Juluk ati, disiplin, kunchi penyulut pelajar BorneoPost Online | Borneo , Malaysia, Sarawak Daily News » Berita Iban - New 2 Borneo |
- Juluk ati, disiplin, kunchi penyulut pelajar
- Manyin: Projek ngaga Penyangkai Bilun Mukah deka berengkah seharitu
- Nitih ‘Convention Chicago’ Malaysia bisi hak mansik ‘Kotak Chelum’ bilun MH370
- Tiang pengingat kominis nya patut ditebang
- Penyikar peranak rumah panjai nyaup nyeliah penusah angus
- ‘Klinik Pusaka Bergerak’ dikearap ulih muka runding rayat ba pemesai reti reta tengkira: Nancy
| Juluk ati, disiplin, kunchi penyulut pelajar Posted: 15 Apr 2014 04:15 PM PDT Apai indai mega ngembuan tanggungpengawa sebaka pemerat enggau pengajar, ku Dr Dusit KOTA SAMARAHAN: Bala nembiak patut diperansang ngembuan juluk ati sereta tikas disiplin ke tinggi kenyau ari mit, ngambika sida teulihka pemujur dalam pengidup. Presiden Serakup Dayak Graduet Sarawak (SDGA) Dr Dusit Jaul madah, nembiak deka teulihka pemujur enti sida ngembuan juluk ati sereta enda mudah tekuing ke bukai sekumbang ke belajar. Lebuh ke meri licha sentang pelajar ba mua nembiak enggau apai indai kena Hari Enam minggu nyin tadi,Dusit madah kuing pengidup nembiak bepanggai ba sida empu. "Nembiak patut ngembuan tikas disiplin ke tinggi kenyau ari umur biak, laban enti enda pia sida enda teulihka pengidup ke meruan jemah ila. "Nembiak mega patut ngembuan juluk ati ke besai ngambi sida ngelala kuing dalam pengidup. Enti nadai juluk ati sereta ngelala kuing nya, bala nembiak mudah tepawah ke bukai maya ke belajar," ku iya lebuh bejadika Program Licha Pelajar ungkup nembiak Primari 6 enggau apai indai nembiak ba SK St Martin, Merdang apin lama ke udah. Program nya diatur begempung enggau Opis Pelajar Pelilih Mit Kota Samarahan sereta raban ari sekula nya. Nya mega sebengkah ari program SDGA dikena ngiri penemu sentang pemesai guna ngembuan pelajar sekula ke manah. Dusit mega ngelalau apai inda seruran beratika ulah enggau pejalai anak sida. Ku iya "Nembiak ke sekula ditu berundang ari rumah, bala apai indai anang enda ngemataka pejalai anak sida. "Apai indai patut netapka jam anak diri belajar maya malam hari. Enti anak nadai diatur belajar ngena chara ti menuku, sida mudah malut diri ba pengawa ke enda menyana sereta tau ngerugi sida." Lebih 100 iku nembiak ke deka ngambi peresa Ujian Pencapaian Sekolah Rendah (UPSR) kena bulan September tu ila, ngulu program nya. Tebal agi bala nembiak ke nguluka program nya disempulang apai indai ti ngelepaka diri ari pengawa ninting hari sida ngambika ulih begulai enggau anak sida.   |
| Manyin: Projek ngaga Penyangkai Bilun Mukah deka berengkah seharitu Posted: 15 Apr 2014 04:15 PM PDT KUCHING: Kereja renggat keterubah projek ngaga Penyangkai Bilun Mukah ke baru nebing tasik kandang tengah Sarawak ti dipelabaka beungkus RM133 juta deka berengkah dipejalaika seharitu. Menteri Pemansang Infastruktur enggau Penyambung Dato Sri Michael Manyin Jawong madahka, kereja meresi palan padang bilun nya dipejalaika Hock Peng Furniture & General Contractor Sdn Bhd ditimpuhka tembu lebuh manggai Disember 2015 sebedau renggat udah nya dipejalaika ti dipelabaka sepenyampau RM320 juta. "Projek ngaga padang bilun Kod 3C ti ulih enduur bilun ATR70 dibandingka Twin Otter (kapasiti lapan orang tambang) dipelaba tembu magang sereta berengkah dikena taun 2018…tang kitai ngarapka ulih ditembuka tumu ari nya. "Padang Bilun Kod 3C senipak agi enggau Mukah ti benung mansang sereta ulih dikemanahka agi ngagai padang bilun Kod 4C, ungkup bilun ti besai agi baka Boeing, enti diguna jemah ila," ku iya. Iya bejaku ba pengerami nyain sempekat Pemereti Ari (MoU) meri kontarak antara Direktor Jabatan Kerja Raya (JKR) Sarawak Zuraimi Subki enggau Pengarah Urusan Hock Peng Furniture & General Contractor Sdn Berhad Datuk Toh Chiew Hock ti mega bisi datai Ketua Pegawai Eksekutif Lembaga Pembangunan Koridor Wilayah (RECODA) Datuk Amar Wilson Baya Dandot. Padang bilun Kod 3C ulih endur bilun ATR72 tauka bilun F50 iya nya ngembuan landasan sepemanjai 1,500 meter enggau 30 meter pemesai; bangunan terminal urung 3,500 meter persegi; Stesen Bomba dan Penyelamat Lapangan Terbang kategori 5, menara kawalan Jabatan Penerbangan Awam enggau stisin gaya hari. Manyin madahka, Padang Bilun baru nya nyendiaka paymbung baru di sepemanjai nebing tasik ti ulih ngetankan pemansang ekonomi kelimpah ari SCORE. Kelimpah ari Mukah, ku iya kandang sepemanjai 320 meter nya nyerangkung Tanjung Manis, Samalaju, Sibu, Bintulu, Sarikei enggau Kapit. Padang bilun nya urung tujuh kilometer barat daya bandar Mukah iya nya semak enggau Politeknik enggau kampus Universiti Teknologi Mara (UiTM) baru. Berebak enggau tu iya bterima kasih ngagai periintah besai ti udah ngemendarka belanja sepenyampau RM133 juta dikena ngepunka projek ngaga padang bilun baru nya. Sapit Menteri Besai Tan sri Muhyiddin Yassin madahka di Mukah bulan nyin kemari, pengawa ngaga projek pasang bilun baru Mukah enda lama agi laban Opis Menteri Wang udah ngemendarka belanja RM133 juta. Manyin mega madahka tinda bejalaika renggat udah renggat keterubah iya nya tebuka. "Iya tebuka ngagai 20 kontraktor. Ngarapka kontraktor ti pemadu manah menang tinda nya," ku iya. |
| Nitih ‘Convention Chicago’ Malaysia bisi hak mansik ‘Kotak Chelum’ bilun MH370 Posted: 15 Apr 2014 04:14 PM PDT by Rengenyan Labang. Posted on April 16, 2014, Wednesday KUCHING: Menteri ba Opis Menteri Besai Nancy Shukri madah, perintah Malaysia mengkang ngembuan hak enggau tanggungpengawa ba 'Kotak Chelum' bilun nya nyema ditemu. Iya madah, nitih 'Perenggan 5.3 (13) Aircraft Accident and Incident Investigation, Convention on International Civil Aviation' tauka 'Convention Chicago', menua endur ngerijista bilun nya ngembuan tanggungpengawa bejalaika pansik. Nunda konvensyen nya dalam hal tu, reti iya Malaysia, ku iya. Bejaku baru iya madah, ari segi undang-undang, Malaysia endang bisi hak bekaul enggau 'Kotak Chelum' nyema ditemu, laban bilun Boeing 777-200 ER nya direjista di Malaysia sereta dikeempu Malaysia Airline (MAS)."Malaysia semina minta Australia ngulu tauka nyadi ketuai ngiga enggau nyelamat MH370 ba kandang endur di Selatan Lautan Hindi. "Tang tu ukai reti iya Malaysia nyerahka kuasa nya ngagai Australia, nya alai Malaysia agi bisi hak enggau tanggungpengawa ngagai 'Kotak Chelum' MH370 nyema ke ditemu," ku iya megai pekara bekaul enggau undang-undang. Nancy mansutka pekara nya dalam sebengkah aum pengarang berita, lebuh ditanya bekaul enggau sapa ti ngembuan hak enggau tanggungpengawa ngagai 'Kotak Chelum' nyema ke ditemu. Bejaku baru iya madahka endur kepenudi bilun nya nadai dikeempu sebarang bagi menua, berindik ari nya Malaysia ti nyadi menua pengerejista MH370 sereta menua ti bisi tanggungpengawa nitihka Convention Chicago endang bisi hak bejalaika pansik penusah nya sereta nyadi ketuai pemansik. Bilun MH370 mai 239 iku orang ti lenyau ari imbasan radar lebuh di di ruang udara Laut China Selatan, urung sejam pengudah terebai ari Padang Bilun Anatarabansa Kuala Lumpur kena 8 March, lalu bilun nya patut iya terengkah di Beijing pukul 6.30 pagi hari ke sama. Kena 24 March, Menteri Besai Datuk Seri Najib Tun Razak madah, ujung penerebai bilun MH370 ngetu ba Selatan Lautan Hindi. |
| Tiang pengingat kominis nya patut ditebang Posted: 15 Apr 2014 04:14 PM PDT by Judan Bungap. Posted on April 16, 2014, Wednesday Mayuh kaban PVTM nyima meda sebengkah pengawa ti ngemesaika raban penyelawai nya SIBU: Nadai kebuah tiang pengingat kominis digaga di nengeri tu udah bekau raban kominis nyengala nyadi penyelawai ba menua enggau nengeri, ku sekeda ari raban Gerempung Veteran Soldadu Nengeri Sarawak (PVTMS). Tiang kelai tu udah digaga di Kuching, Engkilili, Sri Aman, Serian, Sarikei enggau Sibu. Maya berandau enggau pengarang berita kemari, ku raban gerempung tu, komunis endang tampak ngelaban perintah nyentukka bebunuh lalu nadai penguntung enti nyaguka raban penyelawai tu. "Nama guna tiang kelai tu? Kominis endang nyengala nyadi penyelawai ba menua kitai. "Berindik ari nya, tiang pengingat tu patut ditebang," pia ku ex-Sarjan Jarop Saging. Ku iya, ulah pemesai ari Parti Sa'ati Rayat Sarawak (SUPP) enggau seiti opis ukai dikuasa perintah (NGO) nengkilung bungai laban deka meri basa ngagai kominis dulu suba di Kuching ujung bulan March tu tadi sebengkah pengawa ti enda patut nyadi. "Pengawa sida tu baka ti temegah meda kominis. Sida salah alai deka meri basa ngagai orang ti enda patut," ku iya madahka baru. Nambahka nya ku Lima Agong, penyai raban komunis jeman kachau suba mengkang dikenang iya lalu iya ngarap rebak baru diatu anang enda ingat penyai raban penyelawai tu suba. "Sida nyadi munsuh menua. Anang sekali ka ngiruh diri mantaika ulah temegah ngagai raban tu. "Enti nunda, lapa enggai meri basa ngagai bala ex-soldadu enggau raban pengentan pengelikun menua ke bukai laban raban tu udah bebendar berambun nyawa mai menua enggau rayat idup likun. "Pengelantang ke diasai kitai sehari tu endang bepun ari pemerani bala soldadu suba tang ukai sida komunis," pia ku iya madah. Nya alai ku iya, perintah anang laun mutarka pekara tu nangika rebak baru nyau saru sapa ke endang amat ngetan ke pengelikun lalu sapa ke endang mai penyarut ngagai menua tu. Ketegal nya mega, ku ex-Kapten Kong Tong Ngoh, iya berasai sinu bendar meda pengawa orang ti meri basa ngagai komunis empai lama tu tadi. "Perintah anang meda pekara tu lempung laban tu tau ngemaluka menua kitai empu. "Komunis munsuh kitai. Kami ex-soldadu mengkang ngenang penyai raban sida ngagai rayat enggau menua tu ba taun 70-an menya. "Rebak baru patut nemu sapa bagi ke tau dikemegah tang ukai penyelawai ti enggai meda pengelikun menua," ku iya mantaika penemu. Baka bala bukai, iya andal bendar tiang kelai nya ulih ditebang enggau lengkas. |
| Penyikar peranak rumah panjai nyaup nyeliah penusah angus Posted: 15 Apr 2014 04:12 PM PDT SARIKEI: Penyampat sereta penyikar peranak rumah panjai Ulu Minus udah nyeliahka rumah panjai ari penusah angus, kena lemai Hari Dua nyin kemari. Penusah nya nyadi ba sepintu ari 18 pintu Rumah Setia Unggok, urung pukul 6.30 lemai ti dipelabaka bepun ari pengilap wayar. Ku bini Tuai Rumah, Ringka Chawat, maya nya sida sebilik benung makai di dapur. Sida tekandang ba dapur laban asap ti kelalu tebal ke datai ari api ti nganguska keresa baka tilam, tirai enggau sekeda utai bukai ti ngujungka sida enda ulih ngelarika ngagai pintu ba bilik besai tauka pintu pansut ke ruai. Meda utai nya baka nya, dia sida lalu manjung minta tulung, pia ku Ringka seraya meri terima kasih ngagai orang ke diau ba sepiak bilik iya ke lalu nesau sida serumah besaup ngerara api nya. Lebuh ke benung begau nya, dia ipar iya, Bayang Unggok enggau seiku agi sida serumah Bandang Dinggai, lalu nyaup ngerara api nya ngena perengka pemadam api ke dikemisika sida, pia ku iya. Nengah pengelandik ngena perengka pengerara api, Bayang enggau Bandang lalu berumban ngerara api nya enggaika nyerarai ngagai bilik bukai, pia ku iya. Penusah nya udah ngasuh sida serumah berasai kesal ati. Peranak ari rumah panjai ke semak enggau sida iya nya Rumah Evelyne, pan bisi datai mantu mindahka barang ke alai seiku indu ke beumur urung 30 taun udah luput sereta diperumban dianjung ke Sepital Sarikei. Ku Kepala ari Stesyen Pengerara Api enggau Penyah Penusah Pelilih Mit Menua nya, Suna Kaha, sida nerima kangau pasal penusah nya pukul 6.31 lemai, ke alai seraban 6 iku pengerara api enggau sebuah kerita pengerara api diperumban ngesah penusah nya. Lebuh ke datai din urung 22 udah nya, api udah mujur dipadam, pia ku iya. Iya muji peranak rumah panjai nya laban ke landik sereta sikar ngeraraka api nya. Ku iya, nengah program pelajar enggau penemu kena nyeliahka penusah angus sereta licha enggau latih ngerara api ti dipejalaika Stesyen Pengerara Api,udah nyadika bekal peranak rumah panjai nya kena ngerara api. |
| ‘Klinik Pusaka Bergerak’ dikearap ulih muka runding rayat ba pemesai reti reta tengkira: Nancy Posted: 15 Apr 2014 04:12 PM PDT by Rengenyan Labang. Posted on April 16, 2014, Wednesday KUCHING: Program 'Klinik Pusaka Bergerak' deka ditumbuh tauka diberikelala di serata nengeri Sarawak ngambika rayat meretika pemesai guna Pengurusan Perwarisan, ku Chairman Amanah Raya Berhad, Datuk Sri Reezal Merican Naina Merican. Iya madah, program nya sebengkah inisiatif AmanahRaya betemu enggau rayat di nengeri tu sereta nerangka pekara bekaul enggau Pengurusan Perwarisan, ti deka dipejalaika enda lama agi. Naka ke diatu pampang opis tu semina bisi di Kuching, tang Sarawak tu kelalu besai lalu udah tentu begunaka mayuh agi AmanahRaya, ku iya. "Nya alai, keterubah iya kami deka bejalaika program 'Klinik Pusaka Bergerak' sebengkah program betemu enggau 'pelanggan', ke diatu agi dikerandau lalu deka dipejalaika bererenggat di serata mengeri ti ukai semina ba Kuching tang nyerangkung Sibu, Bintulu sereta kandang menua pesisir. "'Pengurusan pusaka' tu amat beguna sereta sebengkah ari produk, nya alai kami deka chakah meri penerang ngagai rayat pemanah ngatur pesaka ba AmanahRaya. "Mayuh orang ti nadai ti enda ngatur manah reta pesaka, pengujung bisi bechiping lalu ti kena pangka ari penanggul nya tebal agi raban orang indu," ku iya. Reezal mansutka pekara nya dalam aum pengarang berita pengudah pengerami bejadika opis baru AmanahRaya Pampang Sarawak, di Jalan Kulas ditu, pagi kemari. Opis baru nya dipenyadika Menteri ba Opis Menteri Besai Nancy Shukry. Dalam aum pengarang berita, Reezal arap bendar dalam timpuh setaun AmanahRaya udah dikerembaika di serata nengeri ti bekaul enggau servis sereta mutarka penanggul bekaul enggau ngatur pesaka. Nambahka nya iya madahka AmanahRaya deka nempa kerejasama enggau mayuh ejensi sereta instituti kewangan ti ulih mantu ngerembaika produk enggau servis AmanahRaya ngagai raban bansa. "Kami dalam perambu ngatur sempekat pemereti ati (MoU) enggau organisasi ti senipak ngerembaika produk enggau servis AmanahRaya, ambika banding enggau sida bank sereta, laban bank ngembuan pampang ti mayuh nyengkaum ba pelilih menua mit. "Nengah ejensi nya orang mayuh enda ibuh datai ngagai opis kami di Kuching," ku iya seraya madahka AmanahRaya mega melaba deka nempa kerejasama enggau Pos Malaysia. Ngenang sejarah Reezal madahka, Amanah Raya Berhad Pampang Sarawak sebedau tu ngena nama Jabatan Pemegang Amanah Raya ti ditumbuhka 1 Mac 1966. Pengudah dikorporat taun 1995, Amanah Raya Pampang Sarawak pindah ngagai Wisama Seberkas ti bejalaika pengawa ba endur nya urung sepuluh taun sebedau pindah ngagai Bangunan Kueh Hock Kui 1 April 2005. "Ketegal ti deka meri pengelantang ngagai rayat, piak pengatur AmanahRaya ngemutus pindah ngagai palan baru dikena ngangkatka agi peluang dagang. Diatu kami pindah ngagai palan baru ti lebih kondusif sereta perengka pengakut ti lebih manah," ku iya dalam jaku pengelalu madahka ba opis nya naka ke diatu semina bisi liam iku pengereja pengawa. Bisi ngulu pengerami nya kemari Ketuai AmanahRaya Pampang Sarawak Saftuyah Adenan, Menteri Muda Pemansang Pengawa Berumah Datuk Abdul Karim Rahman Hamzah, Kaban Kunsil Nengeri (ADUN) Lingga Simoi Peri enggau ke bukai. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |