Orang Ti Melanja Filem Wolf Of Wall Street Bisi Kaul Enggau 1MDB Enggau Jho Low!

Posted: 14 Aug 2014 04:32 AM PDT

Riza enggau Joey ari kompeni pengaga Filem Red Granite Pictures benung begambar enggau tukang kelulu filem sida – Leonardo di Caprio enggau Jamie Foxx

Udah bekau beberapa bulan ti enggai nyebut nama sapa orang ti melanja pengawa ngaga filem sida, diatu kompeni pengeluar filem Red Granite Pictures (RGP) nyebut nama sapa orang ti nyadi pemelanja sida munyi ti disebut sida ngagai New York Times.

Siku orang dagang di menua Abu Dhabi ti bekereja nyadi Kepala Eksekutif dalam kompeni beranakka puku dagang, Aabar Investments, Mohamed Ahmed Badawy Al-Husseiny.

Kompeni Aabar Investments nya sebuah kompeni wang turu ti bisi kaul pengawa dagang beranakka puku ti tegap enggau projek 1MDB di Malaysia lalu bisi kaul enggau orang kaya biak Jho Low, ti dipelanja sida dikena ngambi bagi berebut meli gerempung hotel Claridge di nengeri London.

Tang, RGP, kompeni enggi anak tiri Najib Razak, iya nya Riza Aziz, udah kala madahka diri deka nyaman lalu nawa Sarawak Report dalam kot ketegal betanyakka pasal penatai duit wang turu berates juta dollar ti dipasukka ke dalam akaun kompeni nya dikena melanja projek ngaga filem ti tau dikaitka enggau bakih orang kaya iya, Jho Low, ti rindu ngulu pengawa berami.

Dalam surat saman sida nuju Sarawak Report ba bulan Satu tu tadi, Red Granite madahka diri nadai nerima sebarang bantu belanja "ti datai ari sapa-sapa ari menua Malaysia tauka sebarang orang ti benama Jho Low".

Tang penerang ti baru diatu datai ari RGP udah madahka pasal kaul dagang sida enggau Malaysia, terima kasih ke Aabar Investments lalu pengawa nya nunjukka ngagai Al-Husseiny ti diambi nyadika orang ti melanja RGP.

Dalam jaku randau seduai enggau New York Times, pengarang berita nya, Michael Cieply, dia Rizal enggau bakih iya Joey nerangka pasal Al-Husseiny nya semina beranakka puku dagang ngatika diri dalaam RGP lalu ukai nengah wang turu dalaam Aabar Investments, ti endur iya nyadika Kepala Eksekutif kompeni nya.

Dua iku bakih ari RGP nya nerangka seduai iya udah lama enda bemunyi laban Al-Husseiny enggai dipinta bala pengeluar filem ti bukai ari Hollywood!

Berita ti munyi tu udah muka ruang jaku tanya bekaul enggau janjang tanggungpengawa.
Tambah mega, Al-Husseiny meda diri besedia deka beranakka puku dagang enggau bala orang ti baru ngeluarka filem baka sida Riza enggau Joey, kelimpah ari tin gaga kaul dagang enggau bala orang ti endang lama udah lalu bisi peneleba ngeluarka filem.

Riza madahka iya betemu lalu bekelala enggau Al-Husseiny lebuh iya agi bekereja ba bank HSBC dalam pengelama dua taun di nenegri London sebedau 2008 suba.

Iya dipelabaka bisi nguji narit ati Al-Husseiny ngagai penau iya deka datai dalam dunya ngeluarka filem, laban ba maya nya iya endang bedau bisi kaul dalam pengawa bank melanja filem Hollywood.

Tang, enggau ngambi kira puku diri empu ba penyampau beratus juta dollar ari Al-Husseiny udah diperanakka, pekara pasal danjang tanggungpengawa patut disungkit, ti patut diperesi dulu.

Laban, nyadika siku Kepala Eksekutif dalaam kompeni Aabar, Al-Husseiny bisi kaul dalam dagang bebilion-bilion dollar enggau 1MDB lalu mega bisi kaul enggau Jho Low.

Kaul dagang tu udah nyungkak mayuh bendar jaku tanya di menua Malaysia, ukai semina udah bekau repot pekara belanja ke taun 2013 sida dikeluarka dalam bulan Lima tu tadi.

Kaul Aabar Investments dalam 1MDB udah ngujungka kaul Riza enggau Al-Husseiny nya rat agi.

Aabar Investments enggau 1MDB bisi kaul dagang ba pengawa meli kompeni kuasa karan ti diatur raban Goldman Sachs ti betuaika Tim Leissner enggau Robert Ng. Portal berita pengawa dagang The Edge madahka Leissner nya udah bekelala enggau bakih Riza, iya nya Jho Low

Tambah mega, Aabar Investments bisi disebut nyadika jamin ke siti bon ti dikeluarka 1MDB dikena sida meli kompeni stesyen pengeluar kuasa karan Tanjong ti dipejalaika Goldman Sachs dalam siti pengawa jual beli betutup, ti endur Sarawak Report bisi nyimpan siti surat penerang ke pengawa nya.

Goldman Sachs ulih ngaga penguntung ti mayuh bendar ari ti ngatur tanggam sempekat pengawa dgang tu, nitihka pansik kami.

Orang beguna bendar dalam pengawa nanggam sempekat bon dagang Asia Goldman Sachs enggau 1MDB, Robert Ng udah badu ari pengawa iya lalu numbuhka pengawa dagang iya empu.

Tang, baka ti direpotka bala pengarang berita pekara dagang, Robert Ng endang bisi pengelanding enggau pemanah kaul dalam politik lalu kala bekerja enggau Deutsche Bank ti endur iya kala ngatur sebengkah pengawa meli bon menua tasik chara belalai nengah Labuan ke Taib Mahmud Kepala Menteri Sarawak ti dulu suba, enggau projek SCORE iya.

Robert Ng enggau bakih rat iya dalam Goldman Sachs, Tim Leissner, bisi mega kaul ti manah enggau Riza seduai Jho Low.

Jho Low ditemu bisi nyadika penyungkak penumbuh selampur konsep 1MDB, bepun ari wang turu pemesai pengeraja Terengganu.

Jho Low mega bebakih enggau indai Riza Aziz, Rosmah Mansor iya nya bini Najib Razak.

Baka ni portal berita dagang The Edge ngaitka nama Tim Leissner ari Goldman Sachs, Robert Ng enggau Jho Low bisi tanggungpengawa ti besai dalam 1MDB. Aabar Investments nyadika bakih ke jamin pengawa nanggam bon Goldman Sachs ti dikeluarka dikena meli stesyen kuasa karan Tanjong

Ba sebengkah karang artikel New York Times dia bakih Riza dalam RGP, Joey McFarland udah didinga ngaku diri bisi kaul enggau kompeni Global Talent Booking, sebuah kompeni ti nyewa bala pelakon enggau penyanyi, nyengkaum Paris Hilton, ngagai sekeda pengerami. Joey mega madahka diri belabuh bekelala enggau Jho Low nengah atur pengerami ti baka nya.

Tu cherita ti bebida bendar enggau cherita ke terubah diberi ngagai Sarawak Report dalam surat lawyer ari kompeni RGP suba.

Kelimpah ari nya Joey diri empu nya orang dagang beranakka puku lalu ukai bekereja enggau kompeni penyewa bala pelakon tauka penyanyi, munyi ti dipadahka iya ngagai pengarang berita New York Times, ti endur iya madahka diri beranakka puku ba dagang jual beli tanah enggau dagang nengah restoran, lalu ukai dagang ngeluarka filem.

Dulu agi, Joey udah ngemba deka nyaman Sarawak Report laban madahka iya bekereja ke kompeni penyewa raban pelakon enggau penyanyi, lalu tu mih siti chara iya udah bekelala enggau Jho Low.

Ba surat lawyer iya ngagai Sarawak Report dalam bulan Satu tu tadi lalu Joey madahka iya enda bisi pengelandik dalam pengawa ngeluarka filem, siti ambu ti enda disebut iya maya ti berandau enggau pengarang berita ari New York Times minggu tu tadi.

"Terang bendar bula" – surat lawyer ari Red Granite dalam bulan Satu nyebut pengelandik Joey nya dalam pengawa ngeluarka filem lalu bebulaka penerang madahka iya bekereja enggau kompeni broker nyewa bala pelakon enggau penyanyi. Siti penerang ti enda sebaka lebuh berandau enggau New York Times minggu tu!

Enggau nya, kitai tau ngumbai Jho Low endang bisi kaul enggau Aabar Investments.

Dulu ari tu Sarawak Report kala mantaika repot baka ni Jho Low ngemai 1MDB tama nyadika wang turu dikena melanja baka ti disemayaka dikena nyukung iya berebut enggau orang meli gerempung hotel Clardge di nengeri London ba rega satu billion dollar.

1MDB mega bisi beranakka puku bepuluh juta euro ba pengawa mayar utang ba sebengkah atur dikena ngangkatka nama Jho Low enggau orang berebut meli reta nya.

Tang Jho Low mega dipelanja, nitihka pemutus pechara siku akim British, Akim David Richards, ulih Aabar Investments ti nyadika bakih dagang iya enggau 1MDB.

Akim David Richards suah bendar nyebut pasal pengawa berebutka lilung ke Jho Low enggau Aabar meli gerempung hotel Claridge di nengeri London

Kaul nya udah diterangka Jho Low empu dalam jaku iya ti nimbal berita ti dibantaika Sarawak Report ti madahka iya bisi kaul dalam pengawa nguji ngulihka pengawa meli reta ti disukung ngena wang turu ari 1MDB.

Penerang tu terang nunjukka penumbuh kaul entara Red Granite enggau Jho Low ti tukang belanja, ti mega bakih Riza Aziz.

Jho Low ditemu kala melanja pengerami di nengeri Las Vegas ke bala bakih baru RGP, nyengkaum pelakon Wolf Of Wall Street, Leonardo di Caprio.

Nya mega dikena ngamatka kaul entara penatai belanja RGP enggau apai tiri Riza (iya nya Najib Razak) dalam 1MDB.

Pengawa bebeula berita sebedau tu ari RGP diatu tau diperatika baru lalu kitai enda alit ati enggau sama ti dikeluarka sida ngena dua puchuk surat ngagai Sarawak Report lalu enda dikamatka sida.

Enggau gaya kaul tu, penerang ti penuh bekaul enggau penerang pengawa dagang Riza Aziz enggau Al-Husseiny diatu diguna orang mayuh di Malaysia, ti endang nyadika pun penatai belanja dalam wang turu 1MDB.

Orang Ti Melanja Filem Wolf Of Wall Street Bisi Kaul Enggau 1MDB Enggau Jho Low!

Orang Ti Melanja Filem Wolf Of Wall Street Bisi Kaul Enggau 1MDB Enggau Jho Low!

Recent Comments

Archive