» »Unlabelled » Joseph Salang megai ulu DCCI penggal 2014-2016 BorneoPost Online | Borneo , Malaysia, Sarawak Daily News » Berita Iban - New 2 Borneo

05:11:00

Joseph Salang megai ulu DCCI penggal 2014-2016 BorneoPost Online | Borneo , Malaysia, Sarawak Daily News » Berita Iban - New 2 Borneo

Joseph Salang megai ulu DCCI penggal 2014-2016

Posted: 05 Apr 2014 09:16 AM PDT

by Rengenyan Labang. Posted on April 6, 2014, Sunday

Raban Supreme Council ke baru deka chakah mekuh pengawa dikena nyapai juluk penumbuh DCCI

KUCHING: Datuk Joseph Salang Gandum udah dipilih nyadi Presiden Balai Dagang enggau Industri Dayak (DCCI) penggal 2014-2016.

Dulu ari tu penuduk presiden nya dipegai Tan Sri Datuk Amar Leo Moggie ba penggal 2008–2011 enggau 2011-2014, lalu udah tu nyadi raban panel penyanding penemu.

Sapit Salang iya nya Kilat Beriak, nganti penuduk Tan Sri Datuk Seri Celestine Ujang Jilan (2008–2011 enggau 2011–2014).

Lebuh dikerandau pengarang berita kemari, Salang madahka bala raban Supreme Council DCCI ke baru deka chakah sereta nampung atur pengawa ti udah dikemeran sereta dikemeratka pengelama udah ditumbuhka.

"Aku ngarapka nengah komiti baru tu, kami ulih nampung pemujur pengawa ti udah dipejalaika raban ke lama, lalu enggau ubah ke baru tu ngarapka kitai ulih neleba diri enggau gaya ke baru.

"Nya ngambika DCCI deka terus releven sereta lebih releven dalam timpuh 12 taun ke deka datai," ku iya seraya madahka pengawa bepilih DCCI diatur tiga taun sekali.

Salang dikerandau pengudah Baum Ninting Taun DCCI Ke-12 sereta pengawa bepilih baru kaban Supreme Council DCCI 2014-2016 ti diatur ba sebengkah hotel ditu, kemari.

Bejaku baru iya ngarapka nengah kaban Supreme Council ke baru nya sereta kaban DCCI ti bebiak sereta datai ari mayuh macham pengawa ulih mantu ngangkat DCCI ke penguntung raban Dayak.

"Naka ke diatu kami nadai ngaga sebarang ubah ngenyit, baka ti dipadahka aku tadi kami deka ngenegapka pekara ti udah dikembuan tauka dipejalaika," ku iya.

Ba pengawa bepilih kaban Supreme Council DCCI (2014-2016) ke diatur kemari, bisi lima iku dipilih nyadi Mandal Presiden iya nya Leonard Martin Uning; Christopher Gira; Livan Tajang; Gerawat Gala enggau Dato Winsel Ahtos.

Libat Langub dipilih nyadi sekretari lalu Allan Keripin Nangkai nyadi tukang wang.

Kaban Selama Supreme Council iya nya Bell Anggan, Dr. Joseph Jawa, Bangsa Untang, Major Peter Runin, Telajan Luyoh, Paul Raja, Peter Udang Sagan, Ambrose Jarat, Leornad Jambu enggau Florince Christy.

Urung 100 iku kaban DCCI ke datai ari Sibu, Miri, Bintulu enggau ke bukai kelimpah ari Kuching bisi datai ngulu aum nya kemari.

Print Friendly

Pemayuh akauntan Orang Asal udu kurang

Posted: 05 Apr 2014 09:14 AM PDT

KUCHING: Penyampau akauntan Bumiputera ti bisi pentauliahan ba renggat Association of Charted Certified Accountans (ACCA) di Sarawak agi kurang.

Pengirau nya dikenataika Menteri Pemansang Tanah Tan Sri Dr. James Masing ti madahka semina 2.58 peratus ari kaban ACCA di Sarawak iya nya Bumiputera.

"Malaysia begunaka urung 60,000 akauntan betauliah lebuh manggai 2020 lalu naka ke diatu semina 50 peratus ari penyampau nya udah dijapai.

"Tang, ari penyampau nya semina 12.3 peratus akauntan profesyenal iya nya Bumiputera lali di Sarawak penyampau nya kelalu mit," ku iya.

Iya mansutka pekara nya lebuh bejaku ba pengerami Graduasyen Kolej Sunway Kuching Ke-17 di sebuah hotel tebilang ditu kemari.

Berindik ari nya, Masing madahka kerejasama entara Kolej Sunway Kuching begulai enggau Yayasan Sarawak, Yayasan Peneraju Pendidikan Bumiputera (Teraju) sereta Yayasan Pendidikan Teknikal Rakyat Sarawak (Teras) dikearapka ulih meransang mayuh agi nembiak Bumiputera ngambi program perakaunan.

"Bala nembiak lebih agi Bumiputera diberi peluang nyambung pelajar ba Kolej tu dikena nyapai juluk menua," ku iya.

Nambahka nya, iya madahka tanggungpengawa nyadi akauntan ukai semina nyaga bup  aja tang nyadi orang ti beguna nentuka penegap kompeni enggau pemanah ekonomi.

Ku iya, diatu profesyen akauntan majak dikerindu laban jelan bendar ba gaji.

Berebak enggau tu iya muji Kojel Sunway Kuching ti diketuaika Ketua Pegawai Eksekutif Joseph Lim laban ti mujur ngetanka tikas penyulut dalam peresa ACCA enggau Sijil Juruteknik Perakaunan (CAT).

"Aku udah meda kolej kita tu udah mujur nempa mayuh graduet ngembuan ACCA enggau CAT.

"Pelaba aku enda kelalu kini aku madahka Sunway nyendiaka pelajar betikas dunya ti senipak enggau institut perakaunan pemadu manah ari menua luar," ku iya.

Print Friendly

Peranak Rumah Adin nerima bantu ari Kelab Lions Sibu

Posted: 05 Apr 2014 09:14 AM PDT

SIBU: Peranak Rumah Adin Jawa di Sungai Engkalat ke dituntung penusah angus empai lama udah nerima bantu ari Kelab Lions Sibu Bawang Assan.

Kelab Lions Sibu Bawang Assan udah nyuaka bantu baka pemakai enggau utai ke diguna ninting hari. Bantu nya udah disuaka Chairman pengatur bantu, Glyn Ho ngagai Tuai Rumah Adin Jawa kena Hari Empat tu tadi.

Pengawa nyuaka bantu nya dikemataka Menteri Wang Kedua ke mega Menteri Kandang Menua enggau Pemansang Komuniti sereta Kaban Kunsil Nengeri (ADUN) Bawang Assan, Dato Sri Wong Soon Koh.

Bela bisi dia maya nya Chairman Majlis Perbandaran Sibu (MPS) Datuk Tiong Thai King, Sekreteri Politik Kepala Menteri Andrew Shilling Bangit enggau Pau Kiew Chuang, Pemancha Stanley Geramong sereta Presiden Kelab Lions Sibu Bawang Assan, Helen Pang.

Kebuh ke berandau enggau pengarang berita, Glyn madah, pemeri nya sebengkah ari atur pengawa pengasih Kelab Lions Sibu Bawang Assan kelebih agi kena mantu orang ke tasah.

"Kelab Lions Sibu Bawang Assan arapka pemeri nya ulih nyaup ngelempungka tating pengidup sida ke tasah nya.Kami mega arap semua ulih begempung mantu peranak Rh Adin Jawa ke tasah tu," ku iya.

Penusah angus ke nyadi urung pukul 8.30 pagi kena 3 April tu tadi udah nganguska 22 pintu ti ngujungka sida nadai agi alai diau.

Penuai Rumah panjai ke angus nya lebih 60 taun, sereta penusah rumah panjai angus ti keterubah endar nyadi di Pelilih Mit Sibu dalam kandang taun tu.

Print Friendly

DCCI enda limpang ari juluk besaguka orang dagang Dayak

Posted: 05 Apr 2014 09:13 AM PDT

KUCHING: Pemanah tanggung pengawa ke udah dipejalai Balai Dagang enggau Industri Dayak (DCCI) patut dinan sereta disukung orang dagang Dayak.

Sapit presiden DCCI Tan Sri Celestine Ujang madah pekara nya chukup berat ketegal DCCI mangku tanggung pengawa ngintu pemaik, penegap orang dagang Dayak kelimpah nyendia penepan endur sida ngaul diri ba mayuh bengkah pekara dagang.

"Kenyau ditumbuh 12 taun ke udah, DCCI nerima timbal ke manah sereta dipebasa raban orang dagang.

"Nyentukka diatu, gerempung udah ngerijister enda kurang ari 600 iku kaban ke nyadi orang dagang di serata nengeri.

"DCCI angkun nentuka juluk ngangkatka orang dagang Dayak dipajak," ku iya.

Ujang mansutka jaku tu ba pengerami makai lemai 'Malam Serumpu DCCI 2014' di siti hotel tebilang ditu, malam ensanus.

Malam Serumpu DCCI 2014 diatur nyerumba Aum Tiga Taun Sekali (TGM) ke deka diadu pagila (sehari tu).

Ba pengerami nya, presiden Tan Sri Leo Moggie bisi nyuaka setipikit nyadi kaban baru gerempung ngagai orang dagang Dayak ari tiap pelilih menua.

Ngenang senentang TGM, Ujang netapka seduai presiden (Moggie) deka ngelengkaka pangku pengawa lalu ngelempaika pemutus maya aum nya nentuka presiden enggau sapit presiden ke baru.

"Tan Sri Presiden enggai nyadi enda ngelengka pangku pengawa ketegal konstitusyen DCCI netapka presiden nguluka gerempung ungkup timpuh dua renggat aja.

"Aku ngelengka pangku pengawa nyadi sapit presiden ketegal enda tentu bepengerai maya ke diatu," ku iya.

Kitai meri basa enggau puji ngagai presiden ti udah ngempung, ngiring DCCI sereta orang dagang Dayak ungkup pemaik komuniti Dayak, tandu iya.

Ba pengerami nya mega, DCCI ngundang Asociate Profesor Madya Rami Bulan meri licha 'Native Customary Land Rights, Sarawak-Current Issues and Challanges'.

Rami mujur matak raban temuai duduk jenuh mendingka penemu iya ba senentang isu NCR pengelama setengah jam ke alai iya mai sida beratika kes Nor anak Nyawai.

Bela datai Sapit Kepala Menteri Datuk Patinggi Tan Sri Alfred Jabu, Menteri Muda Perengka Guna Mensia Mayuh Datuk Dr. Stephen Rundi, Temenggung James Jimbun Pungga enggau orang bukai.

Print Friendly

Sarawak tetap dipelepa ari keruga ekstrimis: Adenan

Posted: 05 Apr 2014 09:12 AM PDT

by Chris Bishop. Posted on April 6, 2014, Sunday

Penetap atur bekunsi kuasa megai negeri alai genap pupu bansa begulai sejalai nyungkak pemansang

LUNDU: Nengeri Sarawak deka mengkang likun seagi raban ekstrimis ari Semenanjung Malaysia ditagang tama ngerachun runding rayat.

Kepala Menteri Tan Sri Datuk Amar Adenan Satem madah pekara nya chukup berat ngambika enda ngeruga atur bekunsi kuasa merintah ti matak semua ketuai ari genap pupu bansa begulai ngiring pemansang nengeri.

"Di Sarawak, enti kitai numbuhka perintah, perintah nya deka mandangka penuduk tiap pupu bansa di Sarawak.

"Perintah kitai diarika ketuai ari bansa Melayu, Iban, Cina, Bidayuh enggau orang Ulu ke alai kitai ngemeranka atur bekunsi kuasa.

"Seagi kitai ngenggam penetap tu, Sarawak deka mengkang likun lalu tu meh ke udah digenggam kitai kenyau teulihka kuasa merintah diri suba. Kitai udah setuju lalu deka bekunsi kuasa," ku iya.

Adenan mansutka jaku tu ba pengerami Ketuai Begulai enggau Rayat ke diatur di Balai Mensia Mayuh Pelilih Lundu, kemari.

Adenan nambah, rayat Sarawak enda kala belaya ketegal pekara agama tauka bansa ke alai iya mega pechaya pekara ke nyadi di Malaya enda kala nyadi di nengeri tu.

"Mayuh macham cherita didinga nyadi di Malaya. Anang kitai nunda ulah sida.

"Kitai di Sarawak udah likun, kemeranka aja pengidup kitai ngelamatu lalu anang ngemandaika diri deka ngubah," ku iya.

Adenan ke mega Kaban Kunsil Nengeri Tanjung Datu sekali agi madah dia iya deka nyadi Kepala Menteri ungkup semua pupu raban bansa lalu iya mega ngansak raban bansa China pulai nyukung perintah.

"Ngelamatu, raban bansa China terang dipeda enda nyukung perintah. Sida milih nyukung parti penyakal.

"Ba 55 penuduk DUN ke dikuasa perintah Barisan Nasional (BN) semina 2 penuduk diarika ketuai bansa China lalu ari 16 penuduk DUN ke dikuasa penyakal, 14 diarika ketuai China.

"Kitai patut mutarka pekara tu ke alai kitai enggai mega ulih kelalu mejal sida. Kitai seruran bebasaka peneka sida. Sekalika sida deka pulai nyukung perintah, semina sida ulih ngeletak pemutus," ku iya.

Ba pengerami nya mega, Adenan meri semaya deka nyendiakka alur penyambung ari Sematan nuju Tanjung Datu.

Ku iya, Jalai Besai Pan Borneo ke suah dikejaku diatu enda tentu mai reti enti menua Tanjung Datu enda datai jalai.

"Jalai Besai Pan Borneo ukai nyambung pelilih Lawas naka ke Sematan, tang kitai deka jalai tu disambung nyentuk ke Tanjung Datu," ku iya.

Ba pengerami nya, Adenan bisi nyuaka surat chiri ketuai bansa ngagai 17 iku ketuai ke alai raban orang ke kurang pemisi bisi mega nerima pemeri ti disuaka bini iya Pn Sri Datuk Jamillah Anu.

Iya netapka deka nyiri seiku Pemancha Iban enggau seiku pengulu China di pelilih Lundu.

Bela datai Sapit Menteri Dalam Menua Datuk Dr Wan Junaidi Tuanku Jaafar, speaker Dewan Undangan Negeri Datuk Amar Mohamad Asfia Awang Nasar, Pemangku Residen Kuching Zamhari Saidi enggau orang bukai.

Print Friendly

DCCI muka lawang ngagai raban nembiak

Posted: 05 Apr 2014 09:12 AM PDT

KUCHING: Nembiak bansa Dayak nengeri tu sekali ke udah tauka bedau ngemeranka pengawa dagang diperansang nyadi kaban Balai Dagang enggau Industri Dayak (DCCI).

Pekara nya dipadahka Presiden Balai Dagang enggau Industri Dayak (DCCI) Datuk Joseph Salang Gandum ngagai pengarang berita ditu kemari.

Iya madahka nya ke pemansang DCCI sereta deka nguntung bansa Dayak ti ngemeranka pengawa dagang nyengkaum raban nembiak.

"Kami enggau naka ulih meransang sereta minta raban nembiak Dayak sekalika udah bisi dagang tauka bedau ngerejister diri nyadi kaban DCCI," ku iya.

Dulu ari nya Salang ngulu Aum Ninting Taun (AGM) 2014 enggau Aum Tiga Taun Sekali Pengari (TDM) ti diatur ba sebengkah hotel ditu.

Ba pengawa bepilih tauka TDM nya kemari, Salang udah dipilih nyadi presiden ungkup penggal 2014–2016, ti nganti Tan Sri Datuk Amar Leo Moggie (2011–2014).

Nambahka nya, Salang madahka nengah kuasa tauka mandat ke diberi ngagai iya enggau kaban Supreme Council ke baru, bisi ubah mimit senentang nyadi kaban.

Deka nyadi kaban patut ngenataika peminta (ngagai DCCI), lalu pengudah nuan nyadi kaban dia nuan enda ibuh bebayar masuk ninting taun (nyadi kaban), ku iya.

Kelimpah ari nya iya madahka DCCI mega deka ngemanahka agi sistem data balai nya ngambika tiap iku kaban deka nemu nama pekara ti dipejalaika.

"Aku deka ngaluska sistem data kami laban ke diatu mayuh kaban balai tu sebana ke diri nadai dikanggau baum tauka enda dipadahka, nya dipelabaka ketegal data enda betul, ambika banding lumur telefon udah berubah.

"Nya alai akau ngasaika dalam DCCI patut ngena teknologi ke baru senipak enggau ubah dunya, laban pelaba aku semua udah ngena Smartphone, baka surat tesau patut ulih dianjung ngena email, WhatsApp enggau ke bukai," ku iya.

Print Friendly