» »Unlabelled » Pemujur BN maya PRK Balingian ukai penetap BorneoPost Online | Borneo , Malaysia, Sarawak Daily News » Berita Iban - New 2 Borneo

05:28:00

Pemujur BN maya PRK Balingian ukai penetap BorneoPost Online | Borneo , Malaysia, Sarawak Daily News » Berita Iban - New 2 Borneo

Pemujur BN maya PRK Balingian ukai penetap

Posted: 01 Apr 2014 03:59 PM PDT

KUCHING: Berindik ari pemujur pengari Barisan Nasional (BN) maya Pengawa Bepilih Mit (PRK) di Balingian kena 29 March tu tadi, mayuh raban politik melabaka Kepala Menteri, Tan Sri Datuk Amar Adenan Satem nyangka deka ngenetapka Pengawa Bepilih Besai nengeri (PRN) diatur tumu.

Mandal Menteri Pemansang Nembiak Datuk Abdul Karim Rahman Hamzah, lebuh dikerandau madah, pemujur BN ba PRK di Balingian nya ukai reti PRN patut diatur tumu ari pematut.

Abdul Karim ke mega Mandal Menteri Pengawa Berumah nadai sekali mikir pengawa bepilih nya patut diatur tumu bepelasarka timpuh Kunsil Nengeri (DUN) deka abis kena 20 Jun 2016.

"Nadai guna masau hari berundingka mayuh kelikuh politik. Enti ditanya raban penyakal, tentu sida dekaka pengawa bepilih diatur tumu laban sida nadai pengawa bukai dikereja. Lain mih BN, pengudah menang sida berundingka peneka rayat. Tembu timpuh DUN baru kitai berundingka pengawa bepilih baru," ku Kaban Kunsil Nengeri (ADUN) Asajaya nya.

ADUN Balingian ke baru menang maya PRK tu tadi, Yussibnosh Balo nengah pengelui 6,911 undi ngalahka pengari PKR Abdul Jalil Bujang.

ADUN Kota Sentosa Chong Chieng Jen, bela sepenemu madah, PRN enda deka diatur tumu taja pan maya PRK tu tadi, BN menang nengah majoriti undi ti besai, undi ulih PR mega nambah.

Chong ke mega MP Bandar Kuching bela melaba, PRN nyangka deka diatur taun baru tu ila sebedau bejalaika chukai barang enggau servis (GST) ti deka berengkah kena 1 April 2015.

ADUN Ba'Kelalan Baru Bian pechaya PRN deka diatur entara bulan September taun tu enggau September taun dudi nyin ila.

Chairman PKR nengeri nya madah, pemujur BN di Balingian tau bendar ngunjugka Adenan ngenetapka  PRN diatur tumu.

"Laban ke baru nyadi Kepala Menteri, tentu iya (Adenan) begunaka mandat ari mensia mayuh. Pemujur BN di Balingian tu tadi tau bendar nyadi peransang iya ngenetapka atur pengawa bepilih tamu ari ke patut.

Seiku analis politik Dr Jeniri Amir mega sepenemu madah, sebedau ngenetapka pengawa bepilih, mayuh pengawa bukai ti patut diperundingka Adenan.

"Sekeda ari pekara ti berat patut diperundingka Adenan iya nya penyaru penemu dalam Parti Sa'ati Rayat Sarawak (SUPP) enggau Parti Demokratik Progresif Sarawak (SPDP), nya enda tau enda diputarka dulu," ku Jeniri ti mega lecturer di Unimas.

Enti tau diatur tumu pan pengawa bepilih nengeri nyangka dipejalaika ba suku ketiga taun 2015, ku Jeniri.

Print Friendly

Padu pengawa nyadi Kepala Menteri ukai bepelasarka bansa, ku Joseph Allen

Posted: 01 Apr 2014 03:58 PM PDT

SARIKEI: Barang sapa ke nyadi Kepala Menteri Sarawak diatu ukai bepelasarka bansa. 

Nya ukai pangku pengawa ungkup orang asal, ukai orang asal, Dayak tauka ni bagi bansa, tang ungkup barang sapa peranak Sarawak ke bisi pengelandik nyadi ketuai, sereta ngembuan penau mai nengeri tu enggau peranak nyapai pemaik enggau penyenang, ku kepala publisiti Parti Rakyat Sarawak (PRS) pampang Meradong, Joseph Allen.

Allen nimbal penerang ke dipansut chairman DAP Negeri Chong Chien madahka parti iya deka (DAP) nyiri Dayak mangku pengawa kepala menteri nyema Pakatan Rakyat menang dalam pengawa bepilih nengeri lalu numbuhka perintah baka ke dipansutka ba surat kabar Hari Satu tu tadi.

Nyemaka penerang ari Chong nya baka umpan banggar, Allen madahka iya pechaya tebal bansa Dayak ulih ngemau tuju penerang nya.

Taja pia Allen ngasaika bisi orang Dayak nerima penerang nya.

Aku pechaya tebal peranak Sarawak ke diatu nyengkaum bansa Dayak enda tentu ibuhka bansa ketuai seagi-agi iya nya sedia mekuh pengawa enggau adil, ku iya

Ba penerang Chong sentang Tan Sri Datuk Patinggi Alfred Jabu ke enda diambi nyadi Kepala Menteri nyilih Pehin Sri Taib Mahmud nya enda bebasaka seiku nya, Allen nyebut nya semina ba peragam ati Chong aja.

Ba pekara tu semua parti komonen BN nengeri bebasa sereta nerima Tan Sri Datuk Amar Adenan Satem nyadi KM baru ke alai tuai PBB udah besetuju manggaika pekara tu ba Taib, tambah iya.

Adenan meri jamin iya Kepala menteri ungkup semua peranak Sarawak, tambah Allen.

Print Friendly

Sebengkah pengawa bejalai kena ngayanka pengibuh, penyinu ngagai penumpang MH370 deka diatur 5 April

Posted: 01 Apr 2014 03:57 PM PDT

by Rengenyan Labang. Posted on April 2, 2014, Wednesday

KUCHING: 'Sarawak Volunteers Walk of Love, We Care We Share' deka diatur kena 5 April tu kena ngayanka pengibuh seraya bekunsi penyinu enggau kaban belayan tauka ruang bilik penumpang sereta kelasi bilun MH370.

Menteri Pengintu Pengelantang, Orang Indu enggau Pemansang Ruang Bilik, Datuk Fatimah (gambar) madah, program nya diputuska pengatur program nya.

Bilun MH370, mai 227 iku penumpang enggau 12 iku kelasi bilun ti lenyau kena 8 March pengudah terebai ari Penyangkai Bilun Anatarabansa Kuala Lumpur pukul 12.41 tengah malam lalu patut sangkai di Beijing pukul 6.30 pagi ba hari ke sama.

"Ke sekali tu komiti pengatur ngemutuska deka ngatur 'Sarawak Volunteers Walk of Love' dikena nunjukka pengibuh enggau penyinu ngagai kaban belayan tauka ruang bilik ti kena tuntung penusah bilun MH370.

"Program tu deka diatur kena 5 April di Le'Park ti dipelabaka pengawa bejalai kaki dilepaska bini Kepala Menteri (Datuk Jamilah Anu).

"Tuju program tu mega dikena nunjukka sukung ngagai perintah Malaysia sereta dipasuk 26 buah menua luar ke sama enda putus ngiga enggau nyelamat (SAR) MH370," ku iya bejaku ngagai pemberita ba sebengkah aum pengarang berita ti diatur ba opis iya di Bangunan Baitul Makmur ditu kemari.

Ku iya, rayat Malaysia endang patut nunjukka pengibuh sereta penyinu enggau nyukung pengawa ti dipejalaika perintah Malaysia.

"Nya alai sebagi ari tuju kitai ngatur program bejalai tu mega dikena nunjukka orang Sarawak beserakup sereta meri sukung moral enggau penyinu ngagai kaban belayan tauka ruang bilik sida ke dalam bilun MH370.

"Kitai besampi ngagai Tuhan ngambika diberi pengering tauka penegap runding betapi enggau penusah ttu.

"Nya alai kitai minta semua volunteer enda ngira ari Gerempung Ukai dikuasa Perintah (NGO), ejensi, serakup sama datai yukung program tu kena 5 April tu ila," ku iya.

Fatimah berebak enggau tu mega minta mensia mayuh tauka raban volunteer ti ngulu program tu mai lalu nulis jaku penyinu sereta sukung ba kain tambai maya bejalai nya ila.

Print Friendly

Tumbuhka pampang opis EPF di Kapit: Yong

Posted: 01 Apr 2014 03:57 PM PDT

KAPIT: Chairman Balai Dagang China Kapit, Dato' Yong Hua Sying minta perintah numbuhka pampang Opis EPF ngambika bisi meri servis ngagai mensia mayuh ditu.

Pampang opis EPF endang beguna amat ngambika ulih meri servis ngagai mensia mayuh ditu. Menua Kapit majak mansang berindik ari mayuh bengkah projek ari perintah dipejalaika ditu dalam kandang sepuluh taun ke udah.

Penyampau mensia sereta pengawa dagang mega majak nambah. Suba endang amat empai mayuh guna, laban semina mimit aja pengereja pengawa ke nyimpan duit dalam tabung EPF. Pampang opis nya patut amat ditumbuh ditu ngambika ulih meri servis ngagai peranak menua ditu nyengkaum ari Song enggau Belaga", ku Yong bejaku ba Aum Ninting Taun Balai Dagang China Kapit ditu.

Pampang opis EPF ke pemadu semak iya nya di Sibu. Ukai mudah deka nurun kin laban jauh sereta besai ungkus. Pemadu mimit ungkus kin pan RM 250.

Ukai genap iku pengereja pengawa ulih ngemansutka ungkus nya, tambah mega ukai nyamai ngulihka belanja diatu", tandu Yong.

Ku iya, opis EPF nya beguna amat, nya alai kami (Balai Dagang China Kapit) minta perintah numbuhka pampang opis nya ditu.

Bela bisi ngulu aum nya, Sapit Chairman, Liew Song Swee, Sekretari Ling Hung Ping, Tukang Wang, Wong Kee Wei, enggau bala kaban bukai baka Sia Shui Poh, James Chieng, Ngu Teck King, Chua Kim Hui, Ling Hang Kee enggau Ting Hua Kong.

Print Friendly

Penanggul betengahka jalai teputar

Posted: 01 Apr 2014 03:57 PM PDT

by Judan Bungap. Posted on April 2, 2014, Wednesday

SIBU: Penembu projek nyeruri Jalai Bekakap/Sungai Melangan nejuka peranak ba Sungai Apong enggau Sungai Melanggan badu agi irau ati maya betengahka j alai nya.

Projek nyeruri jalai enam kilometer tu tembu bulan November taun seiti nyin tadi enggau ungkus kira bisi RM1.2 milliun.

Sebedau tu jalai nya suah bendar ampuh ai maya ai pasang raya lalu enda ulih ditengah kerita.

Nitihka dipadah Tuai Rumah Melina Gerasi, penembu projek nya ngemuntangka sida serumah ba Sungai Apong ditu bejalai mindah ngagai menua bukai.

"Udah tu kami badu irau agi taja maya ai pasang raya.

"Kami berasai gaga bendar ati enggau penembu projek tu," pia ku iya maya dikerandau pengarang berita sepenembu pengawa bejadika jalai nya.

Projek nya dipenyadika Menteri Wang II ti mega Kaban Kunsil Nengeri (ADUN) Bawang Assan Dato, Sri Wong Soon Koh kena 30 Mac tu tadi ba Jematan Sungai Bekakap.

Tandu Melina, diatu mega sida ulih datai ba rumah semina kira 10 minit aja enti dibanding kira bisi 30 minit sebedau tu laban jalai nya mega belubang sereta bisi batu besai.

Kelimpah ari iya, TR Siah Geramong mega bela madahka diri berasai temegah ati laban tu mandangka sida ba Sungai Apong enggau Sungai Melanggan badu agi ngasaika penusah sebedau tu.

"Terima kasih ngagai perintah kelebih agi ngagai Dato Sri Wong Soon Koh laban udah mendingka sebana kami ngelama tu," pia ku iya sambil madah penembu projek tu mega ngelantangka sida semenua maya nganjung anak ke sekula.

Chairman pengatur pengerami bejadika penembu projek tu, TR Unjah Besh madahka iya sebedau tu suah mantaika penusah ke diasai rayat dia ngagai pengari rayat enggau Sekretari Politik Kepala Menteri Andrew Shilling Bangit.

Taja pan baka nya, rayat di Sungai Melanggan enggau Sungai Apong enda ulih enda besabar laban perintah bekenaka pelin ti lenak maya ngatur sesebengkah projek nyengkaum projek Jalai Bekakap/Sungai Melangan nya.

"Pengawa nyeruri Jalai Bekakap/Sungai Melangan tu mandangka perintah Barisan Nasional (BN) semampai ngingatka sukung rayat menua pesisir ngagai perintah ngelama tu," ku iya.

Print Friendly

Nadai perambu ngubah kalinda dagang temuai

Posted: 01 Apr 2014 03:55 PM PDT

MUKAH: Kediatu, nadai sebarang ubah ba kalinda pengawa dagang temuai di menua tu, ku Menteri Pengawa Dagang Temuai, Datuk Amar Abang Johari Tun Openg.

Iya madah baka nya, laban pampang pengawa dagang temuai menua tu enda entu kena rampit ketegal bilun Malaysia Airline (MAS) MH370 ke lenyau bedau lama tu tadi.

"Laban, makit China pampang pengawa dagang temuai di menua tu enda entu mayuh, baka ke di Sabah. Atur pengawa ke diperambu kitai ke taun tu, agi meruan baka selama," ku iya madah lebuh bejaku ba aum media di 'Lamin Dana homestay' di Kampung Tellian ditu, bedau lama tu tadi.

Iya madah antara atur pengawa iya nya Pesta Kaul ditu, pengerami Benak di Sri Aman, 'Rainforest World Music Festival' di Kuching enggau Borneo Jazz Festival di Miri.

Iya nandu baru, kes MH 370 enda entu ngerampit pengawa dagang temuai di menua tu laban kelimpah ari temuai datai ari menua tasik bukai, baka ari Australia enggau Eropah, menua tu agi bepanggai ba pampang dagang temuai ari menua tu empu.

Iya madah, penambah temuai ari luar mayuh ngagai menua tu laban perengka guna kitai dalam pekara berubat muntang digiga.

"Nya kebuah kitai bisi sebuah agi sepital baka Palan Pakar Borneo (Borneo Specialist Centre) di Kuching kelimpah ari pemisi kitai kediatu baka Palan Berubat Normah enggau KPJ Kuching Specialist.

"Mayuh orang ari menua Indonesia ngagai menua kitai kitu laban ketegal pemanah perengka guna berubat kitai ditu. Enti nitih, kelia orang ke endar belandikka berubat di Singapore, tang diatu di Kuching, kitai udah mayuh palan sepital pakar," ku iya.

Kelimpah ari nya ku iya, tu laban raban pakar kitai ari menua tu empu ke udah lama di Singapore, nyau mulaika diri gawa di Kuching.

"Kebuah orang mayuh datai ke Kuching, laban ungkus berubat di Singapore jauh mar agi enti dibanding enggau berubat di Kuching," ku iya.

Print Friendly