» »Unlabelled » ADUN Telang Usan enggai ningga kelikuh Khalid BorneoPost Online | Borneo , Malaysia, Sarawak Daily News » Berita Iban - New 2 Borneo

05:04:00

ADUN Telang Usan enggai ningga kelikuh Khalid BorneoPost Online | Borneo , Malaysia, Sarawak Daily News » Berita Iban - New 2 Borneo

ADUN Telang Usan enggai ningga kelikuh Khalid

Posted: 03 Apr 2014 09:03 AM PDT

Nadai kebuah Perintah PR Selangor ngelempaika kuasa ba Perintah Besai, JAIS ari baruh bidang kuasa sida

MIRI: Kaban Kunsil Nengeri (ADUN) Telung Usan, Dennis Ngau ngutuk penemu Menteri Besai Selangor Tan Sri Khalid Ibrahim ketegal bekelikuhka pematut tanggungpengawa ngelepaska Bup Kudus ngena jalai sengaja nguing sereta ngelempaika kuasa ba Perintah Besai.

Pengawa ngerampas Bup Kudus ari Gerempung Bup Kudus Malaysia (BSM) ti dikereja Opis Agama Islam Selangor (JAIS), di baruh perintah Selangor, balat ngasuh raban Keristin di menua tu enggau serata dunya ringat berindik ari kelikuh Khalid ke ngelempai sereta besulika kes nya ngagai Perintah Besai.

"Exco Selangor patut mulaika Bup Kudus nya ngagai BSM, ukai mantaika kelikuh laban JAIS ditemu kitai endang ari baruh kuasa perintah Selangor," ku iya.

ADUN Telang Usan tu mega nyebut, kelikuh Khalid nya mayuh dibalut politik perintah Pakatan Rayat (PR) ti nguasa Selangor, ke bendar, patut ngelurus sereta mutarka isu nya.

Kena Hari Tiga tu tadi, Khalid madah, Gerempung Bup Kudus Malaysia patut nulis surat ngagai Attorney-General minta Bup Kudus ti dirampas JAIS nya dipulai ngagai BSM.

Ku Dennis, tu mih chara Khalid nuchi penyai diri, ngelempaika tanggungpengawa nya ngagai perintah besai.

Ba penerang ti dibantaika BSM, sida enda kiruh ke penerang ari Khalid ke semina nemu nyeliahka penyai diri. Perintah PR di Selangor semina landik besemaya deka mulaika Bup Kudus nya tang diatu ngelempai isu nya ba Attorney-General.

Ku iya, BSM diserungkai JAIS, Opis Agama Islam Selangor, di baruh kuasa perintah PR Selangor.

Pengawa beserungkaika BSM nya diatur 'Selangor Non-Islamic Religions (Control of Propagation Among Muslims) Enactment 1988' lalu ku Gerempung Bup Kudus Malaysia, sida ngasai pengawa balat ngemediska ati raban Keristin di Selangor pia mega diserata menua tu.

"Semua tu kuasa Perintah Nengari Selangor ngemetulka isu nya, Bup Kudus nya disimpan ba JAIS ke semina penyauh tempalung ari Opis Menteri Besai nya," ku penerang nya.

Perintah Besai nengah 10 poin Sempekat Pemereti Ati taun 2011 ngemendarka raban Keristin ngimport, nyelak sereta nyadung Al-Kitab di serata Malaysia.

Berindik ari sempekat 10 poin nya, BSM suah ngimport Al-Kitab sekumbang dua taun ke udah lalu Perintah Besai mega bebasaka sempekat nya, genap kali Al-Kitab nya datai ditu, kitai nadai penanggul.

Ku BSM, pengawa nyerungkai palan Al-Kitab nya ditu ngayanka exco Perintah Selangor nulak Sempekat 10 point ngambika raban Keristin enda ngembuan Al-Kitab ti ditulis dalam Bahasa Malaysia nya.

Print Friendly

Perintah nyukung semua tanggungpengawa dipegai kaunsilor

Posted: 03 Apr 2014 09:02 AM PDT

by Chris Bishop. Posted on April 4, 2014, Friday

KUCHING: Raban kaunsilor, baik sida ti megai tanggungpengawa ngiring penuku pendiau nembiak sekula tauka mantu komuniti deka nerima sukung ari perintah.

Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah (gambar) madah, nengah bantu enggau program ke disedia raban kaunsilor ulih ngangkatka tikas pengelandik kelimpah ari bekunsi peneleba enggau pangan diri.

"Konselar bela megai tanggungpengawa besai ba pengawa nerenak pemereti rama dalam komuniti ke alai perintah beratika pekara tu enggau berat.

"Bengkah pekara ke ditangkup sida tu chukup besai lalu nya mungkur pemansang ba penyauh tikas kereja ke dijapai, pekara rama, pengelantang pendiau sereta mantu ngiring pejalai raban nembiak ba pengawa besekula," ku iya.

Fatimah mansutka jaku tu ngagai pemberita pengudah nerima penemuai seraban orang ari Gerempung Kaunseling Malaysia Antarabangsa (PERKAMA) di Begunan Baitul Makmur Petra Jaya ditu, kemari.

Iya nambah, ba dunya kemaya hari, servis raban kaunsilor tau nyaup mutar lalu ngurangka kes rama ti majak nyadi nyengkaum mutarka kes munuh diri, sarak, kusut runding sereta penusah rama ke bukai.

"Ba pekara tu meh servis raban kaunsilor ditagih, sida mega tau nyaup ngurangka sekeda kes rama lalu perintah sereta ejensi peribit deka seruran nyaup," ku iya.

Ngenang kaul ke sama, Fatimah madah penyampau raban kaunsilor ti udah ngerijista diri ba Kaunsil Kaunseling Malaysia di serata Malaysia manggai 5,137 iku ke alai ari penyampau nya 249 iku di Sarawak.

Iya mega madah ba serata Malaysia, urung 600 iku pengajar udah diangkat nyadi kaunsilor ke setipak enggau perambu 500 iku nembiak diarika seiku pengajar kaunseling.

PERKAMA ungkup keterubah iya deka ngadu 'The 1st Malaysia International Counselling Conference (MICC2014) pengelama tiga hari berunggu berengkah 29 ngagai 31 Oktober 2014.

Penemuai raban PERKAMA kemari diketuaika Kaban Eksekutif PERKAMA International Zon Sarawak Amalia Madihie.

Print Friendly

Lodge deka ngatur teater muzikal ‘Treasure Island’

Posted: 03 Apr 2014 09:01 AM PDT

KUCHING: Berindik ari pemujur teater 'Oliver!' ke kala dibantaika ba taun 2012, Gerempung Sekula Lodge nangkan tu deka mantaika teater baru sida 'Treasure Island'.

Teater tu deka diatur kena 25 nyentuk ke 27 April ba Dewan Tun Ahmad Zaidi Adruce (TAZA), Institut Pematih Pengajar (IPG) Batu Lintang.

Ku pemesai sekula Lodge nya, Poh Sze-Lyn madah, teater muzikal nya ngemeratka kaul pengajar enggau bala nembiak sekula nya.

"Teater muzikal 'Treasure Island' tu betuju ngempung bala pengajar sereta nembiak sekula Lodge sama-sama besaup nyapai pemujur ngaga teater ke-empat sekula tu.

"Dalam taun 2012, produksi Lodge mujur mantaika teater 'Oliver!' ke meri kami peransang merambu ngaga teater 'Treasure Island'," ku Poh.

Poh madahka sekula Lodge ngembuan penyungkak nyadi hab matih nembiak sekula nya dalam pekara bakat seni.

Antara teater muzikal ke kala digaga sida iya nyengkaum cherita 'Joseph and the Technicolour Dreamcoat', 'Wizard of Oz', 'Oliver' enggau 'An Evening with the Stars'.

"Nembiak sekula Lodge berasai temegah ati laban ulih mandangka pengelandik sida iya belakun dalam cherita teater muzikal.

"Di Kuching, nyangka pengawa teater muzikal tu utai ke jarang digaga, nembiak sekula sereta mensia mayuh ke deka datai meda teater muzikal tu ila, dikearapka ulih belelak lalu peratika teater muzikal enggau ati ke rindu. Kelimpah ari nya, Lodge Alumni berasai teransang endar ati deka ngaga teater muzikal tu datai di London enggau Singapore," ku iya seraya madah teater 'Treasure Island' ditulis Robert Louis Stevenson.

Ku Poh, sekeda ari rega tikit kena meda teater tu deka diber ngagai gerempung pengasih iya nya Hope Place kena mantu ruang bilik ke meskin seranta diau di nengeri tu.

Mensia mayuh ke deka nyukung projek tu, tau meli tikit ke berega RM50, RM75 enggau RM100 (udah belabuh dijual ari 1 Apr tu tadi) ari sekula Lodge empu ba lumur 082-363554 tauka 082-362185.

Kemari, bala nembiak enggau pengajar sekula Lodge bisi nemuai sereta betemu enggau Menteri Pengelantang Pendiau, Orang Indu enggau Pemansang Ruang Bilik Datuk Fatimah Abdullah laban deka ngangauka iya sama meda teater muzikal tu.

Print Friendly

Penyikar nyeliahka penyerarai api

Posted: 03 Apr 2014 09:01 AM PDT

by Judan Bungap. Posted on April 4, 2014, Friday

Semina 24 ari 70 pintu bilik ba Rumah Adin, Sungai Engkalat tu angus

SIBU: Penyikar Raban Penyah Penusah enggau Pengerara Api (BOMBA) mujur nyeliahka Rumah Adin Jawa di Sungai Engkalat ditu angus magang.

Taja pan baka nya, 24 ari 70 pintu bilik ba rumah panjai tu angus ba penusah ke nyadi kira pukul 8.30 pagi kemari.

Kelimpah ari nya, enam buah rumah kediri ti besemak mega diserarai api.

Tuai Rumah Adin Jawa madah, maya penusah nya iya benung ngaga rumah kaban iya di Julau lalu nerima telefon bisi iya kira pukul 8.40 pagi.

"Ninga rita nya aku lalu beguai mupuk tang maya aku datai rumah endang udah diempa api," ku iya madah ngagai pengarang berita.

Maya penusah nya ku iya, semina bini, anak enggau uchu iya aja bisi di rumah lalu sempat ngambi keresa mimit enggau dokumen beguna ke bukai.

Bela angus ba penusah tu iya nya bilik enggi Pemancha Stanley Geramong.

Ku iya, iya nerima telefon madahka penusah nya kira pukul 8.30 lalu sebedau beguai datai kia.

"Api endang udah nyadi maya aku datai kitu.

"Rumah panjai kami tu dientak sebedau jeman Jipun kelia tang suah diseruri belama," ku tandu iya.

Api dipadahka bepun ari seiku nembiak ti bemain machis sebedau nyerarai nganguska rumah panjai tu dalam kandang 30 minit.

Kepala Opis BOMBA (JBPM) Zon Sibu, Abdul Mutalib Rashid madah, sida nerima kangau kira pukul 8.45 pagi.

Berindik ari nya, 12 iku raban ari Opis Penyah Penusah enggau Pengerara Api (BBP) Sungai Merah enggau lapan iku ari BBP Sibu beguai ngesah penusah nya.

"Api benung nyerarai maya kami datai kitu.

"Kami mega minta saup ari BBP Bintangor lalu naka ke diatu kami mujur ngerara api ari ti nyerarai ngagai rumah ti besemak," ku iya.

Api mujur dirara urung pukul 9.53 pagi lalu nadai penusah bebadi nyadi.

Tang taja pan baka nya seiku indai tuai berumur 54 taun luput ketegal kelalu tekenyit meda penusah nya.

Print Friendly

Projek masang atap Town Square Kota Sentosa 90% tembu

Posted: 03 Apr 2014 09:01 AM PDT

KUCHING: Projek masang atap Town Square Kota Sentosa ti begunaka ungkus belanja RM450,000 diatu udah tembu 90 peratus sereta dipelabaka disuaka ngagai Majlis Perbandaran Padawan (MPP) ujung bulan tu.

Chairman MPP Lo Khere Chiang madah, penembu projek nya ila deka nyendiaka palan ti lantang ngagai raban bansa ba endur nya bejalaika aktiviti sida ti nyengkaum besenam sereta program bukai.

Town Square mega selalu nyadi palan bazaar Ramadan tiap kali bulan puasa, ku iya.

"Projek tu dipelabaka tembu magang ba unjung minggu ketiga bulan tu (April), diatu kontraktor ti megai tanggungpengawa semina masang mimit agi atap enggau pengawa nyambung elekterik," ku iya madah ngagai pengarang berita pengudah ngabas palan projek nya kemari.

Nitihku iya, pengawa masang atap nya mungkur kandang endur urung 475 meter persegi kelimpah ari disikap panggau tebuka, lampu mayuh guna enggau mentol bechura dikena ngemanahka agi endur nya.

"Kitai bulih belanja RM500,000 ari Perintah Besai lalu nya semaya Sapit Menteri Besai Tan Sri Muhyiddin Yassin setaun ke udah lebuh ti nemuai seraya gawa ngagai Pasar Batu 7.

"Ngarika piak MPP enggau rayat, aku amat beterima kasih ngagai Perintah Besai sereta Muhyiddin lebih agi," ku iya.

Ku iya Opis Kereja Raya (JKR) Kuching dikearapka ngelangkar enggau ngaga  nyengkaum kereja matau dikena ngenukuka projek dipejalaika nitih ti udah ditimpuhka.

Lo berebak enggau tu minta peranak ngelinggi bejalaika tanggungpengawa mantu MPP nyaga kandang endur nya lebih agi senentang pemeresi enggau pengerusak, ti dipejalaika orang ti nadai ngembuan tanggungpengawa.

"Aku arap endar penyereta peranak endur tu amat beguna dikena ngenukuka semua projek tauka perengkaguna dijaga manah sereta ulih dikena dalam timpuh ti panjai," ku iya.

Nyempulang Lo ensana, Ketua Bahagian Bangunan JKR Kuching Ir. Wong Siu Ping, jurutera-jurutera MPP sereta beberapa pemesai ari JKR Kuching.

Print Friendly

Putarka enggau jampat penusah tanah tusur

Posted: 03 Apr 2014 09:01 AM PDT

SIBU: Parti Keadilan Rayat (PKR) pampang Kanowit minta piak ti bekaul lengkas mutarka penusah tanah tusur ba sepemanjai tebing Sungai Rajang di Kanowit.

Sekretari PKR Pampang Kanowit, Thomas Laja madah, penusah tanah tusur tu lebih agi nyadi ba Batu Luking, Nanga Dap, Nanga Semaram enggau Nanga Ngemah.

"Ba taun 2011, perintah kala madahka diri deka ngaga projek tekat tebing tanah tusur ba menua nya enggau ungkus RM40 milliun ari baruh Opis Menteri Pengeraja Asal enggau Rampa Menua.

"Tang kitai iran ati baka ni projek tu nyentukka sehari tu lalu empai belabuh," ku iya.

Iya mantaika jaku nya ba aum pengarang berita di Opis PKR Lanang ditu, pagi kemari.

Ketegal pekara tu ku Thomas, Opis Nagang Makai Suap Malaysia (SPRM) patut nasat pekara tu enggau lengkas ngambi pulaika pemaik rayat menua nya.

Berebak enggau tu mega, iya ngansak Opis Pelilih Menua Kanowit (MDK) ngurangka agi bayar siwa ngena perengka lumba enggau bemain di pelilih Kanowit.

"Naka ke diatu bayar siwa ngena Stadium Kanowit iya nya RM300 sekali ngena. Pia mega siwa ngena gelanggang futsal enggau 'volley ball' iya nya RM30 enggau gelanggang badminton iya nya RM10.

"Enti nunda bayar ngena perengka tu patut mit dikena matak mayuh agi mensia mayuh ngena awak lepa enggau pengawa bemain," ku tandu iya.

Siwa ti kelalu besai ku Thomas, tau nekul mensia mayuh lebih agi raban nembiak rindu bemain tauka ngena perengka guna kunsi nya.

Print Friendly