» »Unlabelled » Anang semina landik ngelobi projek, ku Nancy BorneoPost Online | Borneo , Malaysia, Sarawak Daily News » Berita Iban - New 2 Borneo

05:02:00

Anang semina landik ngelobi projek, ku Nancy BorneoPost Online | Borneo , Malaysia, Sarawak Daily News » Berita Iban - New 2 Borneo

Anang semina landik ngelobi projek, ku Nancy

Posted: 19 Apr 2014 09:19 AM PDT

by Rengenyan Labang. Posted on April 20, 2014, Sunday

Konteriktor mega patut bebendar ngereja pengawa ngambika atur pemansang nya nguntung ke rayat

KUCHING: Raban konteriktor ke dipilih bejalaika projek perintah enda patut semina landik ngelobi projek tang deka bebendar ngereja pengawa ke penguntung rayat.

Menteri ba Opis Menteri Besai, Nancy Shukri madah, dikena nyeliahka perintah dituduh rayat nadai meri sereta enda mujur bejalaika atur pemansang.

Tang ku iya, piak konteriktor ke dipilih nya patut bekerejasama enggau perintah nembuka projek enggau manah, ngambika nadai projek betangguh sereta enda ngunusah rayat.

"Anang semina deka minta ngelobi projek aja enti enda bebendar bejalaika projek nya, sinu ke mensia mayuh ke deka ngasaika penguntung ari projek nya.

"Aku ngarapka sesapa ke diberi tauka diasuh bejalaika projek perintah patut ngereja enggau manah sereta bebendar ngambika rayat enda nyalah perintah semina nemu meri projek tang enda mujur.

"Laban perintah endang udah meri ungkup belanja dikena bejalaika projek nya, ti meri penguntung ngagai rayat," ku iya.

Nancy mansutka pekara nya lebuh dikerandau raban pemberita ba sebengkah aum pengarang berita ditu kemari.

Berindik ari nya, lebuh ditanya bekaul enggau penanggul ai ke nuntung peranak di Sadong Jaya, iya madah, diatu semina dua buah genturung pendiau ke betapi enggau nadai bekal ai beresi.

Ku iya, nya bepenanggul beduduk ari batang paip ti udah kelalu lama sereta udah jai, ke diperambu deka diganti tauka digaga ba taun 2005 lalu bedau tembu beduduk ari ti suah betangguh laban konteriktor ke dipilih bisi penanggul.

Iya madah, pemayuh tubuh mensia sereta ruang bilik ti udah nambah di kandang menua Batang Sadong bepun ari pemayuh kebun kelapa sawit mega ketegal peranak betapi penanggul ai.

Diatu kami udah ngaga baru lalu tangki ai benung digaga dikena mutar penanggul nadai ai, ku iya.

"Kandang endur ke endang nadai bekal ai beresi iya nya Genturung Pendiau Ensengei Iban enggau Kampung Ensengei Melayu. Taja pan batang paip udah datai ba genturung pendiau nya tang ai bedau laban tangki bedau tembu.

"Sebedau tu tangki nya udah digaga tang ketegal bisi penanggul (konteriktor) nya berengkah ari pun baru, nya kebuah lalu bedau tembu.

"Perintah ngemutuska ngaga tangki nya ngambika peneras ai lebih laju enggau manah," ku iya melaba penembu projek nya ulih mungkur guna lebih 50,000 iku mensia.

Bejaku baru Nancy madah, perintah mega minta bantu gerempung korporat mutarka penanggul nadai ai di Genturung Pendiau Ensengei Iban enggau Kampung Ensengei Melayu.

"Nyema ke bisi kandang endur ke besai entara dua buah genturung pendiau nya kitai deka numbak tanah, nya sebengkah chara dikena mutarka jampat penanggul ai di Sadong Jaya lebih agi Genturung Pendiau Ensengei Iban enggau Kampung Ensengei Melayu," ku iya.

Kelimpah ari nya Nancy madah, projek bekal ai beresi menua pesisir (BALB) ari Tembirat ke Asajaya enggau Sadong Jaya renggat kedua diatu udah manggai 70 peratus tembu.

"Projek nya dipelaba ulih tembu ujung taun tu," ku iya seraya madah, perintah udah meri 26 tangki penapis ai Life Saver ngagai Sadong Jaya dikena betapi penanggul suntuk ai maya musim kemarau.

Print Friendly

Pendam niang Kanang enda ngipakka Gelar

Posted: 19 Apr 2014 09:18 AM PDT

by Chris Bishop. Posted on April 20, 2014, Sunday

PVTMS sinu meda palan endur numbakka niang Bujang Berani nya enda dikeibuhka

PADAWAN: Lebih setaun pemidang Datuk Temenggung Kanang anak Langkau, kubur niang di Pendam Bujang Berani, Jalai Budaya Kuching mengkang baka pendiau asal lalu enda ngipakka gelar Bujang Berani ti diulih iya.

Bela rawan enggau gaya pendiau kubur penerima midul Seri Pahlawan Gagah Perkasa (SP) enggau Pingat Gagah Berani (PGB) nya, Serakup Soldadu Veteran Malaysia pampang Sarawak (PVTMS) minta perintah sereta ejensi ke bekaul beratika pekara nya enggau berat.

Nitih penerang Presiden PVTMS, Thomas Ling Kui Eng, serakup tu deka nulis surat ngagai Opis Menteri Besai sereta Opis Kepala Menteri minta pendiau Pendam Bujang Berani dikemanah nitihka pematut setikas enggau Tugu Negara di Kuala Lumpur.

"PVTMS ngemerat pendiau Pendam Bujang Berani di Jalai Budaya Kuching lebih agi kubur niang Kanang.

"Pengudah macha ba The Borneo Post ke alai kubur niang Kanang mengkang baka ke suba pengudah lebih setaun iya dikubur, sehari nya (8 April) aku lalu ngelawa kubur nya sereta ngambi sekeda gambar.

"Rawan sereta sinu, nya meh asai ati pengudah meda kubur Bujang Berani kitai menua ti enda dikeibuh. Nama pemati enda ditulis ba kubur nya, aku pechaya indah kubur orang ti nadai benama di menua pesisir manah agi ari nya," ku iya.

Thomas mansutka jaku tu lebuh dikerandau Utusan Borneo pengudah bejadika PVTMS Biro RPR Landeh, Padawan ditu kemari.

Thomas nambah, PVTMS deka minta enda kurang ari RM300,000 ke alai belanja nya deka dikena ngangkatka pemanah kubur niang Kanang sereta ngaga Tugu Bujang Berani kelimpah ngemanah kandang endur ngelingi.

Iya ngasai perintah besai patut megai tanggungpengawa ngintu Pendam Bujang Berani ketegal semua orang ke dikubur ba pendam nya udah sanggup berambunka nyawa ngintu pemaik menua Malaysia.

"Belanja RM300,000 dipinta ngambika chukup dikena ngintu Pendam Bujang Berani sereta ngaga Tugu Bujang Berani. Enti belanja ari perintah besai enda chukup aku melaba perintah nengeri ulih nyaup nambah.

"Tugu Negara di Kuala Lumpur digaga nengah belanja RM1.3 juta lalu aku pechaya belanja ke dipinta ungkup Pendam Bujang Berani ulih diberi," ku iya.

Kelimpah ari kubur niang Kanang, Thomas mega enda lantang ati enggau gaya pendiau kubur niang ASP Micheal Padil ke midang di Semporna Sabah ngelaban keruga munsuh penyelawai Suluk.

Iya madah deka ngenataika pekara nya ngagai Menteri Dalam Menua Dato Seri Dr. Ahmad Zahid Hamidi ngambika diperunding.

Bujang Berani Menua ke tebilang, Kanang, 68, midang kenaka 3 Januari 2013 urung pukul 1:45 pagi pengudah luput di rumah iya.

Kanang seiku peranak Sarawak ti dikemegah serata menua ketegal pemerani ngelaban keruga munsuh kominis maya ke agi meri servis ba Soldadu Darat Malaysia (ATM) ari taun 1962 nyentuk 1983.

Print Friendly

Anang enggai ngaul opis tauka ejensi perintah

Posted: 19 Apr 2014 09:17 AM PDT

by Judan Bungap. Posted on April 20, 2014, Sunday

Peminta pemansang deka muntang agi diungkup ngagai rumah panjai, ku Salang

SIBU: Bala tuai rumah dilalau ngambi semampai ngenyemakka diri enggau raban opis tauka ejensi perintah.

Chairman Penyanding Penemu 1Malaysia Sarawak (1MSAC) Datuk Joseph Salang Gandum madah, pekara nya tau mantu sida ngenataika peminta rumah panjai enggau lantang agi.

"Kita ke nyadi tuai rumah anang enggai ngaul sereta begulai enggau raban opis tauka ejensi perintah.

"Giga awak berandau enggau sida ngambika kita nemu bengkah bantu ke disedia perintah sereta kaul pekara ke bukai," pia ku iya maya ngulu pengawa ngerami Tuai Rumah Simon Ason ke nganti apai iya nyadi tuai rumah baru.

Pengerami nya diatur ba Rumah Simon panjai 79 pintu ba Ulu Salim ditu kena hari Tiga tu tadi.

Salang ti mega Kaban Parlimen Julau ngelalau bala tuai rumah ngambika suah berandau enggau peranak rumah panjai diri empu bekaul enggau chara baka ni deka ngemansangka menua diri empu.

"Kebuah pia ngambika kitai bela ngenataika penemu diri," ku iya nerang.

Maya tu mega iya andal Tuai Rumah Simon ulih bejalaika tanggungpengawa enggau manah.

Dulu agi ari nya, Tuai Rumah Simon ba jaku iya madah deka gawa bebendar dikena ngemansangka rumah panjai sida.

Ku iya, iya randaka sukung ari sida serumah megai penuduk baru nya.

Pengawa sehari nya bela digulu Seketari Politik ngagai Menteri ba Opis Kepala Menteri ti mega Kaban Parlimen Selangau Chumang Nyambong enggau ex-Tuai Rumah Ason.

Print Friendly

Kereban nginti dalam perau, pengempu enda temu tunga

Posted: 19 Apr 2014 09:17 AM PDT

SIBU: Seiku lelaki dipelabaka lenyau pengudah nurun nginti enda jauh ari pantai Belawai, kilah ensana.

Dulu ari nya Osman Poasa, 36, enggau beberapa iku bala bukai mupuk nginti ari Kampung Grigat, Roban, Saratok kira pukul 5 pagi.

Iya ti ngena perau kediri nadai dipeda agi kira pukul 1 lemai tang kereban iya nginti mengkang dalam perau ke dikena iya.

Opis Penyah Penusah enggau Pengerara Api (Bomba) Sungai Merah enggau Saratok ke disempulang empat iku raban ti betuai PBKII Mijan Pamin datai ba palan penusah kira pukul 4 lemai.

Nyentuk berita tu ditulis Osman mengkang empai ditemu.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

SJK(C) Ming Tee begelar champian Pekit Bola Baling MSSD Meradong

Posted: 19 Apr 2014 09:16 AM PDT

BINTANGOR: SJK(C) Ming Tee kategori lelaki mujur ngempu gelar champian ba Pekit Bola Baling 12 Taun ke baruh Majlis Sukan Sekolah Daerah (MSSD) Meradong, lemai ensana.

Dulu agi ari nya, ba pekit ke penudi, sekula tu mujur ngalahka Sekolah Kebangsaan (SK) Ulu Strass enggau gol 7-4.

Penuduk lumur tiga ba kategori tu mandangka SK Sungai Sian ngalahka SK Tulai enggau gol 10-5.

Ba kategori indu, sekali agi SJK(C) Ming Tee dipadu nyadi champian sepengudah menang ba penalti 3-2 ngalahka SK Bukit Nibong ti sebedau nya seri 2-2.

Penuduk lumur tiga diempu SK Ulu Strass sepengudah menang ba penalti 1-0 ngalahka SK Tulai.

Sebedau nya, dua bengkah tim tu seri 3-3.

Pekit serak tu digulu SK Tulai, SJK(C) Ming Tee, SK Ulu Strass, SK Sungai Sian, SK Bukit Nibong enggau SK Ulu Binantang.

Perais ungkup sekula ke menang disua pengari Opis Pelajar Pelilih (PPD) Meradong Nasaruddin Ibrahim.

Bela bisi datai ngulu pengerami nyuaka perais iya nya Kepala Pengajar SK Tulai ti mega chairman komiti pekit Kuah Rames.

Pekit serak tu diatur begulai SK Tulai enggau PPD Meradong.

Print Friendly

PVTMS merambu minta mayuh veteran dilatih nyadi ketuai raban bansa

Posted: 19 Apr 2014 09:15 AM PDT

by Chris Bishop. Posted on April 20, 2014, Sunday

KUCHING: Serakup Soldadu Veteran Malaysia Nengeri Sarawak (PVTMS) deka ngenataika perambu ngagai Opis Kaunsil Kandang Menua (PBT) ngambika nyiri mayuh agi veteran soldadu ke bepeneleba nyadi ketuai raban bansa.

Presiden PVTMS Thomas Ling Kui Eng madah perambu nya deka nentuka pengelandik enggau penau sekeda raban veteran soldadu ulih dipekunsi enggau komuniti kelimpah ari ti ngenanka sida ba servis perintah.

"Aku deka ngenataika perambu tu ngagai Datuk Seri Wong Soon Koh ke nguasa PBT. PVTMS merambu raban veteran soldadu ke bepeneleba dichiri mangku pengawa ba opis perintah baka nyadi kaunsilor, ketuai pupu bansa nyengkaum nyadi kaban direktor ba ejensi perintah," ku iya.

Thomas mansutka jaku tu ba pengerami bejadika PVTMS Biro RPR landeh, Kota Padawan ditu kemari.

Iya nambah, bedau lama tu tadi serakup tu udah mujur ngangkatka seiku veteran soldadu di pelilih Sibu mangku pengawa nyadi kaunsilor ke alai pengawa ngangkatka sekeda ke bukai benung diperunding.

Berindik ari nya, ungkup pemaik enggau pemansang PVTMS, Thomas ngansak mayuh agi veteran soldadu ngerijista nyadi kaban dalam serakup.

"Mayuh agi tubuh kitai dalam serakup, kering agi nyawa kitai didinga raban ketuai, menteri enggau perintah.

"Kitai pechaya pemayuh tubuh deka nentuka pengering enggau penegap serakup," ku iya.

Ba pengawa nya kemari, Thomas bisi nerima lebih 70 pom masuk nyadi kaban serakup PVTMS ari Biro RPR Landeh ke disua ketuai Biro Terin anak Gasing.

Awak begulai enggau kaban PVTMS Biro RPR Landeh kemari mega dikena Thomas nerangka sekeda tuju sereta pengawa ke udah dikereja serakup ngelamatu.

Ku Thomas, PVTMS angkun nentuka pemaik enggau pengelantang pendiau veteran soldadu diintu manah ke alai kerejasama begulai enggau serakup bukai ke bekaul lebih agi JHEV deka dikemerat.

Ba pengerami nya mega, Thomas bisi nyuaka bantu ngagai dua iku veteran soldadu ti enda dapat bejalai iya nya kaunsilor Jambu anak Ganing enggau Kasim anak Rabong.

Bela datai, sapit Ketuai PVTMS Pelilih Kuching Nelson Hanif Abdullah.

Print Friendly