Kemeratka pengelikun nembiak sekula, ku Baru BorneoPost Online | Borneo , Malaysia, Sarawak Daily News » Berita Iban - New 2 Borneo |
- Kemeratka pengelikun nembiak sekula, ku Baru
- Kerejasama entara IPT, kompeni peribit nyaup nyungkak ekonomi nengeri
- KM seruran ngemeratka pengelantang rayat
- Peranak menua ngelingi Projek Tekat Ai Bengoh mutus enggai pindah
- Seminar diatur DBKU kena ngiri penemu ngagai konteriktor ba pengawa ngemanahka landskap
- Ejensi KKMM patut ngemeratka peneka rayat
| Kemeratka pengelikun nembiak sekula, ku Baru Posted: 14 Aug 2014 09:06 AM PDT JPNS dipinta ngemeratka penyikap perengka guna, kereban bukai di SK Long Sebangan, Long Tuma KUCHING: Opis Pelajar Nengeri Sarawak (JPNS) dipinta ngemeratka pengelantang sereta pengelikun nembiak sekula primari di SK Long Sebangan enggau SK Long Tuma, ti betapi enggau pengurang perengka guna sereta kereban bukai di sekula nya. Nitih pnerang ari Kaban Kunsil Nengeri (ADUN) Ba'Kelalan Baru Bian, SK Long Sebangan amabika banding betapi enggau penanggul bekal ai beresi taja pan semina enda kurang ari 10 kilometer ari bandar Lawas. "Bisi batang paip besai disambung ngagai Long Sebangan ari bandar Lawas tang sekula primari nya enda disikap ngena batang paip ai beresi nya. "Tu ngujungka sida betapi enggau penanggul deka ngulihka bekal ai beresi ti chukup," ku iya ba aum pengarang berita ditu, kemari. Kelimpah ari nya, Baru ti mega Chairman PKR Nengeri madah, SK Long Sebangan mega betapi enggau penanggul agu nembiak ti bemalam (buding) di sekula nya. Kebuah pia ku iya, laban penyauh entara agu enggau buding sekula nya kelalu jauh. "Tu ngujungka nembiak ke bemalam ba buding tusah deka ke agu lebih agi maya malam hari laban sida takut. "Ketegal nya sida nembiak tu lalu kemi ba tisi budung aja," ku iya. Ngenang SK Long Tuma, Baru madah, sekula nya betapi enggau penanggul bekal kuasa karan. Nitih penerang ari iya, sekula nya diatu dibekal ngena kuasa karan ti ngena wayar seiti fes ke alai enda chukup dikena napi guna sida. "Sida minta perintah ngemanahka bekal kuasa karan ngena wayar tiga fes laban irauka karan ke diatu enda tetangkupa peminta guna sida," ku iya. Kelimpah ari nya Baru madah, kededua sekula nya mega begunaka bilik ICT ti manah ari ke diatu. "Kededua sekula udah diberi komputer ngambika ulih ngatur kelas ICT tang sida nadai bilik ICT ti kondusif, enda disikap ngena air-cond," ku iya.   |
| Kerejasama entara IPT, kompeni peribit nyaup nyungkak ekonomi nengeri Posted: 14 Aug 2014 09:05 AM PDT KOTA SAMARAHAN: Kerejasama entara palan pelajar tinggi (IPT) enggau kompeni peribit diakun ulih nyaup ngangkatka ekonomi nengeri, ku Menteri Pengawa Berumah Datuk Amar Abang Johari Tun Abang Openg. Iya netapka kerejasama ke bansa nya udah dikemeran menua maju baka ke di Jerman enggau Jepun lalu ngangkatka kededua menua nyadi kuasa ekonomi besai dunya. "Palan pelajar tinggi bisi penau ba tiap bengkah pengawa lalu kompeni pribit bisi peneleba nitihka batang pengawa ke diadu. "Kerejasama entara kededua ijensi tu tau ngasilka sebengkah penau ke tinggi lalu tu meh bengkah pengawa ke diadu menua maju baka Jerman enggau Jepun menya. "Asil kerejasama nya ngangkatka dagang kompeni lalu mega ngangkatka ekonomi menua,"ku iya. Iya mansutka jaku tu ba seiti aum pengarang berita pengudah ngemata pengawa nyain Sempekat Pemereti Ati (MoU) entara Universiti Teknologi Mara (UiTM) Sarawak enggau tiga bengkah ijensi iya nya Sarawak Tourism Board (STB), Daitoku Sdn Bhd sereta Information System (SAINS) Sdn Bhd di UiTM Samarahan, kemari. Sempekat nya deka meri awak ngagai UiTM nganjung pelajar sida nempuh latih industri ba ketetiga ejensi kelimpah ti bekunsi penau enggau peneleba. Abang Johari ke mega Menteri Dagang Temuai nambah, pengeraja asal ke dikembuan tiap menua enda ngenataika penguntung ba tikas maksima enti enda diurus modal mensia ke landik. Ku iya, modal mensia ke landik ba tiap batang pengawa dikeluar palan pelajar tinggi lalu nengah kerejasama enggau kompeni pribit ke ngembuan peneleba, UiTM ulih ngeluarka modal mensia ti bepenau sereta pintar ngurus pengeraja asal. "Modal mensia ke pintar sereta bepenau sigi diguna ba tiap menua ti deka nyapai pemujur ba pekara ekonomi. "Pekara tu udah nyata mai pemaik ngagai ekonomi menua Jerman enggau Jepun ke alai kededua menua angkat tegap pengudah perang dunya ke II,'ku iya nambah. Bela bisi ngulu atur pengawa nya, Rektor UiTM Sarawak Profesor Dato Dr. Jamil Hamali, CEO STB Dato Rashid Khan, CEO SAINS Dato Teo Tien Hong enggau CEO Daitoku Sdn Bhd Alfred Ling. |
| KM seruran ngemeratka pengelantang rayat Posted: 14 Aug 2014 09:04 AM PDT Pemaik sereta pengelantang peranak menua lebih agi sida di pesisir endang dikemeratka iya belama Dikarang Chris Bishop // KOTA SAMARAHAN: Pemaik enggau pengelantang rayat lebih agi sida ke diau di menua pesisir seruran dikemeratka Kepala Menteri (KM) Tan Sri Datuk Amar Adena Satem. Ngenataika jaku nya, Menteri Dagang Temuai Datuk Amar Abang Johari Tun Abang Openg madah, pemerat nyata dipeda pengudah Adenan enggau nyemetak ngansak kompeni ti ngambi bayar tol ba Jematan Metalun, Murum ngetu minta bayar tekala nya mega. "Pengudah berita senentang pekara nya dipansut ba The Borneo Post dua hari ke udah, Kepala Menteri enggau lengkas netapka pemutus, semua bayar tol ke ditetap nengah Jematan Metalun nya diketu. "Pemutus udah ditetap, Kepala Menteri ngansak kompeni batang ke nguasa jematan nya ngetuka pengawa minta bayar tol. "Pemaik enggau pengelantang rayat lebih agi sida ke diau di menua pesisir seruran dikemerat Kepala Menteri ke alai perintah patut enda meri sebarang penusah enggau pemar ngagai rayat,"ku iya. Abang Johari mansutka jaku tu lebuh nyaut tanya pemberita pengudah ngemata pengawa nyain Sempeket Pemereti Ati (MoU) entara entara Universiti Teknologi Mara (UiTM) Sarawak enggau tiga bengkah ejensi iya nya Sarawak Tourism Board (STB), Daitoku Sdn Bhd sereta Information System (SAINS) Sdn Bhd di UiTM Samarahan, kemari. Ku iya nambah, jaku ansak Kepala Menteri senentang pekara nya patut diturut enggau lengkas. Berita senentang bayar tol ba Jematan Metalun ti diakun pemadu mar ba dunya ke pansut ba the Borneo Post dua tiga hari tu balat ngenyit mensia mayuh. Kompeni diperita minta bayar RM150 ngagai semua orang ke betengahka jematan nya lalu penyampau RM300 dipinta ungkup pulai mansang. Hari tiga tu tadi ADUN Belaga ke mega Menteri Muda Main Asal enggau Pesaka Liwan Lagang nengah the Borneo Post madah, iya bisi dipadah Kepala Menteri ke alai iya (Adenan) udah ngansak kompeni ngetuka pengawa minta bayar tol. Pinta bayar tol nya berengkah dipejalaika ba pun bulan Julai tu ke alai semina bansa Penan ke diau di palan pengentap baru Murum diseliah ari mayar. Opis Kereja Raya (JKR) Hari Dua tu tadi mansutka penerang ke madahka jematan ti meraka kandang endur ke diampuh Projek Tekat Ai Murum nya ukai digaga ejensi nya. Sapit Direktor JKR John Wong nengah surat penerang berita madah Jematan Metalun digaga kompeni ke nguasa lisin batang ba endur nya. |
| Peranak menua ngelingi Projek Tekat Ai Bengoh mutus enggai pindah Posted: 14 Aug 2014 09:03 AM PDT KUCHING: Peranak ari tiga buah genturung pendiau ba bukit tinggi ngelingi Projek Tekat Ai Bengoh, Kampung Rejoi Nyegol, Kampung Bojong Siting enggau Kampung Sait – Muk Ayun, kemari sekali agi netapka pemutus runding sida enggai mindah ari menua asal. Pengari ketetiga genturung pendiau nya, Tawet Sanyok madah, pemutus nya ditetap ari runding semua sida lalu ukai ketegal jaku ansak ari sekeda orang politik ti disebut ngarika penyakal munyika diripot ba sekeda media bedau lama tu tadi. "Tanah endur kami diau diatu endang hak kami. Ba kami, tanah nya pengidup kami lalu enda tau diambi sengapa," ku iya. Tawet nimbal ripot media ti nyebut, Menteri Perengka Guna Mensia Mayuh Datuk Amar Awang Tengah Ali Hasan nuduh projek tekat ai Bengoh nya tejanggal ketegal jaku achuk raban penyakal ti ngujungka peranak ari ketetiga genturung pendiau nya enggai mindah. Awang Tengah mega madah penyakal sengapa nerenak pemenchi peranak menua nya ngagai perintah ke alai projek digaga semina enggau tuju mekal ai beresi ngagai pelilih Kuching. Tawet mega madah, enda adil sida dituduh Awang Tengah ngasuh projek tejanggal ketegal ti enggai mindah lalu pia mega ketegal bisi achuk sekeda raban ari parti penyakal. Iya netap, sida udah mutuska runding enda nerima perambu ari perintah ti ngasuh sida mindah ngagai Palan Pengentap Pendiau Bengoh (BRS) tang iya ke amat sida bisi minta dipindah ngagai palan bukai ke tinggi agi, ti jauh ari palan bungkur projek ba taun 2009. "Ambika chunto, peranak Kampung Sait – Muk Ayun setuju mindah ba taun 2012. Sigi enda disangkal sekeda peranak setuju mindah ngagai BRS, tang runding sida bebali baru pengudah rumah ba BRS bedau tembu digaga. "Nambahka nya, pengawa meresi tugung uras ba palan tekat ai mengkang dipejalai diatu ke mega nyadi seiti ari kebuah projek tejanggal. "Berindik ari nya, enda adil Awang Tengah nuduh kami meri kerejasama ngagai penyakal ketegal ti deka meda projek enda mujur dipejalai nitihka timpuh ke udah ditetap,'ku iya. Tawet mega enda lantang ati enggau ulah Temenggong Bansa Bidayuh (Pelilih Kuching) Temenggong Austin Dimin ti enda ngeamatka semaya ke diberi ngagai sida maya sebengkah aum ba taun ke udah. Ku iya, Austin ba aum nya meri semaya deka bebasaka pemutus sida ti enggai mindah, tang iya (Austin) mantaika jaku ke bebida ba media lalu ngansak kami ngubah runding sereta nerima perambu mindah ngagai BRS. "Temenggong Austin madah kami tau diau ba tanah asal kami, tang ba penerang iya nengah media munyika iya udah enda ingatka semaya diri maya aum ba pengujung taun 2013 tu tadi,'ku Tawet. Tawet mega madah penerang ari ADUN Bengoh Datuk Dr Jerip Susil ti madah tiga ruang bilik udah setuju mindah ngagai BRS deka nyadi pengawa ti penudi, udah tu nadai ruang bilik deka mindah lalu sida besempeket deka diau mendam ba tanah asal ke diatu. |
| Seminar diatur DBKU kena ngiri penemu ngagai konteriktor ba pengawa ngemanahka landskap Posted: 14 Aug 2014 09:02 AM PDT KUCHING: Lebih 100 iku raban konteriktor, direktor sereta 'supervisor' konteriktor ngulu 'Seminar Ngemeratka Pemanah Landskap Lembut' ti diatur Dewan Bandaraya Kuching Utara (DBKU) kemari. Nitih penerang ari Datuk Bandar DBKU Datuk Abang Abdul Wahap Abang Julai, nya keterubah iya piak DBKU ngatur seminar bekaul enggau Pengawa Ngemanahka Landskap Lembut, ti diatur sehari. Ku iya seminar nya kena ngiri penemu seraya nerangka silik pasal penyelengaraan landskap lembut ngena skop enggau spesifikasi kereja baru. "Tuju kami ngatur seminar tu ngambika bisi dikena ngiri penemu, penerang sereta pengelandik ngagai konteriktor, direktor enggau 'supervisor' konteriktor bekaul enggau pengawa ngemeranka pemanah landskap lembut enggau nebas rumput awakka juluk ngemeratka pemeresi sereta pengelikun di kandang mengeri tau nyadi nyata. "Nambahka nya dikena ngangkatka tikas profesyenalisme konteriktor ngambika lebih ngemeratka kualiti kereja lalu meri imej ti chukup manah ngagai mengeri Kuching, ke diperatika peranak mengeri," ku iya. Abdul Wahap mansutka pekara nya lebuh bejaku seraya bejadika Seminar Ngemeratka Pemanah Landskap Lembut ti diatur DBKU ba sebengkah hotel ditu, pagi kemari. Lebuh nandu penemu nya, iya madah, nya mega juluk DBKU ti deka nentuka peranak mengeri Kuching idup dalam pemaik enggau pengelantang senipak enggau Program CBS 'Enhancement Plan' iya nya Clean (beresi), Beautiful (manah) enggau Safe (likun). "Tuju tu mega ngambika Kuching nyadi 'Bandar Raya Pilihan Yang Berdayahuni dan Dinamik'. Kitai ukai semina deka ke manah dipeda tang mega dinamik, regas, enggau manah ba rama enggau ekonomi," ku iya. Bisi 5 keretas kereja ke dipejuraika ba seminar tu nyengkaum 'Integriti dan Akauntabiliti di Kalangan Kontraktor' (Penolong Kanan Penguasa, Suruhanjaya Pencegahan Rasuah Malaysia, Nalzatul Siza Mansotr); Pelan Penambahbaikan 'Cantik, Bersih dan Selamat' (CBS) (Ketua Bahagian, Bahagian Pentadbiran DBKU, Awang Mohammad Awang Yusuf). Syarat-syarat Tender & Kontrak (Ketua Bahagian, Bahagian kontrak dan Perolehan DBKU, Nor Isah Barmawi); Keselamatan & Kesihatan di Tapak Bina (Kapten (B) Merah Ubong, DBKU) enggau Kontrak Kerja-kerja Penyelenggaraan Landskap Lembut Berkualiti dipejuraika Ketua Bahagian, Bahagian Landskap dan Perancangan DBKU, Geoffrey Ramji. |
| Ejensi KKMM patut ngemeratka peneka rayat Posted: 13 Aug 2014 03:01 PM PDT Dikarang Rengenyan Labang // Opis ti nyadi pengerandang tu dipinta ngemeratka chara strategik ngambika piak ti ditagit enda dikelaung KUCHING: Semua opis enggau ejensi di baruh Opis Menteri Penyambung enggau Multimedia (KKMM) ti nyadi 'pengerandang' dipinta ngemeran sereta ngemeratka chara baru ti strategik enggau dinamik bepelasarka peneka rayat enggau menua. Menteri Perengka Guna Mensia Mayuh Datuk Amar Awang Tengah Ali Hasan madahka, nya beguna ngagai semua ejensi enggau opis dibaruh KKMM ti nyadi pemeri penerang enggau pengerembai polisi perintah. "Semua kita (ejensi enggau opis dibaruh KKMM) mih pengerandang ti pemadu beguna, nyadi penyambung entara perintah enggau rayat, ti ngerembaika penerang sereta polisi perintah ngagai rayat. "Nya alai amat beguna piak opis enggau ejensi dibaruh KKMM tu nentuka chara baru ti senipak tauka strategik ngambika kitai ulih nunda peneka raban ditagit laban sida tu enda muntang dikeruga sekalika penerang nya betul tauka enda ditabur nengah media rama. "Kitai ke nyadi pengerandang penyambung penerang perintah enggau rayat patut berundingka strategi ti manah agi ngambika terus nyadi kereban nyanding penemu endur ngulihka penerang ti betul. "Ketegal 'free flow of informations and citizen journalists' nengah twitter, facebook enggau ke bukai, ngujungka mayuh penerang sekalika betul tauka enda ti semina bepelasarka anggap tauka persepsi dikerembaika, tu meh pemar ditapi kitai," ku iya. Awang Tengah ti mega Menteri Pemansang Industri mansutka pekara nya lebuh bejaku ba pengerami Hari Raya Aidilfitri 2014 ti diatur Opis Pemadah Malaysia, Nengeri Sarawak ba tengah laman Indu Opis Pemadah Nengeri di Jalan Diplomatik ditu kemari. Bejaku baru iya madah, chara dikena ngerembaika polisi perintah ngagai tetiap kelompok tauka raban bansa patut ulih diperetika raban bansa ngambika sida (raban bansa) deka nyereta dalam agenda transformasyen ke ulih ngangkatka pemaik enggau pengelantang pengidup. "Perintah mayuh ngatur program ti ulih ngangkatka pemaik enggau pengelantang pengidup rayat sereta pemansang ekonomi ti terus dikemeratka, dipejalaika dikena nyapai nyadi menua ekonomi bepenatai pemisi tinggi. "Di nengeri Sarawak sebengkah strategi dikena ngulihka penatai pemisi tinggi iya nya nengah SCORE, nya alai penerang bekaul enggau tu patut dikerembaika enggau manah ngambika industri tu dipejalaika enggau engkeman sereta raban bansa sama ulih ngambi bagi ke lalu ulih meri penguntung (ngagai raban bansa empu)," ku iya. Kelimpah ari nya Awang Tengah ti ngenang Hari Kemerdekaan Ke-57 menua kena 31 Ogos, iya madah, rambai jaku ke dipilih taun tu senipak enggau menua tu ti diuan mayuh pupu bansa enggau jalai pengarap ke ulih beserakup. Iya madahka penyerakup ke dikemeratka lebih agi di nengeri tu, ke lalu nyadi chunto 1Malaysia patut terus ditan sereta dikemeranka. "Rambai jaku Hari Kemerdekaan taun tu iya nya 'Malaysia: Di sini lahirlah sebuah cinta' ngayanka Malaysia tu ti diuan pupu bansa ari mayuh jalai pengarap nadai penanggul beserakup, lalu tu (penyerakup) nyadi aset kitai sereta patut ditanka ngena temegah ati enggau penegap talukka menua. "Dalam kitai betapi enggau pemar, enti rayat terus ngemeranka runding sayauka menua kelimpah ari ngiri diri ngena ulah enggau penemu tinggi, kitai deka nyadi raban ti tegap, nyulut enggau beserakup ke lalu mai pemansang enggau ngemujurka agenda transformasyen perintah," ku iya ti mega Menteri Pengatur Pemansang Pengeraja Asal enggau Rampa Menua II seraya muji Opis Pemadah ke selalu ngatur 'Kempen Kibar Jalur Gemilang' nyerumba 'Hari Kemerdekaan'. Ba pengerami nya Awang Tengah ngungkupka belanja RM10,000 lalu tetiap iku menteri muda ke ngulu pengerami nya sama ngungkupka RM5,000 seseiku, ti nyengkaum Menteri Muda Pengatur Pemansang Pengeraja Asal Datuk Mohd Naroden Majais; Menteri Muda Perengaka Guna Mensia Mayuh (Bekal Ai Beresi) Datuk Syelvester Entri Muran; Menteri Muda Penyambung Datuk Lee Kim Shin; Menteri Muda Pemansang Industri Datuk Julaihi Narawi; Menteri Muda Pemansang Industri Datuk Peter Nansian enggau Speaker Kunsil Nengeri Datuk Amar Mohd Asfia Awang Nassar, ngambika bisi dikena opis pemadah ngatur aktiviti. Sama bisi ba pengerami nya pemangku Direktor Opis Pemadah Nengeri Sarawak Zaini Mohamad enggau ke bukai. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |