Posted: 13 Aug 2014 05:19 AM PDT

Gambar tu nunjukka empas ari penusah ti disadang tau nyadi enti sema Tekat Bakun enggau Tekat Murum dituntung sebarang penanggul.

Penerang tu datai ari repot Environmental Impact Assessment (EIA) ti disediaka ngagai Sarawak Energy Berhad (SEB) dalam taun 2008, tang repot tu mengkang dilalaika nyentukka diatu.

Sebengkah pangka alun umbak baka dinding disadang deka anyut nelurus enggau naka peneras diayanka baka ti ngemenuhka sebuah rampa menua ba pemesai tiga ribu kilometre ti sepemanjai emperan Batang Rajang.

Alun umbak nya deka ngampuhka nengeri Sibu semina dalam timpuh beberapa jam aja lalu ngerusak sebarang utai ti dialunka teruju ai nya. Bah deka mengkang dalam beberapa hari, nitihka beberapa iti ripih charta ti diayanka dalam repot nya enti sema pengerusak ba tekat dua iti nya nyadi.

Charta nya mega nunjukka baka ni pemalat bah ngenyit deka mangkaka nengeri Sibu ti disadang menuhka menua ba penalam 15 meter lalu jauh ke ulu batang Rajang, tikas ai tau sepenalam bepuluh meter.

Pelilih menua di sepemanjai lebak batang Rajang bisi diwan enda kurang ari setengah juta orang.

Raban NGO rampa menua bisi kuasa ngayanka isi repot EIA ti dipelalaika nya, nitihka penerang ari Bank Dunya, EIA nya patut dikeluarka ngambika ditemu orang mayuh, ngambika orang mayuh mereti ke empas projek besai baka nya.

Diatu Sarawak Report udah mujur bulih siti salin repot EIA nya.

Repot EIA Tekat Murum nya nyadika sebuah surat bepenerang ti silik, nitihka pemutus runding enggau penemu bala orang ti landik ba pengawa ngaga tekat besai.

Repot nya udah dikarang sebuah kompeni ari menua Malaysia, Chemsain Consultant Sdn Bhd kenyau ari taun 2008, tang baka ti udah ditemu, madahka Kepala Menteri Sarawak ti dulu suba, Abdul Taib Mahmud enggau kompeni pengaga tekat ari menua China, Three Gorges Dam udah belabuh ngebom batu dikena ngaga jalai ai di Murum.

Repot EIA Murum nya udah mantaika penuduk tekat Murum nya tau nambahka sadang pengerusak ngagai tekat Bakun, ti nyadika tekat batu gaga ke-dua pemadu tinggi di dunya.

Murum didirika 70km ari ulu Bakun lalu disambungka ngena sebatang gaung sungai ti tinggi nuju danau Bakun ti udah diisika ai.

Pekara nya udah dipejuraika enggau lenak dalam Bagi 7 repot EIA nya.

Taja pan repot nya ngayanka enti sema pengerusak ba tekat RCC "disadang jarang tau nyadi" tang simpul penemu ba empas pengerusak tekat nya balat bendar enti sema pengerusak bisi nyadi ba tekat Bakun enti tekat Murum nya rusak dulu.

Repot EIA Murum nya madahka Murum tau nyadika amba ti balat agi empas ngagai tekat ti ari ili nya.

Siku orang ti landik pasal kuasa hidro ari menua Britain ti udah meresa isi repot nya, Dr Philip Williams, madahka ngagai Sarawak Report asil peresa iya ngayanka pemalat enggau pemesai penusah ti disadang tau nyadi enti sema Murum enggau Bakun nya rusak sereta pechah.

Bakun nya dulu agi digaga sebedau Murum ti besai bendar peluang tau rusak nya diperambuka.

Enggau nya, baka ti ditusui dalam repot EIA nya, Bakun enda digaga dikena napi sebarang tekan kuasa ai ti kelalu balat ari Murum.

Baka nya mega, projek Murum udah dipunka Taib Mahmud sebedau repot EIA nya dikeluarka, reti nya Murum tau nyadika amba ti tau rusak di sebarang maya lalu pangka ai iya tau ngempas lalu mangka tekat Bakun.

Repot EIA Murum 2008 meri jaku tangkan ti tumu dikena napi sebarang penusah enti sema tekat Murum enggau Bakun nya rusak sereta pechah.

Ke terubah, repot nya meri buah runding ngasuh pengawa mereka semua tukuh tekat Murum dipejalaika. Pengawa nambahka penegap tekat patut dipejalaika ngambika ngurangka penusah enti sema sebarang pengerusak tekat tau nyadi.

Udah nya perambu nya meri dua iti langgur "enti sema tekat nya pechah, tukuh tekat ti jai nya enda ulih diterima".

Nangkan ke nya repot nya ngasuh pengawa meresa penegap tekat Bakun dipejalaika dikena nyaga ari duju ai ti balat datai ari Murum baka atur pemindah orang mayuh ari kena duju ai ari ulu.

Ba pemayuh kes, jaku tangkan ti tumu ulih meri peluang ke orang mayuh ni maya patut ngelarika diri ari lebak ti deka diteruju ai bah ti mansang mangka.

Nama kebuah Taib mengkang enggai meri jaku tangkan ngagai rayat iya ti nguan sepemanjai sungai enggau lebak batang Rajang pasal pekara tu?

Tauka sekali ke jaku ari Tortein madahka "Murum nya likun" lalu enda patut dipetalatka?

Ketegal bukai nama kebuah SEB enggau perintah BN mengkang enggai ngeluarka repot EIA Murum nya laban penerang nya terang bendar tau nunjukka repot nya sebengkah pemula.

Taja pan dalam taun 2008 suba mensia mayuh udah dipadahka pasal Tekat Bakun enda ulih ngeluarka kuasa karan ngagai Semenanjung Malaysia, repot EIA Murum ti belalauka jaku bula nya madahka pengawa ngaga Tekat Murum nya deka dikena meri kuasa karan ngagai Semenanjung Malaysia.

Ba bulan nyin kemari Bakun diterangka semina ulih ngeluarka 50% pemayuh semua kuasa karan iya.

Tu mai reti Murum nya enda diguna ke Sarawak enggau mega 15 buah agi tekat ke bukai baka ti diperambuka program pengawa industri Taib Mahmud.
Endang baka ti disadang repot EIA Murum nya udah dipelalaika!

Kompeni sida Taib Mahmud sebilik udah bulih penguntung ti mayuh ari pengawa ngaga tekat nya, ngena duit ti diinjau perintah menua – lalu Adenan Satem mega sama bisi enggau masang entaruh dia.

Sarawak Report bisi bendar pengirau ati ke projek Tekat Murum ti udah diuluka kompeni ti agi baru dalam pengawa ngaga tekat ti dikemataka siku tuai menua ti udu korup sereta orang politik ti lebih kuasa baka Taib Mahmud.

Ke bedar iya Murum nya tekat ti ke terubah digaga di menua ari luar China dikereja kompeni Three Gorges Dam ari China lalu dipejalaika enggau chara belalai, udah bekau dikereja entara Taib enggau ipar iya empu Abdul Aziz Husain (CEO SEB maya nya) enggau perintah China, ngena duit jali ari menua China.

Kompeni Three Gorges Dam nya sebuah kompeni ti agi baru, udah bulih pindah teknologi ari menua barat, ti kala udah nembuka pengawa ngaga tekat Three Gorges ti balat kena bantah orang mayuh, meraka batang sungai Yangtze di China.

Diatu kompeni Three Gorges Dam nya bejalaika pengendali baru sida ba menua Sarawak lalu diatu dituntung mayuh penanggul, baka penusah rusak jalai ai enggau penimpang ba kipas injin ti sab-standard, ti ditemu enda patut dipasang, tang terus dipasang.

Enggau pemayuh utai ti dilalaika, nama kebuah agi bisi orang deka arapka jaku penerang ari CEO SEB Torstein Sjotveit ti madahka "Tekat Murum nya likun bendar"?

Enti deka macha enggau silik, peda Bagi 7 repot EIA nya klik ditu

Tekat Murum “Tinggi Peluang Tau Mai Penusah Besai” – Repot Ofisyel

Posted: 13 Aug 2014 01:01 AM PDT

Bup sarang gambar enggi siku enjinir New Zealand nunjukka asil perati iya ba pengawa ngulihka kayu batang nya 'rampa selama' dipeda di pelilih menua Murum

Diatu Sarawak Report ulih mantaika repot penuh EIA Murum ti dikeluarka dalam taun 2008 ti dikumbai "Tinggi Peluang Tau Mai Penusah Besai" ba beberapa iti kategori bekaul enggau pekara pengelikun.

Repot EIA Murum nya terang bendar nusui pasal penanggul tanah betakat ba ulu Sungai Murum, ti dibai pengawa ngulihka batang, nyadika siti ketegal tekat Murum nya tentu deka dituntung penusah tekat runtuh ba dudi hari.

Penusah ti disadang tau datai ari Murum dudi hari nya, nitihka repot EIA nya deka ngujungka pengeruntuh Murum deka ngerampit Bakun lalu deka munuh enda kurang ari setengah juta iku orang ti diau sepemanjai lebak batang Rajang enti sema penusah nya nyadi.

Sarawak Report diatu udah bulih siti rekod jaku randau enggau penerang ari Direktor Projek Murum, iya nya enjinir ari kompeni Hydro Tasmania, Andrew Pattle, ti endur iya bisi ngaku pengawa orang ngulihka kayu batang ba kandang kampung dikena nani ai ujan di ulu Murum tentu deka ngujungka tanah enggau keresik deka begempuru ba lubuk danau tekat ti tau bendar ngujungka penusah bah besai ngenyit lalu mechahka sereta ngeruntuhka tekat nya dudi hari.

Tang taja pan udah nemu pasal penanggul ba tekat Murum, tuai politik Sarawak, Taib Mahmud enggau kompeni SEB ti dikemataka iya udah ngambi pemutus penemu neruska pengawa ngaga tekat nya ti didirika ari ulu tekat Bakun.

Ke 'guna tanah' bacha pasal pengawa ngulihka kayu batang!

Repot EIA Murum nya udah dipelalaika nyadi sebengkah entelah ba pengelama beberapa taun, tang diatu udah dibantaika nengah laman Sarawak Report ngambik tau ditemu mensia mayuh.

Pengerusak enggau tekat runtuh disadang tau nyadi nya udah dikumbai 'jarang tau nyadi' tang enti sema penusah nya nuntung, pengerusak besai deka munuh mayuh utai tumbuh, utai idup enggau mensia ti di sepemanjai lebak batang Rajang

Selampur isi repot nya, penerang nya udah disimpulka. Sadang penusah runtuh ti tau nyadi ba Tekat Murum nya baruh bendar (seagi-agi iya digaga enggau betul), tang pemalat empas pengerusak nya, enti sema iya pechah, tau bendar ngenakutka semua orang.
Sadang tekat runtuh nya mega ngambi kira gusak tanah berenyang ba kandang menua di Murum nya. Taja ba kandang menua nya nadai kala didinga berita pasal gusak tanah berenyak, tang enti sema gusak tanah bisi nyadi, penusah tekat pechah nya mega tentu ngenakutka ati semua orang.

Gusak tanah berenyang ti tau diperagam dulu

Pia mega pengerusak ari penusah runtuh tekat Bakun enggau Murum nya tai bendar ngerusak semua utai tumbuh, utai idup di sepemanjai lebak batang Rajang.
Diatu sungai nya udah balat bendar langkang ketegal pengawa ngisi danau tekat lalu udah terang bendar ngerusak semua utai idup enggau utai tumbuh, baka ti dikirauka dalam repot EIA nya.

Pengerusak ti disadang tau mai penusah besai!

Taib Mahmud nadai nunjukka pengirau ati iya ba repot EIA Murum kenyau ari taun 2008, taja pan repot nya nusui pasal pengawa ngurangka rampit penyakit ti tau nganu nyawa.

Empas penanggul ari kena rampit penyakit, tang Taib mengkang majakka projek gila iya

Penerang tu deka nejuka rayat deka nemu nama ketegal ti dipansutka Taib ti keran bendar ngaga tekat ti nadai tuju ti nyengala?

Ingat, tuju ngaga tekat, baka ti udah diterangka ketegal ti beduduk ba peminta udah ditemu ngundan pemula.

"Peminta" ba guna tekat Murum nya laban semua kuasa karan nya dilanggur dianjung ari Bakun ngagai menua di Semenanjung Malaysia. Penemu ti baka tu enda masuk akal ari segi teknikal lalu Bakun semina ulih ngeluarka 50% ari semua kuasa karan ke bendar, lalu Murum endang enda ibuh dipejalaika.

Enggau nya, nama kebuah enggai enda ngaga tekat Murum?

Palan penyampur simin di Murum

Andrew Pattle, Kepala Projek ari kompeni Hydro-Tasmania ti diinjau bekereja ke Murum udah terang bendar madahka tuju ngaga tekat dalam sebengkah symposium raban enjinir di New Zealand dalam taun 2012 suba.

Dalam symposium nya iya udah madahka ngagai bala enjinir ti landik dalam pengawa ngaga tekat siti ari pemar ngaga tekat di menua Sarawak nya pasal bekal simin, laban pengawa ngaga enggau ngeluarka simin nya dikuasa sebengkah kompeni aja lalu simin ti diguna nya mayuh bendar.

Dagang nengali nya endang diberi Taib Mahmud ngagai kompeni sida sebilik aja, CMS!

Sekali agi kami deka betanya nama kebuah projek nya tau dikemendarka, kelimpah ari ti nentuka sekeda orang ti kaya beentaruhka pengelikun orang bukai?

Klik ditu ke repot penuh:

Bagi 1
Bagi 2
Bagi 3
Bagi 4
Bagi 5
Bagi 6
Bagi 7

Najib Berunding Deka Nguna Pemesai Ratu England!

Posted: 13 Aug 2014 12:41 AM PDT

Laman berita Malaysiakini nuliska siti repot ti ngenyitka ati orang mayuh

Sarawak Report ulih meri saut ngagai beberapa iti jaku tanya ti udah ngasuh sekeda orang Malaysia nyadi bingung.

Nama kebuah Kot Perintah Besai udah enggau beguai-guai ngubah timpuh bechara ke kes Anwar Ibrahim kena 8hb enggau 9hb Semilan tu, taja pan lawyer iya benung kemisi ketegal sakit nyentuk ngagai bulan Sepuluh nyin ila?

Ba pun pengawa tu kot udah enggai ngubah haribulan udah bekau napi jaku bantah, tang udah nya kot nya besetuju matak pulai langgur sida udah ti enda ulih mutarka penanggul nya.

Kami bisi nemu nama kebuah semua haribulan nya dipilih laban Najib udah merambu deka ngemasukka munsuh politik iya, Anwar Ibrahim, ngagai rumah jil ba timpuh ti lama sehari sebedau iya nemuai ke England betemu enggau Ratu England ba Istana Windsor, laban ngulu sebengkah pengerami ti ditagaka dikena ngangkatka pemanah nama iya ti nyadi tuai menuai 'Islam ti jelan'!

Enggau chara tu Menteri besai Najib merambu deka nguna Ratu England nya ti mega nyadika Kepala Komanwel dikena iya meri siti kelai meri Najib pemendar becharaka munsuh besai iya dalam politik enggau mega sangkal penemu iya ngaga pendiau beleman sama bansa – tambah mega Najib endang deka nekanka Anwar nya salah beleman sama penempa.

10hb Semilan nya endang udah diletak Najib dalam bup iya lalu haribulan nya enda tau enda dikingatka iya.
Tambah mega, bini Rosmah Mansor enda ngemendarka iya puntan ngulu pengerami gerempung pengasih, ti endang seruran digulu iya di sebarang endur di serata dunya tu.

Tiket udah abis dijual – gerempung dagang Tatler Malaysia bisi ditemu nyual siti tiket nya belabuh enggau rega RM20,000!

Pengerami nya ditagaka dikena ngayanka baka ni gari orang Islam tau dikumbai, munyi ku penemu Rosmah empu, "seksi"!

Enti nitihka pematut iya gari ti dikena orang indu Islam enda tau seksi, tang pengerami ti baka tu suah bendar ngasuh orang mayuh saru runding, lalu bala orang pereka fesyen enggau bala model ari menua barat endang mayuh agi dikangauka ngambika ngiga bansa gari ti tau nyadika teladan.

Agi berupai seksi – Rosmah, maya begambar ba Pengerami Ngayanka Fesyen Islam di UK dalam taun 2012 suba

Rosmah meda pengerami iya nyadika sebengkah chara ngangkatka pemanah nama tuai Malaysia ba menua barat ti ngembuan penyelan runding lalu rinduka raban diri ngelaban penemu fundamentalis.

Berebak enggau nya iya dipeda mujur ngena pengerami nya nyungkak pengingin sosial iya, ti ditujuka iya ngagai raban bensawan sereta nentuka asil jual tiket nya dipasukka dalam wang turu ti dikedekaka sida.

Chara tu belabuh ari pengawa ti melayan Putera Albert ari menua Monaco dalam taun 2010 suba, ti endur bank di menua putera nya dipelabaka udah nyadi palan nyimpan duit ke bala orang kaya-kaya ari menua Malaysia enggau Sarawak, ti udah berebak-rebak mindahka duit simpan sida ari menua Switzerland.

Bala kroni kayu batang ari menua Sarawak udah dipejal Kepala Menteri Sarawak ti dulu suba, Taib Mahmud, ngambika melanja pengerami nya ngarika Rosmah, lalu Rosmah udah ulih nyuaka pemeri ngagai Putera Albert enggau sekeping chek beungkus €100,000 ngagai wang turu Rampa Menua ba pengujung pengerami nya.

Iya ti bendar, sida Hii sebilik, iya seraban ari kompeni ti ngulihka kayu batang ari kampung Borneo di Sarawak, udah dipinta melanja chek nya taja pan Hii endang dikelala enggau pendiau ngerusak rampa menua.

Udah beambi ulih ba Putera Albert, diatu Rosmah nguing ngagai raban Ratu England sebilik lalu dua bengkah Pengerami Ngayanka Fesyen Islam ti diatur ba tengah-tengah rangkah tulang dinosor ba Muzium Cherita Lama London lalu diatur Ratu Raja Edward, iya nya Sophie Wessex.

Dinosor nyadika latar endur ngayanka fesyen Islam …

Sophie nya diatu nyadi sebagi ari raban Ratu England di menua UK udah mangku pengawa nyadi Duta Global ke wang turu Duke of Edinburgh.

Asil ari jual tiket ba pengerami ngayanka fesyen Islam ba taun 2011/12 nya endang dikena melanja!

Temuai dipebasa ke pengerami nya – Kate Middleton

Enggau nya, ba 2014 tu, engkeman bendar mih pengeran ati Rosmah Mansor.

Udah bulih pemanah ari wang turu ti datai ari pengerami baka tu, Ratu England bisi berupai besetuju nyadi tuai gawai kali ketiga ba Istana Windsor empu!

Maya iya? 10hb Semilan baka ti udah ditimpuhka ngagai bala pengabang, laban jaku tesau ngagai pengerami nya udah dipejalaika beberapa hari tu udah!

Diatur Sophie Wessex ngambika pemanah Pengawa Pengasih Duke of Edinburgh

Duchess of Cambridge deka nyadika patron lebuh pengerami nya ila, nitihka penerang ari Tatler Malaysia. Tu nyadika pengerembai penemuai iya ke menua Malaysia taun nyin kemari, ti endur Rosmah udah meri iya siti marik mutiara ari tasik selatan.

Taib enggau sida Hii sebilik begambar begulai enggau Rosmah ba pengerami Fesyen Islam di menua Monaco – tambah mega sida Hii nya ti mansutka belanja dikena melanja pengerami nya!

Tambah mega, bala kroni politik BN udah nyungkak rega tanah enggau rumah di London ba ujung taun nyin kemari, lebuh sida mindahka aset besai sida sebedau PRU13, ngujungka sida nyadi raban orang ti meli reta pemadu besai.

Terang bendar Opis Menua Luar benung numpuka perening ngagai pengawa menua Malaysia ngeregaska pengawa dagang Britain enggau pengawa beranakka puku dagang Malaysia, lalu madahka ngagai Ratu England, penemu nya engkeman.

Lalu kompeni besai sawit Sime-Darby enggi Perintah Malaysia bisi meli projek pemansang Stesyen Kuasa Karan Battersea.

Lalu, baka ti disadang mega Ratu England nya udah setuju ke pengerami fesyen nya diatur ba istana Windsor dikena meri peluang ngagai perintah enggau rayat Britain ngayanka penyinu ati sida ngagai orang Malaysia bekaul enggau penusah penerebai bilun taunt u.

Tang nyentuk ke pagi tu, sekali ke Rosmah tauka pemantu iya nemu pengawa Najib Razak udah merambu deka ngemasukka Anwar Ibrahim sehari kejang deka ngulu pengerami!

Sophie deka sama dalam pengerami nya … tang baka ni orang ti endang beempu Istana Windsor – Ratu England deka datai?

Opis Menteri Luar udah dipadahka kes pechara Anwar udah tembu enggau atur akuital iya ba Kot Tinggi.

Pechara ti lama nya endur akim mutuska sereta madahka kot nadai penerang ti tegap dikena nuduh penyalah tuai penyakal nya.
Sepenembu pechara nya kot udah dipeda dipalit pengamah ketegal tuduh diubah ari 'penyalah masung' ngagai penyalah beleman sama penempa.

Anwar Ibrahim endang bedau ditekanka salah ba penyalah tu, ti endur penyalah beleman sama penempa nya enda agi dikumbai salah berat di menua demokrasi bukai.

Tang perintah mengkang enggai nerima akuital kot nya lalu perintah sekali agi ngapil kes nya ngaga kot perintah besai.

Ba system undang-undang British endang nadai udah apil dikenataika udah pechara nya ditetapka nyadi akuital, semadi kes nya nyelai lalu bisi penerang ti baru dipansutka udah nya.

Tang dalam menua Islam ti ngena perintah demokrasi ti jelan Najib, undang-undang ti dikena ba Anwar udah diubah sepeneka ati perintah.
Tang udah bekau Anwar madahka juluk ati iya ti deka enggau berebutka penuduk Kepala menteri di Selangor, Kot Apil lalu nemu iya bepenyalah, dalam timpuh setengah jam ti endur pemutus nya diulih ba sepagi nya.

Ratu enggau Duke England deka nyeliahka diri ari datai ngulu pengerami ti diatur ba istana seduai – tauka seduai deka ngelaluka penemuai siku tuai menua komanwel ti baru udah ngemasukka munsuh politik iya dala rumah jil?

Kot Perintah Besai nya kot ti pemadu tinggi, nya mudah agi kena atur tekan politik lalu nadai siku orang di Malaysia enda ngumbai Anwar nya deka tetap ditekan ngena penyalah beleman sama penempa.

Kes tu nyadika siti penyalah ti endang ditempa-tempa ngambika raban pengundi Islam belalauka moral, lalu nya kebuah Anwar ti kelalu dikerinduka orang nya udah ditekanka dua kali.

Udah tembu 5 taun dalam rumah jil, semua tuduh nya dibatak ari penyalah ke terubah iya. Reti nya ngelama tu iya nadai salah.

Tang ke sekali tu raban penawa sida Najib udah enda ibuhka preseden ti dulu lalu ngapil ngagai Kot Apil laban enda ngetanka Anwar lama agi!

Kot Apil udah ngenataika peminta Najib lalu netapka Anwar nya besalah, tang pengawa ngejil Anwar dalam pengelama 5 taun enda sempat ngasuh Najib nya duduk jenuh.

Mujur tauka enda Najib ngengkah Ratu England ba pengawa diplomasi ti tau meri iya pemalu, sekali ke pechara kes Anwar nya dipejalaika udah pengerami tauka sebedau?

Ukui haram, munyi ku penemu sekeda raban menteri dalam perintah Najib

Sekali ke Ratu England nya deka ngelaluka penemuai temua ari Malaysia, lalu ngamatka pechara ba kes Anwar, tauka ratu nya deka mai bala ukui iya pulai ngagai Istana Balmoral tauka Sandingham, lalu nejuka Kate enggau Sophie berami enggau bala temuai iya?

Baka nya, Najib deka ngayanka diri ba tengah panggau ba tengah sida ratu sebilik sebaka enggau gaya Mugabe ngelaban munsuh politik ita, ti udah seninjik bendar bulih undi mayuh agi ari iya ba PRU13 suba.
Engka orang British patut tedani ari peninduk sida pasal utai ti nyadi di Malaysia?

Tu mih tui enggau entaruh siku nembiak sekula ti udah belajar di Britain ti mega anak Menteri Besai Malaysia ke dulu suba, ngelama tu, ngulihka ati bala penyukung iya di Washington enggau London, berebak enggau malit pengamah ba reti ti bendar demokrasi enggau kuasa pengelantang mensia, tiap kali iya ngasaika penuduk diri teguyat.

Tang, bala orang di Britain patut nemu, lebuh deka ngaga kaul enggau Najib Razak, iya ukai siku tuai menua ti tau dikarapka.

Najib Razak

“Tekat Ti Disadang Tau Runtuh” – Jaku Tangkan Ti Dilalaika!

“Tekat Ti Disadang Tau Runtuh” – Jaku Tangkan Ti Dilalaika!

Recent Comments

Archive