semina ngarapka penyampau jelu nya ulih dikurang tang mega ngarapka ulih meri penemu sereta nempa penyayau, siru enggau ngembuan tanggungpengawa ngagai jelu. "Program tu sebengkah ari program ninting taun ke diatur DBKU lalu tu taun ketiga udah dipejalaika. "Sukung ari orang ti nupi jelu tu amat ngemuaska ati sereta tau dikemegahka laban tiap taun kami ngungkupka belanja ngagai 150 iku jelu tupi (ukui enggau mayau) diperiri. Taja pia kami bedau mansik naka ni tikas pemujur program tauka kimpin ti dipejalaika. "Tuju program tu dikena meri penerang ngagai orang nupi mayau enggau ukui ngambika enda ngelakka lepas di luar rumah sereta ba jalai alun laban nya ulih ngachau orang mayuh, ti mega ulih mai igi penyakit ngagai orang ti kena gigit ukui," ku iya. Andrew dikerandau raban pengarang berita ba Kimpin Pet Neutering enggau Cat adoption ti diatur DBKU enggau kerejasama SSPCA ba palan pengengkah kereta di mua opis bebayar DBKU Satok, Pusat Komersial Al-Idrus ditu, kemari. Kimpin nya diatur kemari enggau seharitu (13 April) berengkah ari pukul 8 pagi ngagai 12.30 tengah hari. Bejaku baru iya madahka DBKU meri subsidi ngagai orang ti nupi jelu ke bisi datai neutering ba program tu ngena rega ti murah dibandingka enggau rega market. "Bai jelu tupi sekalika mayau tauka ukui ngagai program tu ngambika ulih diperiri nitihka rega ti udah bisi subsidi DBKU. "Ba program tu kami bisi muka kaunter pengerejista ngambi lisin ukui, lalu ulih diperiri ti semina mayar RM40 aja (mayau enggau ukui)," ku iya. Raban ditagit kimpin nya semina sida ke nupi jelu dalam kandang endur ti di baruh pegai DBKU aja lalu penyampau iya bisi sekat. Tiap orang ke bisi nupi jelu semina ulih ngerejista tiga iku aja. Bekaul enggau pengawa ngiru jelu baka mayau sida semina mayar RM30 ke mayau udah besai enggau RM50 ungkup anak mayau. Sama bisi ba program nya kemari Presiden SSPCA Dona Drury-Wee. Sebarang pekara ti deka ditanya bekaul enggau pekara nya tau telefon ngagai Dibasron Didi, Bahagian Kesihatan Persekitaran (ENV) DBKU ba lumur 082-448763 tauka email ngagai env@dbku.gov.my.   |
| Bejejimat maya bebeli sereta landik ngatur belanja Posted: 12 Apr 2014 09:18 AM PDT KUCHING: Mensia mayuh tauka kitai ke nyadi orang bebelika barang patut nemu ikas belanja diri lalu enda sengapa bebelika barang enti deka nyeliah diri napi pangka tating pengidup ke majak niki, ku mandal presiden Serakup Suara Penguna Sarawak (COVAS), Philip Ng. Nitihka penerang ari Philip, ruang bilik ke kurang sereta jelan penatai pemisi patut berundingka chara bukai dikena nambah pemisi lalu anang sengapa bejaika perintah kelebih agi ba senentang isu rega barang enggau servis ke udah majak nambah. "Nyalahka perintah tauka ejensi ke megai kuasa enda sekali mutarka isu tu. Chara nya enda mutarka penusah. "Pemadu manah mutarka isu tu iya nya kitai empu. Kitai patut nerima sereta napi kus idup ti majak nambah ke alai pekara tu deka seruran nyadi lalu sigi enda ulih diseliah. "Enti kitai enda sedia lalu enda berundingka chara bukai, kitai deka pedis," ku iya lebuh dikerandau pemberita kemari rambau 'Roadshow' begulai enggau Opis Menteri Dagang dalam Menua enggau Pekara Bebeli Barang (KPDNKK) di Emart Matang ditu. Iya nambah, pekara ke berat maya kitai ngatur belanja iya nya nemu mida ni bagi barang ti amat diguna enggau ke enda. Ku iya, pemadu manah endur kitai ngelimat belanja iya nya semina meli barang ke amat diguna sebedau berunding deka meli utai bukai. Kelimpah ari nya, Philip mega ngansak orang belika barang berunding panjai sebedau ngambi lun ba bank tauka maya bekenaka kad kredit. "Kitai patut enda nginjau kelalu mayuh kelebih agi ba kad kredit, lun bank sereta anang mega kelalu bebelika perengka lekterik tauka jemari nengah chara bayar pupuk. "Chara tu tau ngujungka kitai nadai duit agi ungkup belanja ninting hari. kitai patut nyimpan sekeda duit dikena napi sebarang penusah ngenyit," ku iya. Ungkup orang ti ngembuan gaji RM3,000 sebulan, penyampau utang ke dibayar sida ninting bulan patut enda ngelui 50 persen ari gaji nya. Pemadu manah ba ikas 30 persen, tandu iya. |
| Danggang: Anang semina ngelempai tanggungpengawa ngajar anak ba pengajar Posted: 12 Apr 2014 09:17 AM PDT SIBU: Aum Besai Gerempung Apai Indai enggau Pengajar (PIBG) sereta Hari Begempuru sebengkah inisiatif ke pemadu manah kena ngaul bala kaban PIBG, apai indai enggau sekula. Chairman PIBG Sekula Sekondari (SMK) Sibu Jaya, Danggang Ugik madahka pekara nya beguna amat dikena nempa mudal mensia ke bekualiti sereta beguna kena ngemujurka pemansang menua. "Nengah Aum Besai Gerempung Apai Indai enggau Pengajar (PIBG) sereta Hari Begempuru dikearapka bala kaban PIBG enggau apai indai sereta raban sekula ulih ngenegapka kaul seraya ngemeratka tanggungpengawa diri empu," ku iya. Danggang bejaku munyi tu lebuh bejadika Aum Besai Gerempung Apai Indai enggau Pengajar (PIBG) sereta Hari Begempuru SMK Sibu Jaya ti keterubah endar diatur di SMK Sibu Jaya, kemari. Ku iya, sekula nya deka teulihka pemujur dalam bidang akademi enggau ko-kurikulum, enti apai enggau raban sekula nya ngemeratka pelajar anak sida. "Nya alai, kerejasama antara apai indai enggau pengajar beguna amat lalu anang semina ngarapka bala pengajar aja ngajar anak sida di sekula. "Apai indai patut ngemeratka agi pekara ngajar anak sida ngambika juluk perintah ke deka nempa mudal mensia ke bekualiti ulih dijapai," ku iya. Bela bis ngulu aum nya, Prinsipal SMK Sibu Jaya, Mohamed Nor Junoh. |
| Anang laun nyua surat chiri: PTRS Posted: 12 Apr 2014 09:16 AM PDT SIBU: Gerempung Tuai Rumah Sibu (PTRS) mantaika langgur penemu ngambika surat nyiri baru bala tuai rumah digaga tumu agi, iya nya enam bulan sebedau servis seseiku tuai rumah nya abis timpuh. Pengerusi PTRS Linus Melin Lembang madah, nya kena nentuka pengawa maduka bala tuai rumah nya ulih dipejalaika enggau lanchar. "Kami enggai meda penanggul ke nuntung bala tuai rumah diatu nyadi baru, ke alai mayuh bala tuai rumah diatu empai nerima surat ti nyiri sida nyadi tuai rumah baru. "Nya alai gerempung PTRS mantaika langgur penemu ngambika pekara nya dikemaru sereta digaga tumu agi, iya nya enam bulan sebedau timpuh servis tuai rumah nya abis," pia ku iya madah ngagai pemberita pengudah ke nyadi chairman aum PTRS, kemari. Linus ke mega kaban Majlis Daerah Matu Daro madahka, ketegal laun nyiri bala tuai rumah ke udah mati timpuh servis ke ngelama empat taun nya, udah meri penanggul ngagai bala tuai rumah enggau peranak rumah panjai. "Enti bala tuai rumah tu apin nerima surat chiri nyadi tuai rumah baru,sida enda bulih elawin ninting bulan. "Diatu, nadai kuasa ngemendarka peminta tauka dokumen peranak rumah panjai ke ari baruh pegai sida," pia ku iya seraya madah lalu nadai nerima elawin ninting bulan kenyau ari bulan November taun seiti nyin kemari. Sebedau tu, dianggar satu partiga ari 359 iku tuai rumah ba sitak Parlimen Sibu enggau Lanang apin nerima surat padu nyadi tuai rumah baru. Nya ngujungka bala tuai rumah nya disemaka baka 'begitang nadai betali' sereta nadai nerima elawin ninting bulan berengkah ari maya servis sida ke abis timpuh. Ku Linus baru, perintah mega patut meri notis tumu bekaul enggau servis seseiku tuai rumah nya, sekalika mengkang tauka enda. Ku iya, nya ngemudahka tuai rumah enggau peranak rumah panjai nyendiaka diri tumu agi ngiga penganti baru enti sema servis tuai rumah lama diketuka. "Enti sema notis tauka surat nya diberi tumu agi, nya ulih ngemuntangka peranak rumah panjai milih tuai rumah baru," pia ku iya seraya madahka semua nya beguna kena nentuka tampung pengawa nyadi ketuai di rumah panjai nya manah berurun baka selama. |
| Penemuai IIC ngagai Rumah Bolly ngayanka penakal Posted: 12 Apr 2014 09:16 AM PDT by Chris Bishop. Posted on April 13, 2014, Sunday Pemantu Bishop pechaya kaul ti udah lama kukuh antara gerija enggau gerempung sereta orang Islam di negeri majak ditanggam KUCHING: Archbishop Gerija Anglikan kandang Menua Asia Tenggara Bishop Kuching Datuk Bolly Lapok kemari nerima penemuai seraban pemesai ari Palan Penerang Islam (IIC)Kuching ke rumah iya di Jalai Mcdougall ditu. Penatai sida seraban ti betuaika CEO IIC Sabariah Matali, bela disempulang seiku penyanding penemu IIC Dr Hirman Ritom lalu disambut Pemantu Bishop, Aeries Sumping Jingan. Ngelaluka penemuai raban nya, Aeries pechaya kaul ti udah lama dikembuan gerija enggau gerempung sereta orang Islam di nengeri tu ulih dipajak tegap agi. "Kaul ke manah entara gerija kristian begulai enggau raban Islam nyadi pekara ti dikemegah kitai di Sarawak ngelamatu. "Kaul manah tu deka digenggam rat lalu kitai seruran deka bebasaka batang pengarap ke dikemeran pangan diri ke alai penemuai raban IIC sehari tu mantu ngemujur juluk kitai ti deka ngintu pemaik enggau pengelikun Nengeri Sarawak," ku iya. Aeries ngarika Datuk Bolly ti benung bejalaika pengawa perintah di Kuala Lumpur kemari. Ba kaul ke sama, Sabariah madah penemuai sida seraban diatur enggau tuju ngerapit kaul enggau gerija tauka orang kristian di nengeri tu. Ku iya, IIC angkun ngadu kerejasama enggau raban gerija ungkup pemaik enggau pengelantang rayat Sarawak lalu ngenegap kaul ti udah lama digenggam. Seraya kededua piak sepenemu deka ngenegap kaul, Dr Hirman ba jaku iya madah IIC ti ngembuan mayuh macham perengka sigi dibuka ngagai gerempung ari batang pengarap bukai endur ngatur pengawa. "IIC ukai semina diungkup ngagai gerempung ti megai pengarap Islam aja. Gerempung bukai ke ngemeran batang pengarap bukai bela diperansang bekenaka penyikap ke disedia di IIC," ku iya. Bela nyambut penemuai raban IIC, Sekretari Diocese Revd John Sim Kim Chai, Dean of Kuching Revd Micheal Buma enggau Canon Theologian (Diocese Kuching) Revd Micheal Woods. |
| Kes tipu bebeli online mengkang, taja suah dibantai media Posted: 12 Apr 2014 09:15 AM PDT KUCHING: Kes orang ke ditipu bebelika barang nengah chara online mengkang nyadi taja pan kes ke sama kala diriput ngagai ejensi ke bekuasa ba taun ke udah-udah. Berindik enggau nya, Serakup Suara Penguna Sarawak (COVAS) ngansak mensia mayuh ti rindu ngelayar internet ba sekeda website ke nyendia servis nyual barang, mansik enggau silik pengamat kompeni nya. Nitihka penerang ari mandal presiden COVAS Philip Ng, siti website ke tebilang (mudah.com) endur nyual barang mengkang nerima sebana ari mensia mayuh baka ke udah. "Kes orang bebelika barang nengah online mengkang majak nyadi. Kes tu dipeda nambah ba taun tu enti dibandingka enggau taun ke udah. "Mensia mayuh patut mansik enggau silik penulin kompeni ke nyual barang nengah chara tu. Kenukuka kompeni nya ngembuan chop rejister, nama sereta palan endur sida nudukka opis," ku iya. Iya mansutka jaku tu lebuh dikerandau pemberita rambau pengawa 'Roadshow' begulai enggau Opis Menteri Dagang Dalam Menua enggau Pekara Bebelika Barang (KPDNKK) di Emart Matang ditu, kemari. Ku iya nambah, nentuka pengamat kompeni nyadi siti pekara ke berat ke alai semina nengah chara nya aja Tribunal Penguna ulih nyaup mantu orang ke meli barang nyema kena tipu. "Tribunal enda ulih mantu orang meli enti kompeni ke endur sida meli barang nya enda direjister. Duit deposit sida deka lenyau baka nya aja. "Berindik enggau nya, mensia mayuh patut meretika chara bebelika barang nengah online enggau silik," ku iya. COVAS sebengkah gerempung ke ukai dikuasa perintah (NGO) ti dikuasa KPDNKK megai tanggung pengawa nerenak pemereti senentang hak orang meli ngagai mensia mayuh. Roadshow ke diadu sehari kemari mega ngambi penerang ari mensia mayuh ba senentang pangka kos idup ke majak nambah maya ke diatu. Ila, COVAS deka ngadu program ke sebaka di Summer Mall, Kota Samarahan lalu program nya mega dikerembai ngagai Miri, Sibu, Sarikei enggau Bintulu. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |