Nyaup orang tasah sebagi ari juluk SADIA BorneoPost Online | Borneo , Malaysia, Sarawak Daily News » Berita Iban - New 2 Borneo |
- Nyaup orang tasah sebagi ari juluk SADIA
- Kerejasama UNIMAS, TMC dikearap ulih nyungkak kualiti perubat di nengeri tu
- Sarawak deka neladan NZ ngemansangka pelajar tumu anak mit
- Pengelebang Karpal ngenyitka mensia, nya mega pengerugi ba menua: Dr Jerip
- Sarawak jauh tinggal ba pekara perubat: Dr Jerip
- Interhill nyambut ‘Good Friday’ begulai enggau bansa Penan
| Nyaup orang tasah sebagi ari juluk SADIA Posted: 17 Apr 2014 09:04 AM PDT by Chris Bishop. Posted on April 18, 2014, Friday KUCHING: Serakup Dayak Iban Sarawak (SADIA) pampang Kuching ti betuaika chairman Dato Dr. Anthony Nait nemuai ngesah penusah rumah panjai angus di Sg. Engkalat, Btg Igan Sibu kena 12 April 2014 tu tadi. Penemuai sida seraban ke bela disempulang tiga iku tuai rumah ari pelilih Kuching iya nya Tr Andam, Tr Robert Dino enggau Tr Matthew Bandan nyadi sebengkah penemuai bejalaika tanggung pengawa rama (CSR) SADIA. Nitihka penerang ari Nait ke dikerandau bedau lama tu tadi, tuju penemuai sida seraban sigi deka ngesah penusah ke nuntung peranak rumah panjai Sg. Engkalat ke udah angus kenaka 3 April tu tadi. "Ngesah, mantu sereta besaup maya penusah endang udah lama dikemeran kitai bansa ke alai pengawa tu mega udah nyadi adat enggau gaya pengidup bansa kitai Iban lebuh maya pangan diri bisi ditinggang penusah. "Lalu pia mega, pengawa bebantuka bansa diri maya tusah endang sebagi ari juluk serakup SADIA nengah program CSR," ku iya. Iya nambah, tajapan barang tauka pemeri ke dibai ukai utai ke berega, penatai sida seraban sigi deka ngeringka semengat peranak ke dituntung penusah. Ku iya, kami mai ati ti balat sinu, ti kasih sereta mandangka penyiru ngagai bansa diri. "Nyadi nya meh reta ti pemadu berega ke dibai kami seraban ari Kuching ti lebih ari semua utai. "Penyinu enggau penyiru tu ukai bansa utai ti ulih dibeli, dijual tauka dibai besilih. Berindik enggau nya, enti bansa kitai bisi tusah, anang berunding dua tiga deka nulung,'ku iya. Rumah panjai Sg. Engkalat, Btg Igan Sibu 17 pintu angus urung jam 9 pagi kenaka 3 April tu tadi. Ba penusah nya, semua reta ke dikembuan sida sekayu rumah ambis diempa api dalam timpuh sejam. Penatai raban SADIA pampang Kuching disambut Pemancha Stanley Geramong, Tr Adin (Sg. Engkalat) enggau peranak rumah panjai ke dituntung penusah. Ba penemuai nya, sida seraban (SADIA) bisi ngagihka utai pemakai ngagai peranak rumah panjai Sg Engkalat ke diterima TR Adin.   |
| Kerejasama UNIMAS, TMC dikearap ulih nyungkak kualiti perubat di nengeri tu Posted: 17 Apr 2014 09:03 AM PDT KOTA SAMARAHAN: Kerejasama entara Universiti Malaysia Sarawak (UNIMAS) enggau Palan Perubat Timberland(TMC) ulih mantu nambahka penyampau pekara perubat bekualiti tinggi dikena nangkup peminta guna raban bansa enggau penanggul pengerai di nengeri tu. Kemari, UNIMAS nengah Fakulti Perubat enggau Sains Pengerai enggau TMC udah nyain sempekat pemereti ati (MoU) nyendiaka palan latih ti pemadu manah ke nembiak perubat enggau pakar perubat. Nambahka nya kededua piak mega deka nempa kerejasama ngatur mayuh program akademik enggau pengawa pemansik. Sapit Mandal Chanselor (Penyelidikan dan Inovasi) UNIMAS, Profesor Dr. Kopli Bujang dalam jaku pengelalu pengerami nyain MoU entara UNIMAS enggau TMC madah, nengah kerejsama nya TMC nyediaka kereban tauka perengka guna ke pakar enggau nembiak perubat UNIMAS. "Nitihka MoU nya, UNIMAS deka meri status akreditasi TMC kena nyaga pengerai pengereja pengawa sida. UNIMAS deka ngemendarka pengereja pengawa klinikal sida ke bisi ati bejalaika klinik swasta gawa ba TMC. "Maya sida ulih muka klinik deka dirunding pengereja pengawa klinikal enggau TMC, tang atur ke patut iya nya pengawa ba UNIMAS enda tau enda dikemerat," ku iya. UNIMAS milih TMC bepelasarka pengulih pakar perunding enggau perengka guna ti sama ulih dikena, lalu pakar perubat UNIMAS dikemendar nyendiaka servis pakar ba TMC. Kelimpah ari nya Managing Director Palan Perubat Timberland (TMC) Dr. Dennis Yu Hee Yong lebuh bejaku ba pengerami madahka kerejasama nya senipak enggau transformayen sektor perubat ngagai dagang temuai perubat ti majak tebilang ba nengeri tu. "Dagang temuai pengerai diatu nyau majak tebilang lalu diatu udah nyadi indsutri servis ti pemadu beguna dalam nengeri kitai. "Perintah diatu endang benung chakah ngelakuka dagang temuai pengerai.Kitai udah numbuhka Malaysia Health Tourism Council (MHTC) sereta ngurangka penyampau chukai penatai pemisi ungkup palan perubat ngambika bisi dikena sida ngerembaika sereta ngemeranka servis pusat nya. "Nengah MoU nya semua raban perubat ti landik ari UNIMAS diatu tau bejalaika pengawa di TMC enggau nadai penanggul undang-undang. Berindik ari sungkak penatai pemisi, UNIMAS ulih ngelatih mayuh agi pakar ari menua tasik sereta ulih matak mayuh agi raban perubat ti pakar," ku iya seraya madahka TMC diatu udah ngemayuhka penyampau katil nyentuk 102 buah. Pengawa nyain sempekat nya kemari dikemataka Menteri Muda Pengerai Mensia Mayuh Datuk Dr. Jerip Susil. Bisi datai ba pengerami nya ti diatur ba Galeri Rumah Universiti, UNIMAS iya nya Chairman Lembaga Pengarah Universiti UNIMAS Datu Dr. Hatta Solhi, Sapit Dekan (Pembangunan dan Perkhidmatan Klinikal) Fakulti Perubat & Sains Pengerai UNIMAS Profesor Dr. Awi Idi enggau ke bukai. |
| Sarawak deka neladan NZ ngemansangka pelajar tumu anak mit Posted: 17 Apr 2014 09:03 AM PDT KUCHING: Sarawak deka neladan sistem pelajar pemun baka ti dikena menua New Zealand ngambika tau nyendia sistem pelajar ke bekualiti ungkup nembiak mit. Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madah perintah beratika pemerat nyendiakka sistem pelajar ke bekualiti lalu juluk nya semina ulih dikemujur nengah sistem ke bekualiti. "New Zealand ngembuan sistem pelajar pemun ke pemadu manah lalu kitai deka neladan sistem ti udah dituku ke menua nya. "Perintah Nengeri keran nyendia sebengkah pelajar pemun ke bekualiti ungkup nembiak mit ke alai kitai pechaya semua nya datai ari raban pengajar ke ngembuan setipikit,bekualiti sereta disedia enggau program pemansang,'ku iya. Fatimah mansutka jaku tu ngagai pemberita pengudah nerima penemuai Duta Besai New Zealand David Pine sereta raban iya di opis iya di Wisma Baitul Makmur Petra Jaya ditu, kemari. Meretika pemansang sistem pelajar pemun ke dikembuan New Zealand, Fatimah madah sistem pelajar ke dikena Sarawak maya ke diatu agi jauh tinggal ari sistem menua nya lalu deka ngatur mayuh kerejasama tauka program dikena nentuka nengeri tu neladan sistem menua nya. "Kitai nyadang, ba program Borneo Post Education Fair (BPEF) taun ti deka datai, sistem ke dikena menua New Zealand deka dipandang ke alai Majlis Pendidikan Awal Kanak-kanak Sarawak deka mega ngambi bagi. "Ba randau kami sehari tu, Davis setuju deka mantu kitai lalu besemaya deka sekali agi nyereta BPEF ba taun 2015,"ku iya seraya ti muji pengangkun New Zealand nganjung raban ti besai ba BPEF 2014 ke baru udah tembu. Neladan sistem pelajar pemun New Zealand kitai ngarap raban pengajar ulih ngangkatka penau sereta pengelandik kelimpah ngulihka penau profesional ba pekara pelajar pemun nembiak mit. Iya mega madah penemuai David sehari kemari deka ngerapitka kaul Perintah New Zealand enggau Malaysia kelebih agi Perintah Nengeri Sarawak. Bela datai Direktor Unit Pelajar New Zealand ungkup menua Asia Tenggara Izak Human. |
| Pengelebang Karpal ngenyitka mensia, nya mega pengerugi ba menua: Dr Jerip Posted: 17 Apr 2014 09:03 AM PDT KOTA SAMARAHAN: Pengelebang Kaban Palimen (MP) Bukit Gelugor ti kala nyadi Chairman Parti Tindakan Demokratik (DAP) Karpal Singh ngenyitka mensia mayuh sereta pengerugi besai ba menua. Pekara nya dipadahka Menteri Muda Pengerai Mensia Mayuh Datuk Dr. Jerip Susil lebuh dikerandau pengarang berita ba sebengkah pengerami. "Karpal Singh udah nyadi 'pillars of political icon' di Malaysia lalu iya udah bejalaika tanggungpengawa ti amat beguna lalu ngasuh demokrasi enggau isu ti bekaul terus dibantaika ngena chara ti engkeman. Nya alai pemarai iya pengerugi besai ba menua," ku iya. Nambahka nya Dr. Jerip nyema ke Karpal baka Tan Sri Tan Chi Kun ti ngetanka pengelurus. "Iya (Karpal) dalam raban baka sida Tan Sri Tan Chi Kun. Iya (Karpal) orang ti ngetanka pengelurus tang enti ari segi politik nya endang bebida ti mega dikemeranka semua, enti enda iya seiku orang ti sama ngidupka demokrasi di menua tu," ku iya lebuh ditanya bekaul enggau pemarai Karpal Singh. Dulu ari nya Dr. Jerip ngemataka pengawa nyain sempekat pemereti ati (MoU) entara Universiti Malaysia Sarawak (UNIMAS) enggau Palan Perubat Timberland (TMC) ke diatur ba Galeri Rumah Universiti, UNIMAS ditu kemari. Nitihka ripot berita, Karpal Singh ti kala nyadi Chairman DAP enggau pemantu iya, bebadi nabanka nyawa pengudah betapi enggau penusah bebadi ba jalai alun di Kilometer 301.6 Lebuhraya Utara Selatan ari Utara di Gua Tempurung, kemari. |
| Sarawak jauh tinggal ba pekara perubat: Dr Jerip Posted: 17 Apr 2014 09:02 AM PDT KOTA SAMARAHAN: Sarawak dalam pekara perubat mengkang begunaka mayuh agi pengereja pengawa, pengelandik, kereban sereta logistik ngambika ulih nyendiaka servis ti bekualiti ngagai mensia mayuh. Menteri Muda Pengerai Mensia Mayuh Datuk Dr. Jerip Susil madah, Sarawak agi jauh di belakang Semenanjung Malaysia sereta Sabah senentang pemisi perengka guna tauka kereban perubat. Nya meh entara pemar ditapi dalam pekara perubat, ku iya. "Kitai endang agi jauh tinggal ari Semenanjung Malaysia tauka Sabah, kitai tinggal urung 20 ngagai 25 peratus bekaul enggau pengereja pengawa, pengelandik, perengka tauka kereban enggau logistik," ku iya. Dr. Jerip mansutka pekara nya lebuh bejaku ba pengerami nyain sempekat pemereti ati (MoU) entara Universiti Malaysia Sarawak (UNIMAS) enggau Timberland Medical Centre (TMC) ti diatur ba Galeri Rumah Universiti UNIMAS ditu kemari. Bejaku baru iya madahka kelimpah ari nya iya madahka nengeri tu mega betapi enggau bayar perubat ti majak mar. Ngenang MoU entara UNIMAS enggau TMC Dr. Jerip madah, sempekat nya senipak sereta beguna bendar ngagai Sarawak ti deka ngubah sektor perubat enggau enggau nyadi menua maju. Iya madah, kerejasama ke ditempa nya ulih mutarka penanggul suntuk lutur enggau indu misi ti majak digunaka raban bansa, berindik ari penyakit berampit majak nanggul. "Penyuntuk lutur enggau indu misi endang diasaika kitai nya alai pekara tu enda tau enda diputarka enggau pengelengkas. "Nya alai perintah meransang sereta minta piak institut pelajar tinggi nengeri bekerejasama enggau piak peribit ngangkatka capacity building entara orang perubat enggau peribit. "Nengah MoU tu kededua piak ulih ngatur beberapa program ke patut dipasuk raban nembiak ti ngambi bidang perubat enggau konsultan klinikal ti nyengkaum latih dalam kelas enggau ngadu pengawa pemansik," ku iya. Dulu ari nya, Dr. Jerip ngemata pengawa nyain enggau betukar MoU entara UNIMAS ti diarika Timbalan Naib Chanselor (Penyelidikan dan Inovasi) Profesor Dr. Kopli Bujang enggau TMC diarika Pengarah Urusan Dr. Dennis Yu Hee Yong. |
| Interhill nyambut ‘Good Friday’ begulai enggau bansa Penan Posted: 17 Apr 2014 09:02 AM PDT MIRI: Taja pan semina sebagi mit ari raban bansa Orang Ulu, bansa Penan enda ditinggal lebuh nyambut sesebengkah pengerami lebih agi ti bekaul enggau jalai pengarap baka Hari Easter. Berebak enggau pengerami nya, Gerup Kompeni Interhill udah bejalaika atur pengawa sembiang begulai enggau sekeda peranak Penan ba sekeda genturung pendiau di Ulu Baram. Atur pengawa nya berengkah enggau pengawa besembiyang bebala mayuh ti diketuaika Pastor Ajeng Wan enggau Pastor Xytus Jok ari Borneo Evangelical Mission (BEM) Miri sereta mega bala ketuai raban bansa ba kandang menua nya. Atur pengawa besembiang nya dipejalaika urung sejam, ke alai udah nya ditangkanka enggau pengawa makai bebala mayuh ti disediaka Interhill. Nengah awak nya, peranak menua nya ulih ngedutka kaul enggau pangan diri. Ku Menijer Menurut Komunikasi Koperat Gerup Interhill, Agnes Nyelang, sida nemu pemesai reti pengawa besembiyang ti dikemeranka raban komuniti, kelebih agi ti bekaul enggau jalai pengarap. "Nya meh kebuah kami ngatur pengawa besembiyang beserimbai enggau Hari 'Good Friday', ke alai ungkus perengka pengangkut semua nya ditanggung kami magang," pia ku iya madah nggai Utusan Borneo. Iya mega madahka, Interhill berasai gaga endar ati laban ulih mantu sereta begulai enggau sida ngintu pengerami nya. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |