» »Unlabelled » Jalai Ulu Skrang udah 80 peratus tembu digaga BorneoPost Online | Borneo , Malaysia, Sarawak Daily News » Berita Iban - New 2 Borneo

05:06:00

Jalai Ulu Skrang udah 80 peratus tembu digaga BorneoPost Online | Borneo , Malaysia, Sarawak Daily News » Berita Iban - New 2 Borneo

Jalai Ulu Skrang udah 80 peratus tembu digaga

Posted: 15 Aug 2014 09:15 AM PDT

ENGKILILI: Kaban Kunsil Nengeri (ADUN) Engkilili Dr Johnnical Rayong Ngipa madahka projek ngaga Jalai Ulu Skrang diatu udah manggai 80 peratus tembu digaga.

Ku iya, projek jalai alun ke panjai 50 kilometer sereta beungkus RM27 miliun deka meri pengelantang ngagai peranak di Ulu Skrang.

Ku iya karan 24 jam enggau bekal ai beresi mega ulih disambung ngagai peranak ba kandang menua nya enti sema jalai alun nya udah tembu endar digaga.

"Naka ke diatu, karan 24 jam semina udah datai disambung naka Rumah Dudong, Murad sereta deka terus disambung nyentuk ke Ulu Skrang enti jalai alun nya udah tembu digaga ila ," pia ku iya.

Iya bejaku munyi tu ba Pengerami Nyuaka Cek Pampas Tanah Projek Jalai Ulu Skrang Fasa II Opis Tanah enggau Survei (JTS) Sri Aman di Rumah Brown Gengging, Lubok Tabau, ensanus.

Seraban 58 iku peranak ari Lubok Tabau, Sungai Pinang, Pinchoh, Darai enggau Nanga Entalau di Ulu Skrang nerima chek pampas RM165,918.20.

Iya mega ngelalau peranak menua nya bekempit enggau perintah Barisan Nasional (BN) ti ngemeratka pemansang rayat.

Ku iya, Kepala Menteri Tan Sri Datuk Amar Adenan Satem udah madahka diri deka ngemeratka pemansang di menua pesisir.

" Tu berita manah ngagai peranak di menua pesisir.

" Pechaya meh ke BN lebuh ti bejalaika mayuh bengkah projek pemansang ngagai rayat," ku iya.

Bela bisi ngulu pengerami nya, Ketuai JTS Bagi Menua Sri Aman Doris Synier, Injiner Bagi Menua JKR Sri Aman Cassidy Morris, pengari SAO opis Residen Sri Aman Crispin Francis, Penyelia JASA Parlimen Lubok Antu Jeoffery Baja Ricky Maba engagu bala ketuai raban bansa.

Print Friendly

Berita nya semina ditempa sengapa, ku Dr Noor Hisham

Posted: 15 Aug 2014 09:15 AM PDT

KUCHING: Opis Menteri Pengerai udah ngaga riput polis senentang sebengkah penerang ti dikerembai dalam media rama 'Facebook' ke nuduh seiku nembiak peranak menua tu bisi dirampit penyakit Ebola.

Direktor Besai Datuk Dr. Noor Hisham Abdullah madah, Malaysia enda ngelalai sebarang kes ke bekaul enggau penyakit Ebola enti penyakit nya amat bisi ditemu diidap peranak menua tu.

"Malaysia ke ngaul diri dalam Gerempung Pengerai Dunya (WHO) enda deka ngelalai sebarang kes berat.

"Dua tiga hari tu kitai bisi meda berita ke dipandang ba Facebook ke alai seiku nembiak diperita benung betapi enggau penyakit Ebola. Nembiak nya engka kena ai angat lalu nadai kes ebola dirikut di menua tu naka ke diatu.

"Enti bisi kitai deka mansutka penerang lalu pekara nya enda tau dilalai laban kitai ari baruh WHO,"ku iya.

Iya mansutka jaku tu ba sebengkah aum enggau pengarang berita pengudah bejadi "TransBorneo Wound Congress 2014' ke diatur ba sebengkah hotel tebilang ditu, kemari.

Ketegal nya, Noor Hisham madahka riput polis udah digaga senentang pengerembai penerang ke bula ti sengapa digaga ngambika dipansik.

Ku iya, pengerembai penerang ke baka nya di Facebook tau endar ngeruga pengelikun pendiau rayat Malaysia enggau nadai tuju ke bebatang.

"Enti kes nya amat bisi nyadi, orang sakit deka diperesa enti bisi kelai dirampit penyakit Ebola, pekara nya deka dipansik enggau silik di kelinik tauka sepital ke lebih agi orang ke datai ari menua ti betapi enggau Ebola.

"Enti positif, kitai deka mansutka penerang lalu atur ke patut deka dipejalai,'ku iya nambah.

Ngenang kaul bukai, Noor Hisham ngansak semua peranak Malaysia berakup ngemunaska penyakit denggi.

Ku iya, taja pan penyampau kes enda majak nambah tang penyakit nya udah mayuh ngelekai ba mayuh kandang endur.

Semua orang gawa di opis pengerai diansak matau penyakit denggi enggau silik begempung enggau ejensi perintah ke bukai.

"Iya ke pemadu berat iya nya kitai semua patut nentuka pemeresi kandang endur ke alai kitai diau manggai ba ikas ke pemadu tinggi.

"Pemeresi kandang endur ke alai diau deka nentuka kitai enda dirampit sebarang bengkah penyakit,"ku iya.

Print Friendly

DAP deka ngaga jematan gantung ke peranak menua Sg Tanduk

Posted: 15 Aug 2014 09:15 AM PDT

KUCHING: Sebengkah agi projek nengah inisiatif DAP Impian Sarawak deka dipejalaika di Sri Aman, ke alai sekali tu sida deka ngaga jematan gantung dikena meraka sungai Batang Undup.

Mandal chairman DAP Sarawak, Leon Jimat Donald madahka parti nya udah betemu enggau peranak Genturung Pendiau Sg Tanduk di Batu Lintang semak Simanggang, madahka sida deka ngaga jematan gantung dia laban perintah lalu nadai ngaga jematan nya ke sida.

Ku Leon, peranak menua udah minta digagaka jematan gantung dikena meraka sungai Batang Undup ngagai tanah seberai, ke alai sida merambu dekka numbuhka ladang sawit nengah chara ke mit.

"Tanah sida ba seberai sungai nya mengkang puang. Nya alai laban tebal agi orang ti ngempu tanah nya bisi ati deka masuk dalam sekim ngemansangka tanah ti dipejalaika LCDA (Opis Pengintu sereta Ngemansang Tanah ), nengah pengawa nanam sawit kediri.

"Taja pia, laban jematan gantung ke disemaya perintah Barisan Nasional lalu apin digaga, sida lalu bedau berengkah nanam sawit nya," pia ku Leon, ke mega ketuai DAP Sri Aman.

Ku iya, begulai enggau raban tim volunter Impian Sarawak ti betuaika Kaban parlimen Serdang, Dr Ong Kian Ming, sida udah meresa palan endur ngaga jematan gantung nya minggu seiti nyin tadi.

Jematan gantung nya deka digaga nengah belanja ke diberi mensia mayuh sereta mega digaga nengah chara beripai, ku iya.

"Enti BN enda ngaga jematan gantung nya, peranak menua minta DAP ngaga jematan nya nengah program DAP Impian Sarawak, ke alai nya inisiatif parti kena tama ngagai menua pesisir ti deka nyendiaka penyikap perengkaguna ngagai peranak di menua pesisir," pia ku iya.

Berebak enggau nya, seiku peranak menua nya, Tinin Anyang madahka perintah BN suah endar udah besemaya enggau sida deka ngaga jematan gantung nya ninting kali maya bisi pengawa bepilih, tang nyentuk ke sehari tu lalu enda digaga.

Tinin mega enggau ati ke lantang meri sebagi ari tanah iya dia endur ngaga jematan gantung nya.

Print Friendly

Opis bekuasa diperansang ngatur pengerami begulai enggau komuniti

Posted: 15 Aug 2014 09:15 AM PDT

KUCHING: Semua 23 buah opis bekuasa di nengeri tu diperansang ngatur program begulai enggau komuniti kelebih agi nyerumba pengerami besai di menua tu, dikena ngangkatka agi pemaik, pengelantang enggau penyerakup.

Menteri Kunsil Kandang Menua enggau Pemansang Raban Bansa Dato Sri Wong Soon Koh madah, nya ulih dikena ngerapitka agi kaul opis kunsil enggau komuniti enda ngira bansa enggau jalai pengarap.

Iya temegah ati sereta muji Majlis Bandaraya Kuching Selatan (MBKS) ti chakah ngatur program tauka pengerami begulai enggau komuniti baka berebak enggau Hari Raya tauka pengerami besai ke bukai.

"Pemaik enggau pengelantang ke dikembuan enda ngira bansa enggau jalai pengarap di Sarawak patut ditan sereta dikemerat ke tuju penyerakup rama, ti ukai semina pulaika penguntung kitai diatu tang mega ke jemah ila ngambika majak mansang agi, lantang sereta beserakup.

"MBKS chunto ti pemadu manah lalu aku ngarapka 23 buah opis bekuasa di nengeri tu ke ari baruh pegai opis menteri aku ngatur program tauka pengerami ti sama baka ke dipejalaika MBKS, kena nempa penegap komuniti kelebih agi maya pengerami besai," ku iya.

Wong mansutka pekara tu lebuh ngulu sereta bejadika Majlis Ramah Tamah Aidilfitri MBKS begulai enggau Komuniti 2014 ke diatur ba Lobi MBKS ditu, pagi kemari.

Nandu baru iya ngarapka pemaik enggau pengelantang ke dikemeran sereta dikemeratka pupu bansa enggau jalai pengarap di nengeri tu ulih majak ditanka.

Penyelai menua Sarawak ti ngembuan mayuh bengkah pupu bansa enggau jalai pengarap ke ulih beserakup, pekara ke asal sereta lama udah nyadi, patut terus ditempa sereta ditanka, ku iya.

Ba pengerami nya Wong mega ngemataka 72 iku pengereja pengawa MBKS ke ada dalam bulan Ogos nyambut hari pengada, ti keterubah iya diatur MBKS.

Bisi ba pengerami nya kemari Menteri Muda Pemansang Raban Bansa Datuk Peter Nansian, Datuk Bandar MBKS Datuk James Chan enggau ke bukai.

Print Friendly

Gempuru UPP keterubah endar diatur seharitu

Posted: 15 Aug 2014 09:15 AM PDT

KUCHING: Parti Rakyat Sarawak (UPP) keterubah endar begempuru sehari tu nerangka tuju, juluk enggau kuing penumbuh parti nya ngagai rayat kelebih agi ngagai orang ke bisi ati nyadi kaban sereta penyukung UPP.

Chairman komiti protem UPP Dato Sri Wong Soon Koh lebuh ke dikerandau kemari madahka pengawa begempuru nya deka nyadi pemun singkang ngagai UPP ngenukuka kuing sida ungkup rayat.

"UPP dipenyadi kena 17 Julai tu tadi pengudah dikemendar Opis Pengerejister Gerempung (ROS) kena 14 Julai 2014.

"Pagila (sehari tu) kami deka begempuru nerangka tuju, juluk enggau kuing UPP ke lalu nyadi pemun baru ngagai UPP," pia ku Wong ke nyadi Kaban Kunsil Nengeri (ADUN) Bawang Assan sereta mega Menteri Pekara Wang Kedua enggauKunsil Kandang Menua.

Ku Wong baru, kelimpah ari iya empu enggau tiga iku agi ADUN dalam UPP baka ADUN Bengoh Datuk Dr Jerip Susil, ADUN Engkelili Johnical Rayong enggau ADUN Opar Ranum Mina urung empat tauka lima iku pengari ari sekeda pampang deka ngulu gempuru nya sehari tu.

"Pengudah gempuru nya kami deka numbuhka 23 iti pampang UPP di serata menua Sarawak lalu pengudah dikemendarka ROS, tetiap pampang deka ngatur Aum Besai Ninting Taun (AGM) ngambika Aum Besai Pengari Tiga Taun Sekali (TDC) ulih diatur dalam kandang tiga bulan tu," ku iya baru.

Ba pengawa begempuru ke diatur ba Ringkat 9, Crown Tower sehari tu, Wong deka bejaku ngarika raban bansa China lalu Dr Jerip bejaku ngarika raban Bumiputera.

Sebedau UPP dipenyadi kena 17 Julai tu tadi, Wong enggau Dr Jerip, Johnical sereta Ranum bisi ati deka tama Parti Tenaga Rakyat Sarawak (TERAS) pengudah ditingkil ari Parti Sa'ati Rakyat Sarawak (SUPP).

Taja pia, pengudah ke berandau enggau ketuai TERAS Tan Sri William Mawan Ikom, sida mutuska penemu gawa nyadi seiti raban nengah pelasar ke bebida.

Mawan enggau empat iku agi ex- Kaban Parti Demokratik Progresif Sarawak (SPDP) iya nya ADUN Tasik Biru Datuk Peter Nansian Ngusie, ADUN Marudi Datuk Sylvester Entri Muran, ADUN Bukit Danau Paulus Palu Ngumbang enggau ADUN Bekenu Rosey Yunus mengkang dalam TERAS, tang Wong enggau tiga iku agi ex- kaban SUPP tama UPP.

Print Friendly

Latih 1MCC- Astro Kem Bola dipejalai ngelama dua hari berengkah ari seharitu

Posted: 15 Aug 2014 09:15 AM PDT

KUCHING: 1MCC – program Astro Kem Bola deka diatur ditu belabuh ari sehari tu (16 nyentuk ke 17 Ogos) bejalaika latih ba Padang D, Jalai Stadium, Petrajaya berengkah ari pukul 7.00 pagi.

Nitih penerang ti dipansut ensanus, program nya ungkup taun tu berengkah dipejalaika di Kota Kinabalu, Sabah kena 9 nyentuk ke 10 Ogos tu tadi ke alai latih ngelama dua hari nya udah dipejalaika ba Kompleks Lumba enggau Main Likas.

Urung 200 iku udah ngerijista deka belatih enggau jurulatih profesyenal ari 1MCC.

Nambahka nya, tebal agi nembiak ari projek Astro Kasih Hostel ari SK Magandai, Kota Marudu enggau SK Malinsau, Ranau udah diberi peluang mandangka pengelandik sida bemain ba Kem Endur Milih di Kota Kinabalu kena Hari Minggu nyin tadi.

Nembiak lelaki enggau indu ke beumur 10 nyentuk ke 12 taun ke bisi ati deka masuk program tu tau ngerijista diri nengah www.astrokasih.org/kembola ngambika sida nemu endur latih nya dipejalaika.

Bisi 64 iku penyereta ke landik bemain deka dipilih masuk Advanced Training Camp ke deka diatur di Kuala Lumpur.

Ba tikas nya, penyereta deka diberi latih intensif bemain bol, ngemeratka kerejasama dalam tim enggau pekara ke manah nengah program 1MCC's Education Through Football (ETF).

Udah nya 32 iku nembiak lelaki enggau indu deka dipilih masuk Program Belatih Di Menua Tasik ke alai sida bisi peluang diberi latih ba tikas akademi sereta bemain sechara besemekih nengah tusun friendly matches di menua tasik din ila.

Program 1MCC – Astro Kem Bola diatur Astro Kasih begempung enggau 1MCC Sports Sdn Bhd (1MCC) kenyau ari taun 2012.

Nengah program nya, Astro ulih terus ngelala nembiak ke landik bemain sereta ngintu sida ari tikas belabuh ari agi biak nengah tusun program latih sereta bemain sechara besemekih ba tikas antarabansa.

Pengudah bejalaika latih di Kuching, program nya deka dilanjarka ngagai Ipoh, Perak kena 13 nyentuk ke 14 September ditangkanka ba Kuantan, Pahang (belabuh 21 nyentuk ke 20 September), Seremban, Negeri Sembilan (28 enggau 29 September) lalu ke penudi endar dipejalaika di Kuala Lumpur (10 enggau 12 Oktober).

Print Friendly