» »Unlabelled » Raban beuniform ngembuan pemanah disiplin BorneoPost Online | Borneo , Malaysia, Sarawak Daily News » Berita Iban - New 2 Borneo

05:02:00

Raban beuniform ngembuan pemanah disiplin BorneoPost Online | Borneo , Malaysia, Sarawak Daily News » Berita Iban - New 2 Borneo

Raban beuniform ngembuan pemanah disiplin

Posted: 26 Apr 2014 09:17 AM PDT

by Rengenyan Labang. Posted on April 27, 2014, Sunday

Sida mega suah ke chunto nembiak bukai berindik ari pengelandik nyeliah penyalah: Chai

KUCHING: Raban beuniform ti ngemeratka dispilin ulih nempa pemanah ulah nembiak sereta nyadi chunto nembiak bukai, kelimpah ari ti dikena nyeliahka nembiak ari penyalah rama.

Ketua Jabatan Pengurusan Kontigen Sarawak, SAC Datuk Dr. Chai Khin Chung madah, pemayuh raban beuniform lebih agi Kor Kadet Polis Sarawak ngayanka sukung enggau pemansang ti manah ba pengawa nempa pemanah ulah nembiak sekula.

"Dalam timpuh 44 taun kenyau ditumbuh, penyampau kaban Kor Kadet Polis Kontijen Sarawak majak nambah, naka ke diatu sepenyampau 9,870 iku kaban nengah penyereta 282 platun ari 141 buah sekula sekondari. Penyampau nya chukup dikemegah laban nya mandangka pengerindu nembiak masuk serakup uniform Polis Diraja Malaysia (PDRM).

"Aku arap bendar polisi Opis Menteri Pelajar sereta sukung Opis Pelajar Nengeri Sarawak ti meransang nembiak masuk kokurikulum baka tu ulih ngenegapka displin nembiak renggat sekula sekondari endang inisiatif ti manah.

"Disiplin tauka ulah ti manah nya amat beguna ke penyulut enggau pemujur jemah ila laban orang ti bisi disiplin deka taluk ke atur sereta enda melakangka undang-undang menua," ku iya.

Chai mansutka pekara nya lebuh bejadika 'Majlis Penangguhan Perkhemahan Kor Kadet Polis Peringkat Negeri Sarawak 2014' ti diatur ba PULAPOL Kuching, Jalai Puncak Borneo ditu, pagi kemari.

Nambahka nya, jaku pesan Ketuai Polis Menua Malaysia ti dibacha Chai madahka kaban Kor Kadet Polis ulih nyadi ejen polis ba pengawa nagang enggau munaska penyalah ngelaban undang-undang.

"Dikena napi penaggul di sekula, aku meda kaban Kor Kadet Polis ulih nyadi pemeri penerang ngagai PDRM sereta ulih mantu ngelala bagi bakih ti 'bepenanggul' sereta ngeripot ngagai piak sekula dikena nyeliahka pekara ti enda manah nyadi.

Chai ngenang atur program kemari madahka Perkhemahan Kor Kadet Polis diatur ninting taun enggau juluk deka nempa tiap iku kaban Kor Kadet Polis nyadi orang ti ngembuan tanggungpengawa, nadai bechiping sereta taluk nengah mayuh macham aktiviti baka latih kawat, bejalai lasak, nimbak, 'ikhtiar hidup' sereta 'rentas halangan'.

Taun tu renggat Sarawak, Perkhemahan Kor Kadet Polis diatur lima hari di PULAPOL Kuching.

"Taun tu bisi 300 iku kaban kor kadet enggau 36 iku pengajar kor kadet ti ngarika 11 pelilih mit menua di nengeri Sarawak udah ngambi bagi dalam Perkhemahan Kor Kadet Polis Renggat Nengeri Sarawak.

"Latih ke diberi tu mega dikena nyikap penegap raban ti ngarika Kor Kadet Polis Sarawak ba pekit renggat menua ila," ku iya.

Kor Kadet Polis ti menang ba pekit Perkhemahan 2014 iya nya Kor Kadet Polis Kota Samarahan.

Kor Kadet Polis Miri teulihka lumur satu ba pekit kawat kaki beraban, lalu diatngkanka Kor Kadet Polis Kota Samarahan enggau Kor Kadet Polis Limbang teulihka lumur tiga.

Alexander Lungan Unyat ari Kor Kadet Polis Kapit dipilih nyadi Kor Kadet Polis Terbaik 2014 lelaki, lalu Nur Atiqah ari Kor Kadet Polis Kota Samarahan dipilih nyadi Kor Kadet Polis Terbaik 2014 indu.

Bisi datai ba pengerami nya kemari, Ketuai Polis Pelilih Mit Kuching, ACP Roslan Bek enggau Pegawai Pelajar Pelilih Mit Kuching Dr. Sluhi Lamat sereta ke bukai.

Print Friendly

Perintah merambu nyendiaka penyikap ungkup industri kotej

Posted: 26 Apr 2014 09:16 AM PDT

by Chris Bishop. Posted on April 27, 2014, Sunday

KUCHING: Perintah merambu mantu sereta nyendiaka infrastruktur ngagai orang dagang ti ngaul diri ba industri kotej, iya nya industri ti bejalaika pengawa nyendiaka produk dagang di rumah.

Menteri Kereja Raya Datuk Fadillah Yusuf madah, pekara nya diperatika chukup berat ketegal mengkang mayuh orang dagang di Sarawak agi bedagang sereta mega nyendiaka produk dagang sida di rumah.

"Pansik senentang konsep enggau palan ke engkeman endur nyendiaka infrastruktur bantu benung dipejalai.

"Nengah atur tu, kitai pechaya dagang orang ti ngaul diri ba industri kotej ulih diangkat ngagai tikas ke manah agi.

"Tu meh pemar ke ditapi ba kandang mengeri, kitai enda nagang sida ngaul diri ba industri cottage ke alai perintah nemu dia mengkang mayuh orang dagang ngaul diri ba industri tu lalu perintah keran deka mantu sida," ku iya.

Fadillah mansutka jaku tu ba pengerami bejadi Pesta Medan Niaga (Satok) 2014 ke berengkah 24 nyentuk 27 April ditu, kemari.

Iya nambah, Industri kotej tu patut dibantu ketegal pengawa nyendiaka produk di rumah tau ngeruga pengelikun ruang bilik diri sereta mega orang ke diau besemak.

Ku iya, ambika chunto enti industri nya bekena tung gis, pengawa tu tau bendar ngeruga pengelikun diri sereta ruang bilik bukai.

Ba kaul ke sama, Fadillah ke mega Kaban Parlimen Petra Jaya pechaya Medan Niaga Satok deka ditapat enda kurang ari 5,000 iku mensia tiap ujung minggu berengkah ba taun 2015 ila.

"Agih belanja tambah penyampau RM13.4 juta ti diberi Sapit Menteri Besai ba penemuai iya taun 2013 suba deka nentuka Medan Niaga Satok disikap enggau semua perengka guna.

"Nengah duit agih tambah nya, palan bedaja tebuka ke diatu deka digaga perabung nengah ungkus RM 7 juta ke alai pengawa deka dipun enda lama agi," ku iya.

Tembu ila, Medan Niaga Satok deka nyadi sebengkah agi palan pematak temuai kandang sitak Parlimen Petra Jaya, tandu iya.

Ketegal nya, iya ngansak orang dagang di palan nya nyendiaka serbis ke manah sereta nitihka stindit pemeresi ti udah ditetap.

"Enggau semua perengka guna ke disedia, kitai ngarap orang dagang ulih meri servis ke manah, nyual utai ke bekualiti nengah rega ke patut," ku iya.

Bela datai Menteri Muda ba Opis Kepala Menteri (Pemansang Orang Dagang Bumiputera) Datuk Mohd Naroden Majais, Chairman FAMA Tan Sri Dato Paduka Badruddin Amiruldin, ADUN Samariang Sharifah Hasidah sereta mensia mayuh.

Print Friendly

RM70,000 diungkup ngagai 22 JKKK di Pulau Bruit

Posted: 26 Apr 2014 09:16 AM PDT

SIBU: Kaban Kunsil Nengeri Semop, Abdullah Saidol udah nyuaka ungkup belanja Projek Mit Pemansang Menua Pesisir (MRP) RM70,000 ngagai Komiti Pemansang enggau Pengelikun Genturung Pendiau (JKKK) ari 22 buah rumah panjai di Pulau Bruit.

Semua 22 buah rumah panjai ba kandang menua ari Sungai Mupong nyentuk ke Muara Semaring dalam sitak Semop.

Abdullah ke mega Ketuai Sekreteri Politik Kepala Menteri nyuaka geran nya ngagai tujuh buah rumah panjai ba kandang menua Mupong Muara baka Rh Bap, Rh Gawai, Rh Suku, Rh Sulong, Rh Jam, Rh Michael Utik enggau Rh Minggat ke alai atur pengawa nya diatur ba Rh Bap.

Nangkanka nya, iya mega nyuaka geran MRP ngagai enam buah JKKK ari nanga Semaring baka Rumah Gauwing, Rh Libau, Rh Anyut, Rh Pagan, Rh Kite enggau Rh Utik.

Dulu agi ari nya, iya nyuaka geran ngagai semilan buah JKKK ari kandang menua Mupong Tengah baka Rh Preddy, Rh Adin, Rh Umboh, Rh Jamie, Rh Seli, Rh Amil, Rh Impa, Rh Udin enggau Rh Endit.

Lebuh ke nemuai seraya nyuaka geran, Abdullah disempulang bala Tuai Rumah, ketuai raban bansa enggau penyukung ba kandang menua nya.

Print Friendly

FORUM tunjing pemansang bansa Orang Ulu

Posted: 26 Apr 2014 09:15 AM PDT

MIRI: Gempung Serakup Orang Ulu Sarawak Malaysia (FORUM) patut bejalaika tanggungpengawa mai mayuh agi pemansang ngagai menua pesisir.

Sapit Sekretari Nengeri Datuk Ose Murang madah, semua serakup patut seati kena ngelai pemujur sida ngagai raban bansa Orang Ulu.

"Semua (semilan) bengkah serakup dalam FORUM ti ngarika Orang Ulu patut begempung mai pemansang sereta pemaik ngagai komuniti," pia ku iya lebuh bejadika Aum Besai Pengari Dua Taun Sekali 2014 FORUM, ba sebuah hotel ditu.

Ku iya, manah agi FORUM ngemeratka pengawa merambu pemansang lebih agi ungkup Pasar Baru Telang Usan ba kandang menua Baram.

"Kitai (FORUM) mandangka diri mujur enggau raban bansa kitai ngambika sida bisi pengarap sereta pengandal ati ke kitai," pia ku iya.

Transformasyen ba pemansang lebih ba Orang Ulu nya beguna amat laban pekara nya deka bekaul enggau semua sukut pengidup raban bansa nya.

Lebuh ke ngenang sentang penemuai bala ketuai raban bansa nya ke nemuai ngagai tekad ai di China apin lama ke udah, iya madahka penemuai nya mujur.

"Aku pechaya, enti Tekat Ai Hidroelektrik Baram udah digaga ila, nya deka mai ubah ngagai rampa menua ba Kedaya-Telang Usan," ku iya.

Sama bisi ngulu pengerami nya Kaban Kunsil Nengeri Telang Usan Dennis Ngau Jok, Senator Lihan Jok, Chairman FORUM Gerawat Jala, Residen Miri Antonio Kahti Galis, Temenggung Datuk Hasan Sui enggau bala ketuai serakup dalam FORUM.

Print Friendly

Penanggul projek RES deka diputar: Nyalau

Posted: 26 Apr 2014 09:14 AM PDT

Kelimpah ari nya, penembu Loji Meresi Ai Lubok Antu, peranak menua deka ngasai pengelantang

ENGKILILI: Kaban Parlimen (MP) Lubok Antu, William Nyalau Badak madah, penanggul projek Nyambung Karan Ke Menua Pesisir (RES) ti diketuka ba sekeda rumah panjai ditu udah dikenataika ngagai opis menteri ke bekaul.

Ku Nyalau, raban ari opis menteri nya deka nurun sereta meda kediri empu projek RES ti diketuka ba sekeda rumah panjai ba kandang menua Lubok Antu.

Ku iya, penanggul nya bepun ari ulah kunteriktor ti dikearap bejalaika pengawa.

"Aku pechaya penanggul tu ulih diputarka opis menteri ke bekaul enti sida empu udah datai kitu sereta meda penanggul nya ila," ku iya.

Iya bejaku munyi tu lebuh bejadika Pengerami Merarau 2014 ke diatur ba Dewan SK San Semanju dalam kandang menua Lubok Antu, ditu kemari.

Kelimpah ari nya, Nyalau mega madah pengawa mekalka ai beresi ngagai lapan buah rumah panjai tauka genturung  pendiau sereta mega Sekula Primari (SK) San Semanju di Lubok Antu, benung dipejalai diatu.

Palan pemeresi ai ke baru ti beungkus RM49 miliun ba Wong Entungan di Jalai Batu Kaya ditu udah berengkah dikena. Nya alai nadai penanggul ba pengawa mekalka ai beresi ngagai rumah panjai nya, ku iya.

"Bisi 20,000 iku peranak menua Lubok Antu deka ngasaika pengelantang enti pengawa mekal ai beresi nyengkaum ba lapan buah rumah panjai tauka genturung pendiau nya udah tembu dipejalaika ila," pia ku iya.

Loji Meresi Ai Lubok Antu ke baru nya ulih mekalka 7.5 miliun liter ai sehari (MLD) enti dibanding enggau Loji Meresi Air di Sungai Lemanak ke semina ulih mekal 3.0 MLD aja.

"Aku arapka loji baru tu ulih ngelantangka peranak Lubok Antu setipak enggau pengingin kami ke deka meri perengkaguna ngagai rayat, enda ngira bansa, jalai pengarap enggau penemu ba politik," pia ku iya.

Beserimbai enggau nya, Nyalau lalu ngungkupka belanja Projek Mit Pemansang Menua Pesisir (MRP) RM5,000 ngagai Serakup Apai Indai enggau Pengajar (PIBG) SK San Semanju.

Bela bisi ngulu pengerami nya, Kaban Kunsil Nengeri (ADUN) Engkilili, Dr Johnnical Rayong Ngipa, Kepala Pengajar SK San Semanju, Insam Meliam, chairman PIBG SK San Semanju, Nyalau Gawan enggau bala ketuai raban bansa bukai ke bisi ba kandang menua nya.

Print Friendly

Anang milih maya, rayat patut nyukung perintah BN, ku Mawan

Posted: 26 Apr 2014 09:13 AM PDT

PAKAN: Rayat patut semampai mandangka sukung ngagai perintah Barisan Nasional (BN).

Ukai pematut enti rayat semina mandangka sukung ngagai perintah BN lebuh maya ke lantang aja, tang ngenyauhka diri lebuh ke betapi enggau penanggul.

Menteri Pemansang Rama, Tan Sri William Mawan Ikom madah, rayat anang nyukung perintah BN nengah chara bemusin, ke alai sida mandangka sukung enti perintah bisi meri projek tauka program pemansang enggau sekeda utai bukai.

"Rayat patut nentuka perintah BN semampai bejalaika program pemansang ke dikena nyungkak tikas pengidup sida. Nya semina senentang maya nyuaka aja," ku Mawan bejaku ba pengerami nasih tanah endur ngaga Rumah Kintan Lian di Sungai Sugai, Batu 4 Jalai Pakan/Engkamop ditu kena hari Lima nyin tadi.

Ku iya, projek tauka bantu bukai deka diberi enggau lengkas, bisi sekeda bagi nya ari baruh kategori pemansang perengkaguna ti beguna timpuh ke lama endur dipejalai laban begunaka belanja ke besai, ku iya.

Bechuntoka pengawa ngemanah jalai Pakan/Engkamop, Mawan ke mega Kaban Kunsil Nengeri Pakan madah, ungkus ti udah dikemendar kena ngemanah sereta melakin jalai nya RM90 miliun lalu RM60 miliun agi dikemendar kena negmanahka projek ai beresi.

Penyerakup ba peranak rumah panjai nya beguna amat kena numbuhka sesebuah rumah panjai. Mawan arapka sida ngemeranka pekara nya ba pengidup ninting hari ngambika kaul sida semampai tegap belama.

Enti enda pia, enggaika pengawa ngaga rumah panjai nya puntan berindik ari ulah sekeda peranak rumah panjai ke matak diri ti ngujungka rumah panjai nya enda tembu digaga, lalu pekara ke baka tau ngamahka nama rumah panjai nya, ku Mawan.

Sapit Residen Sarikei (Bagi Pemansang), Alex Liau ke sama bela bisi bejaku ba pengerami nya ngenataika pengaga ati iya ngagai peranak Rumah Kintan laban ke udah mujur ngatur pengawa nasih tanah endur ngaga rumah panjai baru.

Ku iya, pengawa ngaga rumah panjai baru nya mega deka nyadika peransang sida nyungkak penatai pemisi ngambika sida chakah agi gawa sereta ulih ngasaika diau ba rumah ke meruan sereta tikas pengidup ke bekualiti agi.

Iya mega ngelalau peranak rumah panjai nya berakup belama sereta ngedutka kaul enggau perintah.

Nyempulang pengerami nya mega, Opis JASA nguna awak nya nyuaka Bantu Rayat nengah program (Membara) sereta ngatur pengawa beripai.

Seraban 21 iku orang tuai ari kandang menua Sungai Sugai ke dipilih udah nerima bantu pemakai nengah program nya.

Bela bisi ngulu pengerami nya DO Pakan,Inting Nyamie, Pemesai Koordinator JASA ungkup sitak Parlimen Julau, Sylvester Embuas enggau Pemancha Mambu Ikom.

Print Friendly