» »Unlabelled » Perambu memanah chara ngena belanja: Mawan BorneoPost Online | Borneo , Malaysia, Sarawak Daily News » Berita Iban - New 2 Borneo

05:03:00

Perambu memanah chara ngena belanja: Mawan BorneoPost Online | Borneo , Malaysia, Sarawak Daily News » Berita Iban - New 2 Borneo

Perambu memanah chara ngena belanja: Mawan

Posted: 28 Apr 2014 02:42 PM PDT

Agih MRP ti diberi ngagai JKKK patut dipelanja enggau betul ngambi tau nguntungka semua

SARATOK: Penerima geran Projek Mit Pemansang Menua Pesisir (MRP) dipinta ngaga perambu chara ngena belanja enggau chara ke betul ngambi pulaika pemaik ngagai semua orang ke bekaul.

Menteri Pemansang Rama, Tan Sri William Mawan Ikom madah, penerima mega diperansang nyendiaka tuju ungkup belanja nya dikena ngambika pengawa matau projek nya ulih mujur dipejalaika.

"Geran MRP nya diagi sechara berenggat nitihka pemerat laban agih belanja nya diungkupka ngagai Komiti Pemansang enggau Pengelikun Genturung Pendiau (JKKK), Serakup Apai Indai enggau Pengajar sereta gerempung ukai dikuasa perintah (NGO)," pia ku iya.

Iya mega minta bala penerima ngena ungkup belanja ke diberi perintah nya enggau manah ngambika enda dikejakuka bala nembiak redak.

Mawan bejaku munyi tu lebuh bejadika pengerami Nyuaka  Geran MRP Pelilih Mit Saratok ba bilik baum Opis Pelilih Mit Saratok, kemari.

Mawan mega minta peranak menua pesisir liat ati nganti enti sema sida deka ngasaika pengelantang ari sesebengkah projek pemansang ti dipejalaika udah tu ila.

"Tiap iku peranak menua pesisir anang enda liat ati nganti laban perintah tetap ibuhka pengelantang pendiau sida jemah ila,"pia ku iya.

Mawan ke mega Kaban Parlimen Saratok, minta semua penerima MRP nguna agih belanja nya enggau naka pemanah ngambi pulaika pengelantang ngagai semua.

Ku iya, tiap iku dalam organisasyen nya enda tau enda begempung ngiga chara ngulihka belanja ngambika enda semina bepanggai ba perintah aja.

"Rayat di menua pesisir manah amat nasit laban perintah seruran ngemeratka perengkaguna ke diguna rayat ba genturung pendiau enggau di rumah panjai.

"Nengah pemeri geran MPR ke disuaka seharitu, aku arap  penerima lantang ati sereta meri sukung ke penuh ngagai perintah ," pia ku iya.

Dulu ari nya, 63 iku penerima udah nerima chek geran MRP ngarika Kelab, serakup ,sekula, JKKK,Masjid,Gerija,rumah panjai enggau genturung pendiau ari Mawan.

Bela b isi ngulu pengerami nya, DO Saratok,Mohamad Ikhmal Abdullah,Pemancha Edward Gille Baul,Pemancha Tan Nyok Ngee enggau bala ketuai raban bansa.

Print Friendly

Taman Negara Kubah diuan spisis engkatak lumur dua mit di dunya

Posted: 28 Apr 2014 02:41 PM PDT

KUCHING: Sebansa engkatak lumur dua mit di dunya bisi ayan di Taman Negara Kubah, Matang ke mega palan pengidup spisis engkatak enggau raung bukai.

Sebedau tu, engkatak ke pemadu mit kala ditemu ba taman tu nyentuk ke raban saintis tetemuka engkatak bukai ti mit agi ba taman bukai.

Nyadi palan pengidup engkatak sereta raung, kitai enda alit ati kebuah Taman Negara Kubah dipilih endur ngatur 'Borneo Frog Race' ti ke-enam kali.

Diatur Universiti Malaysia Sarawak (UNIMAS), Borneo Frog Race dipungkal beserimbai enggau Hari Ngintu Engkatak tauka Save the Frogs Day.

Nitih penerang ari CEO Sarawak Forestry Corporation (SFC) Datu Ali Yusop, kelimpah ari pemanah utai tumbuh enggau utai idup, Taman Negara Kubah mega nyadi Palan Pengidup Jelu Siga Matang.

Palan Pengidup Jelu Siga Matang entara siti palan pemadu likun endur ngintu jelu siga ti nyauka punas tauka palan endur ngintu jelu ti diserah mensia mayuh.

"Palan Pengidup Jelu Siga Matang mega diangkat nyadi palan endur bejalaika pengawa pemansik, palan endur belajar lalu nyadi palan endur ngintu jelu siga ti nyauka punas di Sarawak.

"Jelu siga ba palan tu deka diintu enggau manah sebedau dilepas ngidupka diri ba dalam kampung.

"Taman Negara Kubah udah digizit ba taun 1989 lalu bisi ngintu lebih 80 spisis palma ti ngujungka palan tu nerima gelar Dunya Palma," ku iya lebuh bejadika pengawa Nutup Minggu Kubah ensana.

Bejaku ngenang Minggu Kubah, iya madah, pengawa nya nyadi pengeran SFC ti deka ngelaku pemereti senentang pengaya utai tumbuh enggau utai tumbuh di Taman Negara.

Entara pengawa ti bisi ditusun rambau Minggu Kubah iya nya Borneo Frog Race, Vallombrosa Walk, Kubah Guided Walks, pengawa beripai, pekit fotografi sereta sekeda ke bukai.

Minggu Kubah diatur SFC begulai enggau Opis Menteri Dagang Temuai, Serakup Dagang Temuai Sarawak, Opis Residen Kuching enggau UNIMAS.

Bela bisi ngulu atur pengawa nya, CEO STB Datu Rashid Khan, Direktor Institut Pengintu Rampa Menua enggau Biodiversiti UNIMAS Prof Dr Andrew Alex Tuen sereta Sapit Menijar Besai SFC Oswald Braken Tisen.

Print Friendly

Genturung Pendiau Melayu Bintangor Masjid nyentuk ke Masjid India deka dikemansang

Posted: 28 Apr 2014 02:41 PM PDT

KUCHING: Genturung Pendiau Melayu Bintangor Masjid sama deka ampit pemansang ke nyadi di nengeri tu kelebih enti projek Waterfront nya tembu digaga ila.

Menteri Dagang Temuai ke mega Menteri Pengawa Berumah, Datuk Amar Abang Johari Tun Openg madah, perengkaguna ba GPendiau Bintangor Masjid nya diatu benung dikemansangka.

"Diatu Perintah benung ngaga Waterfront ba belakang Masjid Bintangor ke alai Waterfront nya deka digaga tampung ari Sg Bintangor nyentuk ke Nanga Bintangor, mansa genturung pendiau Masjid lalu betampung enggau waterfront, mansa Brooke Dockyard nyentuk ke Masjid India," ku iya.

Iya bejaku munyi tu lebuh ke nutup 'Sukan Ria Bintangor 2014' ti diatur Pemuda Parti Pesaka Bumiputera Sarawak (PBB) ke sama disaup pampang Bapa enggau Wanita PBB.

Diatu, ku iya Perintah udah nerima RM5 juta ari Perintah Besai kena ngemansangka jematan ke deka nyambung enggau Waterfront nengah Brooke Dockyard.

Dockyard deka digaga digaga memanah lalu digaga nyadi muzium kapal. Lurung Dockyard ke alai orang ke bejual suba mengkang ditanka tang deka deka digaga manah agi.

"Dockyard nya mega deka nyadi palan kraf jari lalu bisi endur alai orang Bumiputera bedaja, nyauka baka Sentral Markit Kuala Lumpur. Laban palan tu semak enggau genturung pendiau kita, kena meh peluang tu ngaga produk ari genturung pendiau kita ngambika ulih dijual dia ila.

"Jual kuih bansa asal kita baka kuih ke kala digaga orang kelia, lalu dijual ba endur nya. Mayuh agi orang meli, mayuh agi pemisi kita,"pia ku iya.

Kelimpah ari nya mega, Masjid India ke diatu deka digaga baru baka ke melepung ba sungai.

"Masjid nya enda digaga dalam pasar (India Street) tang di luar.Tu deka nyadi siti endur ke manah ila, ngambika ulih matak mayuh agi bala temuai ari menua tasik," ku iya.

Pemansang bukai deka digaga nyengkaum sistem parit di genturung pendiau nya deka digaga besai agi.

Abang Johari madah, Perintah udah meri RM300,000 kena ngemesaika agi parit di genturung pendiau nya.

Bejaku pasal atur pengawa ngaga lumba enggau main nya, iya muji Nembiak PBB ke udah ngatur pengawa nya ngambi ulih neritka agi kaul enggau komuniti sereta sama bela beratika peluang ke ulih dikereja nengah chara begempung ke deka meri penguntung ngagai komuniti.

Main ke ke bisi diatur berebak enggau nya, bak pekit futsal, pemandang Agensi Anti Dadah Kebangsaan (AADK), meresa pengerai enggau bejualka pemakai.

Sama bisi nguluka atur pengawa nya, Menteri Kereja Raya Malaysia ke mega Ketuai Nembiak PBB sereta Kaban Parlimen (MP) Petra Jaya, Fadillah Yusof Chairman JKKK Genturung Pendiau Bintangor, Ketuai Nembiak PBB Ranting Genturung Pendiau Bintangor, Abdul Mokhtarin Anuar enggau Ketuai Nembiak PBB Satok, Iskandar Sharkawi.

Print Friendly

Pengelikun ba tempat kereja patut dikeibuh

Posted: 28 Apr 2014 02:41 PM PDT

by Jacqueline David. Posted on April 29, 2014, Tuesday

Ulah ti baka tu tau nyaup nyeliah penusah bebadi maya ngereja pengawa, ku Ismail

KUCHING: Dalam taun 2013 aja, Opis Menteri Pengereja Pengawa nengah Opis Pengelikun sereta Pengerai Pengereja Pengawa (JKKP) udah meresa urung 210,413 palan endur gawa enggau injin ke dikena ngereja pengawa.

Ari penyampau nya, urung 18,186 notis dikeluarka, 415 iti penyalah dikompaun lalu urung 350 iti kes dibai ngagai kot ketegal penyalah bekaul enggau pengelikun sereta pengerai ba endur gawa.

Sapit Menteri Pengereja Pengawa Ismail Abd Muttalib madah, Perintah chakah neritka undang-undang ngambika atur ti udah ditetapka nya dikeibuhka.

"Pengelikun ba endur gawa patut disediaka ngambika pengereja pengawa ulih ngaga pengawa sida iya enggau lantang, likun, sereta bepengerai kelimpah nyaga pengelikun kandang pendiau ke besemak enggau endur gawa nya," pia ku iya.

Iya bejaku munyi tu ba aum enggau media sepengudah bejadika Hari Pengelikun enggau Pengerai ba Endur Gawa 2014 Sedunya ke diaturKunsil pengelikun enggau Pengerai Pengereja Pengawa Menua Malaysia (NCOSH) begempung enggau Opis Menteri Orang Gawa, Opis Pengelikun Pengerai Pengereja Pengawa Sarawak (JKKP Sarawak), Opis PERKESO enggau Palan pengelikun enggau pengerai Pengereja Pengawa (NIOSH) di Komplek Kunsil Nengeri Lama ditu, kemari.

Pengerami ke diatur kena 28 April ninting taun di serata dunya enggau menua tu endang nitihka atur baka ti udah ditetap ulih ILO (International Labour Organisation).

Ku iya, nengah penyakah sereta kerejasama ari perintah, kompeni tauka endur gawa, nya baru Pelin Besai ba Pengelikun enggau Pengerai Pengereja Pengawa 2010-2015 (OSH MP-15) ulih dijapai kena ngurangka penyampau bebadi ba endur gawa di menua tu nyengkaum ngurangka pengusut, pengasi enggau pengawa dagang.

Ku iya baru, penyampau bebadi ba endur gawa di menua dalam taun 2013, iya nya 3.28 ari 1,000 iku pengereja pengawa enti dibanding enggau urung 3.31 ari 1,000 iku pengereja pengawa dalam taun 2012,bisi kusut urung 0.9 peratus.

Taun tu, program ti beserimbaika leka jaku 'Safety And Health In The Use of Chemical At Work', bisi bejalaika mayuh mengkah atur pengawa baka licha bekaul enggau pengelikun sereta pengerai pengereja pengawa, kimpin pengelikun jalai alun, pemandang sereta ke bukai.

"Kimpin tu diatur kena ngiri penemu ngagai pengerai pengereja tang mega sentang endur gawa nya emu.

Iya mega arapka pengelikun enggau pengerai ba endur gawa tu ulih dikemeran ba rumah, sekula  nengah iring ari perintah ngambika atur kod  pengawa ba industri enggau lalau nya ulih dititihka, ku iya.

"Enti pengelikun sereta pengerai sida iya enda dijaga, pemansut asil sida bisi pengusut laban sida enda ulih bejalaika pengawa enggau manah.

"Kedua, ngemeratka pengelikun sereta pengerai di dalam industri seraya nambahka penyiru ke rampa menua.

Urung seribu iku penyertea ari kompeni, pengereja pengawa, nembiak sekula enggau nembiak ari Palan Pelajar Tinggi bisi ngulu pengerami nya.

Sama bisi nguluka pengerami nya kemari, Kepala Direktor JKKP Dato Ir Dr Johari Basri.

Print Friendly

Semua rumah panjai di Telang Usan enggau Marudi diberi tangki ai Life Saver 1Malaysia

Posted: 28 Apr 2014 02:40 PM PDT

MARUDI: Raban bansa Iban ba kandang menua Poyut/Lubok Nibong dilalau ngambika enda mendingka jaku penyakal baka DAP nengah kimpin 'Go rural' ti madahka sida deka nyambung ai paip graviti ngagai rumah panjai nengah chara beripai, ku Datuk Sylvester Entri Muran lebuh bejadika tangki ai Life Saver 1Malaysia ba rumah panjai Baran Abong, Lubok Nibong, ditu ensanus.

Perintah Barisan Nasional dekaka rayat ngirup air beresi ke ditapis nengah 'ultra vibrant' ngambi pulaika pemanah ngagai pengerai.

Iya mega ngelalau peranak menua pesisir anang mudah tekuing runding ninga jaku penyakal.

Bisi 35 buah rumah panjai Iban ba kandang menua Poyut/Lubok Nibong udah diberi tangki ai Life Saver ari Opis Menteri Pemansang Menua Pesisir, ke alai projek nya dipejalaika kunteriktor H20 ari Kuala Lumpur.

Ba sitak Telang Usan bisi 135 buah rumah panjai lalu ba sitak Marudi bisi 80 udah diberi tangki ai Life Saver nya.

Entri ke mega Menteri Muda Betanam Betupi (Serakup Orang Bumai Bekebun) atur pengawa meri tangki ai Life Saver ba Rumah Baran nya tampung pengawa ti udah dipejalaika ex-Kaban Parlimen ke sebedau tu, Dato Jacob. Sida deka meri tangki ai nya ngagai semua rumah panjai ngambika sida sama bela ampit magang.

Berebak enggau pengerami nya, Entri enggau Anyi Ngau udah ngungkupka geran ari perintah RM13,000 ngagai Rumah Baran JKKK (dikena meli kereban kena nyiling rumah), RM10,000 ungkup Pampang SIDS Rumah Baran lalu RM100,000 diungkupka kena ngaga palan endur engkah kerita ba laman rumah panjai nya nengah (Projek MARIS).

Bela bisi ngulu pengerami nya Kaban Parlimen Baram, Anyi Ngau, DO Marudi, Mackos Sibong, Tuai Rumah Baran Abong, Chairperson Pampang SIDS enggau 30 iku tuai rumah ba kandang menua nya.

Print Friendly

Penegap enggau penyerakup menua Malaysia bepanggai ba nembiak rebak diatu: Fadillah

Posted: 28 Apr 2014 02:39 PM PDT

KUCHING: Nembiak menua tu dikearapka ulih nyadi ketuai nyerakup, ngenegapka sereta ngangkatka menua ngambi tampak sereta dipebasaka dunya.

"Tu mega deka nyadi penyelai sereta penegap ti nyadi ke lalau ngambika menua kitai maju. Ukai semina maju aja tang likun sereta beserakup. kitai mega ulih diau enggau likun, lantang, besaupka pangan diri, siru sereta nyadi rayat 1Malaysia ke beserakup," pia ku iya.

Menteri Kerja Raya, Datuk Fadillah Yusof bejaku munyi tu lebuh ke nutup Karnival Mesra Belia Malaysia (Jom Putrajaya) 2014, ti diatur Opis Menteri Nembiak, Lumba enggau Main (KBS) ba Kompleks Nembiak, Lumba enggau Main di Jalai Tun Ahmad Zaidi Adruce ditu, kemari.

"Program Karnival Nembiak 1Malaysia diatur, diperambu sereta dipejalaika bala nembiak nitihka peneka ati nembiak empu.

"Tu meh ti dikedeka kami ngambika nembiak ti bejalaika program ulih ngatur program ti nguntungka bala nembiak empu, laban sida meh ti dikearap ngemansangka menua jemah ila," pia ku iya.

Ku iya, enti nembiak ngembuan penemu, pengelandik enggau pemanah ulah, menua tu ulih nyingkang nyadi menua ke maju.

Tu meh program besai ke bekaul enggau nembiak kedua kali udah diatur. Keterubah endar sebedau tu diatur dalam taun 2012 ba Putrajaya, ke dikumbai 'Himpunan Jutaan Belia di Putrajaya 2012', ke alai udah ngempuruka urung 2 juta iku nembiak ari serata menua Malaysia di Putrajaya.

Di Sarawak, program tu udah diatur ba tikas parlimen enggau tikas nengeri lalu ke penudi endar ditutup ba Putrajaya, pia ku iya.

Entara program ke bisi dipejalaika kemari baka pemandang, pemerindang, bejualka barang, pekit Muaythai, lumba enggau main sereta mayuh macham agi main bukai.

Bela bisi ngulu program tu, Sapit Direktor Kompleks Nembiak, Lumba enggau Main Muazamir Jili, Direktor Kaunsil Ijinsi Latih Betanam Betupi (NATC) Wan Ahmad Uzir Wan Sulaiman, enggau Direktor KBS Abd Haris Ishak.

Print Friendly